Read Timugon Murut UNTABAN 11 Bible Online

UNTABAN 11 - Timugon Murut bible

UNTABAN 11

¹Paat ra sangarawan tumalimpuun ulun ru Israil mambutok ra TUHAN intor ra kapaganan nilo. Pokorongog TUHAN ra butok nilono, siminangit Io am naparatong ra apui risilo. Riminalat apui no ra tatanga' nilono am nonolob ra santayaran ra pangkiman.

²Pampiau ulun ru Israil ra makiindangan ri Musa, am pakiasi' io ra TUHAN, am liminasa' boo apui no.

³Ginio sabap ra intok no ininggalanan ra Tabira,[17] sabap giu' no riminalat apui ru TUHAN ra tatanga' nilono.

⁴Ralalom pangkiralanan ru ulun ru Israil, mokoondo' niayuk santayaran ulun bansa' bokon ra popolos nilo. Matiakan kaga' ulun bansa' bokon no ra kual, am tumalimpuun boo ulun ru Israil mambutok, “Mapara' bonsoi no amon ru makaakan takau ra kual.

⁵Giu' ra Misir makaakan takau ra papait ra masuang maya' ra kasagaan takau ra kalo mambayar ra atan-atan. Lakat poyo mangkara' takau ra baliburan, sangop, kusai, ambawang malia' am ambawang mapulak ra giu' i.

⁶Kaa' raino kolondo' boo ikang takau sabap kolondo' akanon ra bokon ondo' ayuk am manna ra moonong orou.”

⁷Baal ru manna no koson ra unor mongoborok, makabatik mapulak ra masilou-silou.

⁸Paat ra rondom ti maratu' manna mabaya' ra bolobou ra intok pangkiman. Paat ra susuab ti, mongoi ulun ru Israil pampalulur ra manna, am gilingon kapoam tutuon ginio masauk ra tapung, am tonokon boo ginio am baalon ra ruti' malilis. Pamalimanan ra ruti' no koson ra ruti' ondo' inansak ra umau jaitun.

¹⁰Norongog ri Musa ra ngaangai' ulun no mambutok, paat ilo minigor ra sasampulalai giu' ra kulobon ru kim nilono. Magalabo i Musa sabap siminangit TUHAN risilo.

¹¹Indagu i Musa ra TUHAN, “Kua kalo moonsoi pamakuan Muno raki'? Kua kalo masaga' Kou raki'? Kua taaki' Mu ra pinalansan raki' ngaangai' ulun ti?

¹²Kalo tininai' am kalo inanak ku ilo. Kua panusub Kou raki' magalung am magiba' risilo koson ra lalagang, buoi ru pangkiralanan mongoi ra tana' ondo' binantu' Muno ra kinamatuaan nilai?

¹³Ati kia paguyuman ku ra kual ondo' maukop ra ngaangai' ulun ti? Ilai' noyo, gino ayuk ilo mambutok am makitaak ra kual.

¹⁴Kalo makatanggang aku mansaan ra pinalansan ra ngaangai' ulun no; pinalansan ti maagat kaga' raki'!

¹⁵Amon ru koson ragitio pinamakuan Muno raki', pakaasi' no raki'; potoyo' aku noyo ra mataki' maa' raginio kalo boo mansaan aku ra kaimbalaan ti.”

¹⁶Indagu TUHAN ri Musa, “Timungo' tulu' ngoopor ngaulun ungkuyon ondo' urumaton am ondo' iniou ra tingganai ru ulun ru Israil. Ibito' ilo muma' Raki' giu' ra Kim Kuno, am susubo' ilo migor ra giu' no, giu' ra sapapa' muno.

¹⁷Tumuun Aku am mindagu rirun giu' ra intok raginio, am taakin Ku risilo santayaran intor ra kuasa' ondo' tinaakan Ku noyo rirun. Ra koson raginio, makapangindangan ilo rirun mansaan ra pinalansan ra ulun rati, am kalo boo misangulun kou mansaan raginio.

¹⁸Raino balai' ulun ru Israil, ‘Pangimpasau kau ra inan tayar ru susuab no, sabap makaakan kau ra kual. Norongog noyo ru TUHAN ra akau nambutok am minindagu ra matiakan kau kaga' ra kual, am ra baal min moonsoi poyo paat giu' ra pagun ru Misir. Raino manaak TUHAN ramuyun ra kual am musiti' kau mangakan ra kual no.

