Read Timugon Murut JOIL 1 Bible Online

JOIL 1 - Timugon Murut bible

JOIL 1

¹Gitio noyo tanou ru TUHAN posoboyon ri Joil anak ri Pituil.

²Rongog kano, akau ulun matutuo; rongog kano, akau ngaangai' ulun giu' ra Jiuda. Igondo' kia baal koson ragitio nasauk paat min ragili, kapoam paat ru kinamatuaan min ragili?

³Tunungo' kasaukan ti ra anak-anak muno, maa' raginio tunungon nilo ra anak-anak nilo, am anak-anak nilono boo poyo mantunung raginio ra papag ra tauli no.

⁴Sampanon ru gapu' ondo' kalo mauntob suang no minorop giu' ra umo-umo am nangai' ra ampos no. Atan ondo' tinatang ru sampanon ra gapu' no, sinaliir ru sampanon ra bokon poyo.

⁵Akau ondo' nagauk, tirong kano! Akau ondo' manginum ra wain, pantangi' kano! Wain ondo' baguon ginaau noyo intor ra kabang min.

⁶Rondo' bansa' namulunsar noyo ra pagun takau; bansa' ondo' maikang am kalo mauntob suang nano; ripon nilo malarom koson ra ripon ru singa'.

⁷Puun ru anggur takau pinuso noyo, am puun ru ara takau pinandak. Kulapa' ru puun tataun inanit, saboi raan-raan nasauk ra mapulak.

⁸Akau ngaangai' ulun, pantangi' kano, koson ra ralaa ondo' nanulaboi ra pinatayan ru tamung nano.

⁹Kolondo' boo gandum am wain koson pataakon giu' ra Baloi ru TUHAN; imam-imam nantangi' sabap ra kolondo' pataakon ra tayar ru TUHAN.

¹⁰Umo-umo nasaliir; tana' mangulir sabap ra gandum napuso noyo, kawa' ru anggur napua' noyo boo, am puun jaitun liminonot.

¹¹Akau ulun magitanom, pangiluk guang kano; akau ulun manangumo ra anggur, pantangi' kano, sabap ra gandum, barli, am ngaangai' tinanom napuso noyo.

¹²Puun ru kikinawa' giu' ra umo liminonot noyo boo ngaangai'; puun anggur, puun ipol, puun ara, puun kurma am puun dalima', mamagun pana kalo boo maansukan.

¹³Akau imam-imam ondo' mangandoi giu' ra altar, pambayang kano ra konoon karung am pantangi' no. Umpos kano ra ralalom Baloi ru TUHAN am panulaboi kano ra mosorondom. Kolondo' boo gandum am wain koson pataakon ri Aki Kapuuno' min.

¹⁴Pangani' no ra susuban koson mampali; pambaal no rondo' pantimungan. Susubo' tingganai-tingganai am ngaangai' mamagun ru Jiuda matong ra Baloi ru TUHAN, i Aki Kapuuno' min am pampiau makiindangan Riso.

¹⁵Orou ru TUHAN mamaar noyo, paat ra Ondo' Maayo Kaga' Kuasa', mamparatong ra katutukan. Mapara' boo makalalaa' orou raginio!

¹⁶Tinanom pinuso giu' ra talupak ru mato takau. Kolondo' boo indii am lalakup giu' ra ralalom Baloi ri Aki Kapuuno' takau.

¹⁷Sampug minatoi giu' ra tana' ondo' mapua'. Kolondo' boo gandum koson buliin; kulapa' pambulian ra bilor kolondo' suang nasauk ra nalunsai.

¹⁸Bibiag tinambiag mampagala' am magalabo, sabap kolondo' boo padang sakot risilo ngaangai'; sampanon ru domba pana maimbolo'.

¹⁹Gumolok aku Rirun, iou TUHAN, sabap padang sakot am puun tataun mapua' noyo am minatoi, ilain koson nosolob ru apui.

²⁰Mulu' poyo ra bibiag masigo pana gumolok Rirun, sabap ra sungoi-sungoi napua' noyo, am padang sakot giu' ra tana' kaagisan nosolob noyo ru apui.