Read Timugon Murut AMOS 4 Bible Online

AMOS 4 - Timugon Murut bible

AMOS 4

¹Rongog kano, akau ruandu' Samaria ondo' liminomok poyo koson ra sapi' molomok giu' ra Basan! Nangimbolo' kau ra ulun malawo, manginjang ra ulun musikin am masaga' kaga' manusub maa' raginio ralaki mino magail mangula' ra inumon makagauk ramuyun!

²Aku, TUHAN Raja' matulai. Binantu' Ku noyo ra masaboi paat no ra akau ralaaton ra kakait; akau ngaangai' masauk koson ra papait soroi ra pamata'.

³Ralaaton kau giu' ra silot ru timbok ondo' mamaar kaga', am papatiron giu' ra Girmon.”[3]

⁴Indagu TUHAN Raja', “Akau ulun ru Israil! Ongoi no ra intok sambayangan giu' ra Bitil am pambaal no ra tula ra giu' no! Ongoi no giu' ra Gilgal, am pambaal no ra tula ra giu' no ra ngaangai' ru kaikangan min! Pampataak no ra taak simbalui moonong susuab ti, am ibito' sampiopor muno moonong talu ngoorou!

⁵Pampataak no ra ruti' koson ra taak paringkuanangan ri Aki Kapuuno', am ragu minsawat intor ra pataakon ra pinaruang ondo' ibiton min! Binaal koson raginio noyo ondo' masaga' min baalon.

⁶“Aku noyo ondo' namparatong ra bitilan ra ngaangai' ru bandar min, kaa' kalo siminaguli' kau Raki'.

⁷Aku nongompong ra rasam rumatu' paat ra tatanom min musiti' maasa' ra timug. Paratuon Ku rasam giu' ra rondo' bandar kaa' kalo paratuon ra bandar ra bokon. Rondo' umo marasaman, kaa' umo ra bokon mapuaan.

⁸Giu' ra kukula' bandar, mamagun nano ondo' malawo sabap ra nampaas maguyum ra timug giu' ra bandar ra bokon, kaa' timug ra giu' no kalo naukop. Kabalu' pana raginio, kalo niayuk siminaguli' kau Raki'.

⁹“Atarin Ku angin malasu' am pasisang koson mamuso ra tinanom min giu' ra umo am puun ru anggur min. Akanon koyoo' ru gapu' puun ara am puun jaitun. Kabalu' pana raginio kalo niayuk sumaguli' kau Raki'.

¹⁰“Atarin Ku maruol tumapik ramuyun koson ondo' inataran Ku giu' ra Misir. Potoyon Ku ulun mamulok min ralalom pangayawan am gaawon kuda min. Sosokon Ku pangkiman min ra baangkai ondo' owou no sumusuk ra arung. Kabalu' pana raginio, kalo niayuk sumaguli' kau Raki'.

¹¹“Pusoon Ku santayaran intor ramuyun koson ra Aku namuso ra Sodom am Gomora. Ulun ondo' lakat poyo naayag ra gino kau po ngai' koson ra putul ru luton ondo' inalap intor ra apui. Kabalu' pana raginio, kalo niayuk sumaguli' kau Raki'.

¹²Ginio ra, akau ulun ru Israil, ukumin Takamin. Tampos kano manguma' ra ukuman ondo' palumpaan Kuno ramuyun!”

¹³Sotopot no, i Aki Kapuuno' ondo' nambaal ra kagunungan; Io niayuk nampasauk ra angin. Pinabala' No inatangan Nano ra ulun. Kinulau No matawang masauk molondom; giu' ra rasawat ru tampak-tampak ru tana' mugar Io, TUHAN i Aki Kapuuno' Ondo' Maayo Kaga' Kuasa', ginio noyo inggalan Nano.