Read Timugon Murut GOSIA 14 Bible Online

GOSIA 14 - Timugon Murut bible

GOSIA 14

¹Samaria musiti' ukumin sabap giminuor Raki'. Matoi mamagun nano ralalom pangayawan. Pampasin lalagang saboi matutuk, am tinai' ru ruandu' maapang abuin.”

²Saguli' no ra TUHAN, i Aki Kapuuno' min, ulun ru Israil kau. Tula min nangkinibit ramuyun nakasunsuyar am naratu'.

³Saguli' kano ra TUHAN, am polosoon pakiasian ti masauk ra taak min Riso: “Ampuno' noyo ngaangai' tula mai, iou TUHAN, am apuo' pakiasian mai. Akai pana mongompor Rirun koson ra ondo' binantu' mai.

⁴Pagun ru Asyur kalo makabayag ramon. Kurita' kuda pana kalo makapanindung ramon. Kalo boo mindagu akai ra sinungkalalaing-sinungkalalaing raginio i Aki Kapuuno' mai. Iou TUHAN, makaasi' Kou ra ulun ondo' kolondo' osoi pana lansanin.”

⁵Indagu TUHAN, “Ulun Kuno ondo' timinalansiang ibiton Ku saguli'. Tagamin Ku ilo ra sotopot ru guang, sabap ra kalo boo sumangit Aku risilo.

⁶Tayar ru ulun ru Israil, koson Aku ra rasam ondo' mamasa' ra tana' ondo' mapua'. Mungkalar ilo koson ra busak, am koson ra puun tataun giu' ra Libanon ondo' malandom bakat nano.

⁷Maayag ilo am sumuang toojo koson ra tatanom ondo' masuang talantar nano, am masauk ilo ra moonsoi koson ra puun ru jaitun. Masauk ilo ra maamis owou koson ra puun ru sidar giu' ra Libanon.

⁸Sumaguli' ilo Raki' am maayag ralalom ru panindungan Kuno. Mataki' ilo gumaai am lumanja' lumangkaya' koson ra gandum timinuu' giu' ra umo ondo' malabung, am koson ra umo ru anggur ondo' masuang ampos nano. Mauligan ilo kaga' koson ra wain intor ra Libanon.

⁹Ulun ru Israil[35] mamatir ra ngaangai' sinungkalalaing; iowon Ku pakiasian nilo am magalung risilo. Koson ra puun tataun sumansam ayuk sindungin Ku ilo; Aku noyo puun ru ngaangai' barakat nilo.”

¹⁰Gama' ru ulun ondo' mapintar makarati' ra atan ondo' tinulisan ti am niayuk guangon no toojo. Panuluan intor ra TUHAN noyo motopot, am ulun mapasau guang maayag sabap ra siminugut ra panuluan raginio. Kaa' ulun makatula nakasunsuyar am naratu', sabap ra kalo sinugut nilo panuluan raginio.