Read Timugon Murut JOIL 2 Bible Online

JOIL 2 - Timugon Murut bible

JOIL 2

¹Samputi' bujung, kosongowo' bolos tatandu' makalalaa' giu' ra Sion, bulur matulai ri Aki Kapuuno'.[1] Ponontol kano, akau mamagun ru Jiuda, sabap ra Orou ru TUHAN matong ra mataki'.

²Orou raginio molondom am majuut, orou maitom am makagaun. Saujor ru gapu' no matong koson ra kalandaman ondo' liminibung ra kagunungan. Kalo poyo igondo' nasauk baal koson ragitio, am baal ragitio kalo boo masauk saguli'.

³Koson ra apui ondo' sumolob am mangumpo, sampanon ru gapu' mangakan ra ngaangai' tinanom. Giu' ra saang ru sampanon ru gapu', padang moonsoi koson ra taman Idin. Kaa' giu' ra talikuron ru sampanon ru gapu', padang no nasauk noyo ra tana' mapua'. Ngaangai' no pinuso ru gapu'.

⁴Baal ru gapu' no koson ra kuda, am masimbul koson ra kuda ru pangayawan.

⁵Paat ra gapu' morop giu' ra tampak ru gunung, gapu' satulindak koson ra kurita' kuda, am manguripit koson ra sakot mapua' ra nosolob. Gapu' timininting koson ra saujor ondo' nakatampos koson mamulunsar.

⁶Paat ra gapu' sumuku', ngaangai' ulun malaa', ngaangai' bulos ru ulun malui ra mabula'.

⁷Gapu' mamulunsar koson ra ulun tutumula', am mangkiwa' ra timbok koson ra saujor. Ngaangai' gapu' marayus jumalai ra sumuku', ra kalo mangulau ra sukuan

⁸kapoam makapajunjung. Gapu' mapajanjang ra ngaangai' ompong, ra kolondo' makapanginga'.

⁹Gapu' mamulunsar ra bandar, masimbul giu' ra rasawat ru timbok ru bandar, mangkiwa' ra baloi-baloi, am sumubol maya' ra gigimpalan koson ra ulun mantatakou.

¹⁰Tana' ti malunggun paat ra gapu' sumuku', am limbowon pana monontol. Mato ru orou am sila' lumondom, butitin-butitin kalo boo suminda.

¹¹Nangani' TUHAN ra susuban ra bolos matangil ra saujor Nano. Saujor ondo' gumagaya' Riso masuang am maikang. Mapara' boo makalalaa' orou ru TUHAN! Kolondo' sangulun pana tumaan.

¹²Indagu TUHAN, “Kaa' raino talikur kano intor ra tula ra totopot am saguli' kano Raki' am mampali, mantangi' am manulaboi.

¹³Polosoon noyo guang min ra matutuk no mampakito ra guang pansagulian, pai' ayuk rilako' bayang.” Saguli' no ra TUHAN i Aki Kapuuno' mino. Io no motogom am napanu' ra asi'; Io no tumaan guang am manugut ra bantu' Nano; Io no magail makatampos mangampun am kalo masaga' mangukum.

¹⁴Maaru' lair TUHAN i Aki Kapuuno' mino mangulau ra pangkaraan Nano, am mambarakat ramuyun ra ampos ru tana' ti ondo' masuang. Ginio ra makapampataak kau Riso ra gandum am wain.

¹⁵Samputi' bujung giu' ra Bulur Sion; panusub no koson mampali, am baalo' rondo' pantimungan.

¹⁶Timungo' ngaangai' mamagun, potomposo' ilo koson pantimungan ru ulun, ibito' ulun matutuo, timungo' anak-anak am lalagang-lalagang niayuk. Mansawo ondo' bagu nagandu' pana musiti' mangiruan ra lamin, am matong.