¹⁹Musiti' kau mangakan raginio sala' ka buoi rondo' kapoam ruo ngoorou, kapoam limo, kapoam mopor, kapoam ruo ngoopor ngoorou,

²⁰kaa' buoi sansila', saboi marualan kau am lua'-lua' sabap ra kual no. Baal raginio masauk sabap nangimpai kau ra TUHAN ondo' soroi ra tatanga' mino. Nambutok kau niayuk Riso ra minindagu ra akau kalo musiti' nangiruan ra Misir.’ ”

²¹Indagu i Musa ra TUHAN, “Raino maningganai aku ra 600,000 ngaulun. Ati kulaan Okou makaindagu ra manaak Kou risilo ra kual ondo' maukop buoi sansila'?

²²Maukop kia sapi' am domba simbaluyon koson mamasug risilo? Maukop kia ra ngaangai' papait giu' ra raat no risilo?”

²³Indagu TUHAN, “Makabalitan kia kuasa' Kuno? Makakito kou ra mataki' ru masauk kia kapoam kalo ragu Kuno!”

²⁴Ginio ra ingkual i Musa am pambala' ra ulun ru Israil ra atan ondo' rinagu ru TUHAN. Timungo' ri Musa tulu' ngoopor ngaulun tingganai am panusub risilo migor ra liput ru Kim ru TUHAN.

²⁵Tuun boo TUHAN ralalom ru gaun am indagu ri Musa. Inalap ru TUHAN santayaran intor ra kuasa' ondo' tinaakan No noyo ri Musa, am pataako' kuasa' no ra tulu' ngoopor ngaulun tingganai no. Paat ra Ambiluo ru TUHAN timinuun ra rasawat nilo, tumalimpuun ilo mampiau koson ra nabi kaa' kalo nabuoi.

²⁶Ruo intor ra tulu' ngoopor ngaulun tingganai no, iono i Ildad am i Midad, minayan giu' ra pangkiman am kalo minongoi ra Kim ru TUHAN. Giu' ra pangkiman no, timinuun Ambiluo ra rasawat nilo am ilo pana tumalimpuun mampiau koson ra nabi.

²⁷Sangulun buayoi miningkual ra nambala' ri Musa intor ra baal nasauk ri Ildad am i Midad.

²⁸Kopongo raginio i Josua anak ri Nun, ondo' nangindangan noyo ri Musa intor ra io mamulok, minindagu ri Musa, “Tuan, susubo' ilo mongkoror!”

²⁹Taam i Musa, “Mangkara' kou kia ra baal kutu? Malansan aku kaga' ra manaak TUHAN ra Ambiluo Nano ra ngaangai' ulun Nano, am mambaal risilo ngaangai' mampiau koson ra nabi!”

³⁰Kopongo raginio saguli' i Musa am tingganai-tingganai ru Israil no ra pangkiman.

³¹Pulali' ru TUHAN naparatong ra angin intor ra raat; angin no nagibit ra susuit tantarau ondo' nansiab ra magana' kaga', ra gana' kalo nasailan samito intor ra ralimbou ru tana'. Nansisiab susuit-susuit no giu' ra rasawat ru pangkiman am giu' ra liput no ra galur kukula' ngakilomito.[18]

³²Buoi ru orou raginio am buoi ru rondom, am niayuk orou ra siminunu' no, bambal ayuk ru ulun mamparakop ra susuit tantarau. Moonong ulun mamparakop kalo mailusan intor ra saribu ngakilogram susuit tantarau. Nanuug ilo ra susuit-susuit ondo' rinakop no giu' ra libung ru pangkiman.

³³Liliwa' lakat poyo masuang kual ru susuit tantarau, siminangit TUHAN ra ulun no am naparatong ra maruol risilo.

³⁴Intok no ininggalanan ra Kibrot-Taawa ondo' makaarati' ra “Kalabangan ru Moroot” sabap ra giu' no nampalabangan nilo ra ulun minatoi sabap moroot.

³⁵Intor ra giu' no minanding ulun no ra libung Gajirot, am nangkim boo ra intok raginio.