Read Timugon Murut AMOS 3 Bible Online

AMOS 3 - Timugon Murut bible

AMOS 3

¹Akau ulun ru Israil, rongogo' tanou ru TUHAN intor ra ngaangai' ru bansa' min, ondo' inibit Nano miningkual intor ra Misir. Indagu TUHAN,

²“Intor ra ngaangai' bansa' ra tana' ti, akau noyo rorondo' bansa' ondo' nauligan Kuno am alungin. Ginio sabap ra tula min maayo, am musiti' ukumin Takamin.”

³Iowon kia ruo ngaulun mabaya' mugar ra kalo nabantu' koson maguma' galing?

⁴Mansangal kia singa' giu' ra kataunan, amon ru kalo poyo nokoowot ra akanon? Mansangal kia anak ru singa' giu' ra ralalom ru luang nano, amon kalo poyo nakarakop ra atan-atan?

⁵Makasulung kia susuit ralalom ru landak, amon ru kolondo' upan ru landak? Kumukum kia galama' landak amon kolondo' nakasulung?

⁶Amon ru bujung tatandu' ru pangayawan samputin, kalo kia ulun giu' ra bandar malaa'? Makalumpa' kia karaat ra rorondo' bandar, amon TUHAN kalo mamparatong ra karaat no?

⁷TUHAN Raja' kalo igondo' nambaal ra rondo' pana ra kalo nambala' galing ra inatangan Nano ra nabi-nabi, ulipon-ulipon Nano.

⁸Paat ra singa' mansangal, osoi kia kalo malaa'? Paat ra TUHAN Raja' mindagu, osoi kia mokopongkoror am kalo nampatanou ra tanou Nano?

⁹Potonowo' tanou ti ra ulun ondo' minayan giu' ra istana Misir am Asdod, “Timung kano giu' ra bulur-bulur giu' ra liliut ru Samaria, am ilai' kajajawan am niayuk kalaatan ondo' nasauk ra giu'.”

¹⁰Indagu TUHAN, “Sinuangan ru mamagun ru Samaria baloi nilo ra kuliamos-kuliamos ondo' noowot intor ra kalaatan am nantakawan. Totopot ilo kalo makapandai ra mabanis guang.

¹¹Ginio ra magawang pantula' ra pagun nilo, mamuso ra pangampinan, am mantakou ra baloi maayo nilo.”

¹²Indagu TUHAN, “Koson ra sangulun magagalung ondo' nakaalap ruo kalayam kapoam santalingaan ru domba nano ondo' sinaam ru singa', koson raginio niayuk ondo' masauk; sanganu ayuk ulun maayag ra gino ngai' ru mamagun Samaria ondo' raino liminuya' ra intok kaalangan ondo' moonsoi kaga'.”

¹³Indagu TUHAN Raja' Ondo' Maayo Kaga' Kuasa', “Raino rongogo' noyo, am pampakara' toojo ra papag ri Jakub.

¹⁴Paat ra orou Aku mangukum ra ulun ru Israil sabap ra tula nilo, pusoon Ku altar-altar giu' ra Bitil. Moonong altar pandakon sangau-sangau nano saboi maratu' ra tana'.

¹⁵Pusoon Ku baloi bulintok masimu' am baloi bulintok malasu'. Baloi ondo' binungaan ra gading puuton; ngaangai' baloi maayo lunsayon.