Read Timugon Murut JUNUS 1 Bible Online

JUNUS 1 - Timugon Murut bible

JUNUS 1

¹Paat ra sangarawan, indagu TUHAN ri Junus anak ri Amitai.

²Indagu Io, “Ongoi no ra Niniwi, bandar maayo no, mompololob ra mamagun no, sabap ra nakapandai Aku ra mamagun no malaat kaga'.”

³Kaa minongoi i Junus ra intok ru bokon koson minggalur ra TUHAN. Minongoi i Junus ra Jopi, am nakainamot ra kapal ondo' mongoi ra Sipanyol. Pakapambayar ra tambang, sakoi i Junus ra kapal; nasundoi io nababaya' ra ulun-ulun ru kapal mongoi ra Sipanyol, maa' raginio makainggalur io intor ra TUHAN.

⁴Timinuun i Junus ra intok ondo' magana' kaga' am liminuya' ra giu', am nokororot io toojo. Kopongo raginio namparatong TUHAN ra bagiu' mapuor kaga' giu' ra raat, am kasauk boo bagiu' ondo' makalalaa', am liminapos ra kapal saboi maar magagai. Ngaangai' ulun ru kapal nalaa' am giminolok makiindangan, sigagama' nilo ra dewa nilo galama'. Pinatiran nilo suang ru[1] kapal no ra ralalom ru raat koson mangiruru' ra makalalaa'.[2]

⁶Paat ra kaptin ru kapal i timinuun giu' ra ragana', natuum no i Junus nombolong ra giu'. Indagu kaptin i, “Ati koson kou mombolong ra baal ragitio? Karat no! Pakiasi' no makiindangan ra dewa muno. Maaru' lair makaasi' io ritakau, am kalo mapuso takau.”

⁷Kopongo raginio, nagaloi boo i Junus am kaptin ru kapal giu' rasawat, ngaangai' ulun ru kapal nagindagu ilo-ilo galama', “Ibok takau ngai' magugundi' takau maa' raginio makapandai takau osoi makasala, saboi nalumpa' takau ru karaat ti!” Pagugundi' ilo am kaundi' i Junus.

⁸Konilo ri Junus, “Topot kia okou nangkinibit ra karaat ti? Ati intor am atan bansa' muno? Kua guat ragiti kou?”

⁹Taam i Junus, “Ulun aku ru Ibrani. Sumamba aku ra TUHAN, i Aki Kapuuno' giu' ra suruga', ondo' nambaal ra raat am lantur.”

¹⁰I Junus pana nantunung boo ra io ti nagiru' intor ra TUHAN. Korongog ragu raginii, malaa' boo ngaangai' ulun ru kapal, am mindagu riso, “Binaal muno makalalaa' kaga'!”[3]

¹¹Liliwa' raginio bagiu' mapuor kaga' liminanja', am ngaangai' anak ru kapal nangkuot ri Junus, “Atan kia musiti' baalon mai rirun koson mampalinos ra bagiu' mapuor kaga' ti?”

¹²Taam i Junus, “Patiri' min aku ralalom ru raat, am maaru' bagiu' mapuor ti luminos. Nakapandai aku no ra aku ti nangkinibit ra bagiu' ondo' mapuor kaga' ondo' liminumpa' ramuyun.”

¹³Kaa' ngaangai' ulun ru kapal lakat poyo mirot toojo koson mangkabil ra kapal i mongoi ra lantur. Kaa' bagiu' mapuor liminanja' niayuk mapuor kaga', saboi pirot nilo kolondo' onong.

¹⁴Ginio ra golok ilo ra TUHAN, “Iou TUHAN, kitaakon mai, pai' no pamuso ramon sabap mangalap ra painawo ru ulun ondo' kolondo' sala ramon. Iou TUHAN, Okou noyo ondo' makapandai ra ngaangai' baal ragitio; gitio noyo binaal Muno.”

¹⁵Kopongo raginio, pinatiran nilo i Junus ra ralalom ru raat, am bagiu' mapuor i limininos ra namulali'.

¹⁶Ngaangai' ulun ru kapal i malaa' toojo ra TUHAN. Nampataak ilo ra taak simbalui ra TUHAN am nambaal ra nazar Riso.

¹⁷Liliwa' raginio, nanusub TUHAN ra sangunor papait maayo koson manilus ri Junus. Ginio ra i Junus minayan ra ralalom tinai' ru papait talu ngoorou am talu ngorondom buoi nano.