Read Timugon Murut UNTABAN 13 Bible Online

UNTABAN 13 - Timugon Murut bible

UNTABAN 13

¹Indagu TUHAN ri Musa,

²“Pilio' sangulun ra popolos ru tingganai intor ra moonong bansa' ru Israil, am susubo' ilo mansigo ra tana' ru Kanaan ondo' masaga' Kuno pataakon ra ulun ru Israil.”

³Sinugut ri Musa susuban no, am giu' boo ra tana' kaagisan Paran nanusub io ra tingganai ragitilo: [Bansa'] — [Tingganai] Rubin — Syamua anak ri Jakur Simion — Sapat anak ri Ori Jiuda — Kalib anak ri Jipuni Isakar — Jigal anak ri Jusup Ipraim — Gosia anak ri Nun Binjamin — Palti anak ri Rapu Jibulon — Gadiil anak ri Sodi Manasi — Gadi anak ri Susi Dan — Amiil anak ri Gimali Asyir — Situr anak ri Maikol Naptali — Nagbi anak ri Wopsi Gad — Guil anak ri Maki

¹⁶Ginilo noyo pansigo ondo' sinusub ri Musa koson lumiput ra tana' no. Binandingan ri Musa inggalan ri Gosia anak ri Nun nasauk ri Josua.

¹⁷Paat ra i Musa nanusub risilo mugar, pambilin io risilo, “Ongoi ra tampilon ralayo, ongoi tampilon ra rabugus ru tana' ru Kanaan, am ongoi boo ra libung kabuluran.

¹⁸Intutuno' toojo baal ru tana' no, ondo' lair ru masuang mamagun no kapoam sanganu, am ondo' lair ru maikang ilo kapoam malawo.

¹⁹Intutuno' toojo tana' no ru moonsoi kapoam kalo, am ondo' lair ru minayan mamagun no giu' ra pekan-pekan ondo' naukab kapoam giu' ra bandar-bandar ondo' makatimbok.

²⁰Intutuno' toojo tana' no ru malabung kapoam kalo, am ondo' lair ru masuang tataun ra giu' no kapoam kalo. Musiti' kau baani, am ibito' muli' kikinawa' intor ra tana' raginio.” Paat raginio, tumalimpuun noyo bulintok ru anggur.

²¹Ginio ra ongoi ilo ra tampilon ralayo am liniput tana' no, intor ra tana' kaagisan Jin tampilon ra rabugus saboi ra bandar Rigob, maar ra Ginting Gamat tampilon ra ralayo.

²²Pagulu minongoi ilo tampilon rabugus ru tana' no am nakasaboi ra bandar Gibron, intok inayanan ru bansa' ru Agiman, Sisai am Talmai, ngaangai' no papag ru maayo ulun ondo' sabiton ra Inak. Bandar Gibron no binaal ra tulu' ngambilor ra kalo poyo bandar Soan giu' ra Misir.

²³Kopongo raginio nakasaboi ulun-ulun pansigo no giu' ra Limayak Iskol.[23] Giu' no nanatas ilo sambulisang kawa' ru anggur ondo' maagat kaga', saboi musiti' tampuyungin ru ruo ngaulun ra rondo' tataun. Nagibit ilo niayuk ra kukula' ngaunor kawa' ru dalima' am kawa' ru ara.

²⁴Intok no ininggalanan ra Limayak Iskol, sabap ra sambulisang kawa' ru anggur ondo' tinatas ru ulun ru Israil ra giu' no.

²⁵Kopongo ulun-ulun pansigo no liminiput ra tana' no buoi apat ngoopor ngoorou, saguli' ilo

²⁶ri Musa, i Arun am ra ngaangai' ulun ru Israil giu' ra Kadis, giu' ra tana' kaagisan Paran. Nambala' ilo ra atan ondo' nakito nilo am napakito ra kikinawa' ondo' inibit nilo.

²⁷Indagu ilo ri Musa, “Liniput mai noyo tana' no am nakakito ra langkaya' am malabung tana' no; gitio noyo sanganu ra kikinawa' intor ra giu'.

²⁸Kaa' mamagun ru tana' no maikang toojo; bandar nilono mangaayo toojo am makatimbok. Mulu' poyo, nakito mai papag ru maayo ulun ra giu' no.

²⁹Minayan ulun ru Amalik ra tampilon rabugus ru tana' no; ulun ru Git, ulun ru Jibusi am ulun ru Amori minayan tampilon ra kabuluran; ulun ru Kanaan minayan tampilon ra nagas ru Raat Tanga' am giu' ra gawar ru Sungoi Jordan.”

³⁰Napalinos i Kalib ra guang ru ulun ondo' mambutok ri Musa, am indagu, “Musiti' takau bulunsaron am gaawon tana' no raino niayuk. Sama' ikang takau koson mapakala raginio.”

³¹Kaa' indagu ulun ra bokon ondo' liminiput ra tana' no nababaya' ri Kalib, “Kalo, kalo sama' ikang takau koson mamulunsar risilo. Mamagun no maikang poyo ka itakau.”

³²Ginio ra napatanou ilo ra tanou magabau ra gino ngai' ru ulun ru Israil intor ra tana' ondo' liniput nilono. Indagu ilo, “Tana' no kalo manangampos ra maukop am poyo ra tayar ru mamagun no pana. Moonong ulun ondo' nakito mai masawat toojo,

³³am nakakito akai ra maayo ulun, papag ri Inak ra giu'. Malimanan mai ra boborok koson ra gapu' am maaru' ginio noyo pangkaraan nilo ramon.”