Read Timugon Murut JOIL 3 Bible Online

JOIL 3 - Timugon Murut bible

JOIL 3

¹Indagu TUHAN, “Paat raginio patapulion Ku kalangkayaan ru Jiuda am Jirusalim.

²Timungon Ku ngaangai' bansa' am magibit risilo giu' ra Limayak Pangakiman. Akimin Ku ilo ra giu' no sabap ra ngaangai' binaal nilo ra ulun Kuno. Namatir ilo ra ulun Kuno giu' ra masuang pagun, am nantayar-tayar ra tana' ru Israil, pagun longgom Kuno.

³Nagugundi' ilo koson mangaru' ra ulun makaalap ra ulun rinakop. Nantalan ilo ra lalaing ungkuyon am ruandu' maa' raginio saukon ra ulipon. Alapon nilo ruit ondo' naapu koson mambayar ra ulun mantalan ra inan am mambali ra wain.

⁴Atan kia ondo' kinamin mu baalo' Raki', okou Tirus, Sidon am titikop ru wilayah Palistin? Kuminam kau kia mansuli' Raki'? Amon ru koson poyo raginio, balasin Takamin ra mataki'.

⁵Nampagaau kau ra mas am pirok Kuno, am niayuk nagibit ra rapu' kalangkayaan Kuno ra ralalom baloi ru sinungkalalaing min.

⁶Inibit min mamagun ru Jiuda am Jirusalim giu' ra intok maalur, am niayuk nantalan risilo ra ulun ru Junani.

⁷Kaa' raino magibit Aku risilo mingkual intor ra intok-intok nantalanan min risilo. Balasin Ku kalaatan min risilo.

⁸Anak-anak ungkuyon am ruandu' min talanon ra ulun ru Jiuda; ulun ru Jiuda poyo mantalan risilo ra Syiba, pagun ondo' maalur kaga'. Aku, TUHAN nakaindagu noyo.

⁹Potonowo' baal ragitio ra bansa'-bansa', ‘Tampos kano koson mantula', piawo' ulun-ulun tutumula' min; timungo' ngaangai' saujor, am jalog kano!

¹⁰Baluyo' mato ru radu' muno masauk ra ilang, am niayuk tantab koson saukon ra tutura'. Ulun ondo' malawo musiti' maya' mindagu: Aku tutumula'.

¹¹Ibok kano ra mataki',[3] akau bansa'-bansa' giu' ra mamaar, timung kano giu' ra limayak.’ ” Iou TUHAN, atari' saujor Muno koson mamulunsar risilo.

¹²Indagu poyo TUHAN, “Bansa'-bansa' musiti' tumampos am mongoi ra Limayak Pangakiman. Giu' no Aku, TUHAN manturung am mangakim, ra ngaangai' bansa' ra mamaar.

¹³Malaat ilo kaga', putulo' ilo koson ra gandum bulintok ra mangkumos; pagaa' ilo koson ra kawa' ru anggur giu' ra intok pamagaan ra kawa' ru anggur saboi wain lumimpak.”

¹⁴Riribu ulun soroi giu' ra Limayak Pangakiman. Giu' no Orou ru TUHAN matong ra mataki'.

¹⁵Mato ru orou am sila' lumondom, am butitin-butitin kalo boo suminda.

¹⁶Bolos ru TUHAN mansangal intor ra Bulur Sion; maningkalur Io intor ra Jirusalim; limbowon am tana' ti malunggun, kaa' manindung Io ra ulun Nano.

¹⁷“Ginio ra akau Israil, makapandai kau boo, ra Aku noyo TUHAN, i Aki Kapuuno' min. Mayan Aku giu' ra Sion, bulur Kuno ondo' matulai. Jirusalim masauk ra bandar ondo' matulai; ulun bansa' ra bokon totopot kalo boo mampagaau raginio.

¹⁸Paat raginio gunung libungin ru umo ru anggur; bibiag tinambiag soroi giu' ra moonong bulur; ngaangai' sungoi giu' ra Jiuda totopon ra timug. Rondo' sungoi tumilis intor ra Baloi ru TUHAN; sungoi no manimug ra Limayak Akasia.

¹⁹Misir masauk ra tana' kaagisan, am Idom masauk ra tuntur ru nalunsai, sabap ra namulunsar ilo ra Jiuda am namatoi ra mamagun nano ondo' kolondo' sala.

²⁰Mansuli'[4] Aku ra bala nilo ondo' pinatoi; kalo mompoloso Aku ra ulun ondo' makasala no makalabus. Kaa' Jiuda am Jirusalim ayanin ru ulun ra sabubuoi no, am Aku, TUHAN mayan giu' ra Bulur Sion.”