Read Timugon Murut GOSIA 13 Bible Online

GOSIA 13 - Timugon Murut bible

GOSIA 13

¹Paat ra galing i paat ra bansa' ru Ipraim minindagu, bansa'-bansa' ra bokon giu' ra Israil malaa'. Mangurumat ilo kaga' ra Ipraim, kaa' raino bansa' ru Ipraim makatula. Sinamba nilo Baal, ginio ra matoi ilo.

²Riminayus-rayus ilo nambaal ra tula am nambaal ra sinungkalalaing ru logam koson sambaan — sinungkalalaing intor ra pirok, ondo' inatang ru utok ru ulun am binaal ru kalindu' ru ulun. Konilo boo, “Pataako' noyo taak simbalui ra sinungkalalaing ti!” Imuagon, mangalok ulun ra sinungkalalaing anak ru sapi'!

³Ginio ra lumiot ilo koson ra gaun mapulak kapoam bolobou paat ra susuab ti. Masauk ilo koson ra apol ondo' siabin ru angin intor ra intok pangagikan ra gandum, am koson ra lisun ondo' miningkual intor ra intok no.

⁴Indagu TUHAN, “Aku noyo TUHAN, i Aki Kapuuno' min ondo' naningganai noyo ramuyun miningkual intor ra Misir. Kolondo' i Aki Kapuuno' min kaa' Aku ayuk. Aku noyo rorondo' mamamayag ramuyun.

⁵Nagalung Aku ramuyun giu' ra tana' kaagisan ondo' mapua'.

⁶Kaa' pakaayan kau boo ra pagun ondo' moonsoi, am naasug kau am niayuk najala', liminimbau kau am nampalilian Raki'.

⁷Ginio ra bulunsaron Takamin koson ra singa'. Koson ra ampunguon mangkuliman Aku koson mamulunsar ramuyun giu' ra ralan.

⁸Bulunsaron Takamin koson ra baawang ondo' natatakan ra anak. Bibinsangon Takamin. Koson ra singa' saamon Takamin ra giu' no, am koson ra bibiag masigo bibinsangon Takamin.

⁹Mamuso Aku ramuyun, ulun ru Israil kau! Osoi kia makapangindangan ramuyun?[32]

¹⁰Nakiani' kau ra raja' am tingganai, kaa' makapamayag ilo kia ra bansa' ti?

¹¹Ralalom ru sangit Kuno inanian Takamin ra raja'-raja', kaa' ra guang malasu' Aku nangalap risilo mugar.

¹²Tula am kasalaan ru Israil tinulisan, am binulian ondo' tinulisan no.

¹³Israil mokoondo' ra kaluagan koson maayag, kaa' Israil sasambungon kaga' saboi kalo pinakai kaluagan raginio. Israil koson ra lalagang ondo' mamaar anakon kaa' marara' mingkual intor ra binunakan ru ina'.

¹⁴Kalo bayagon Ku ulun ragitio intor ra intok ru ulun namagatoi kapoam intor ra kuasa' ru kapatayan. Okou kapatayan, porotongo' noyo[33] kapusaan! Kalo boo makaasi' Aku ra ulun ragitio.

¹⁵Kabalu' pana Israil langkaya' koson ra sakot ondo' malabung,[34] atarin Ku angin sirangon ondo' malasu' intor ra tana' kaagisan am mampapua' ra tulubong am taur ru timug nano. Ngaangai' ondo' mokologo alapon intor riso.