¹⁷Imam-imam ondo' mangandoi ayuk ra TUHAN giu' ra lolot ru altar am langgar ra tingganai Baloi ru TUHAN, musiti' mantangi' am makiasi' koson ragitio, “Pakaasi' no ra ulun Muno, iou TUHAN. Pai' polosoo' bansa' ra bokon magasab am mangiis ramon am mindagu, ‘Ati kia i Aki Kapuuno' min?’ ”

¹⁸TUHAN pana nanulu' ra Io mampalio ra tana' Nano; makaasi' Io ra ulun Nano.

¹⁹Tumaam Io risilo, “Raino masaga' Aku mangani' ramuyun ra gandum, wain am umau jaitun, am basugon kau. Bansa'-bansa' ra bokon kalo boo magasab ramuyun.

²⁰Painggaluron Ku pulalai ru gapu' ondo' minatong intor ra ralayo. Pagiruon Ku santayaran intor ra pulalai raginio giu' ra tana' kaagisan. Baris ra pagulu ru pulalai no pagiruon saboi malinjob giu' ra Raat Matoi, am baris ra tinaulian malinjob giu' ra Raat Tanga'. Gapu' ondo' minatoi masauk ra mootong. Pusoon Ku pulalai raginio sabap ra ngaangai' binaal nano ramuyun.

²¹“Akau umo, pai' kalaa', pakaansuk no am pagindii no, sabap ra baal ra maayo ondo' binaal ru TUHAN rirun.

²²Akau bibiag, pai' kalaa', sabap ra padang sakot raino masansam, puun mangkawa', am kawa' ru ara am niayuk kawa' ru anggur pana masuang.

²³“Pakaansuk kano, akau mamagun ru Sion, pakaansuk kano sabap ra atan ondo' binaal ru TUHAN, i Aki Kapuuno' min ramuyun; Nangani' Io ra rasam ondo' maukop bulintok raun tumutu',[2] Namparatu' Io ra rasam bulintok ra masimu' am rasam bulintok ra mambusak koson ragili.

²⁴Intok pangagikan ra gandum mososok ra gandum, am intok mamaga' ra kawa' ru anggur malabaan ra wain am umau jaitun.

²⁵Paaligon Ku ngaangai' nangalubat ramuyun ra bilor-bilor bulintok ra gapu' nangakan ra ampos ru tinanom min. Aku noyo ondo' nanusub ra sampanon ru gapu' no nantipagon ramuyun.

²⁶Kaa' raino mokoondo' kau ra akanon naukop saboi naasug. Mongompor kau ra TUHAN, i Aki Kapuuno' min, nambaal Io ra baal makaimuag ramuyun. Ulun Kuno totopot kalo boo asabin.

²⁷Ginio ra, akau Israil, makapandai kau ra Aku soroi ra tatanga' min, am ra Aku, TUHAN iono i Aki Kapuuno' min, am kolondo' boo bokon. Ulun Kuno totopot kalo boo asabin.”

²⁸“Kopongo raginio pasasaron Ku Ambiluo Kuno ra ngaangai' ulun: anak ungkuyon am anak ruandu' min mampatanou ra tanou Kuno; ulun matutuo min maginupi, am ulun mamulok min makakito ra napakitanan.

²⁹Paat raginio pasasaron Ku Ambiluo Kuno mulu' poyo ra ulipon-ulipon, ungkuyon am poyo ruandu'.

³⁰“Mangani' Aku ra tatandu' ra orou raginio, giu' ra limbowon am ra tana' ti; mokoondo' malayak ra raraa', apui am lisun ra makapal.

³¹Kalo poyo ra orou ru TUHAN ondo' makalalaa' am moporos no masaboi, mato ru orou masauk ra molondom, am sila' masauk ra malia' koson ra raraa'.

³²Kaa' ngaangai' ulun ondo' makiindangan ra TUHAN bayagon. Koson ra rinagu ru TUHAN, ‘Santayaran ulun giu' ra Jirusalim maayag; ilo ondo' pilion Kuno maayag.’ ”