Read Timugon Murut UNTABAN 19 Bible Online

UNTABAN 19 - Timugon Murut bible

UNTABAN 19

¹Nanusub TUHAN ri Musa am i Arun koson

²manaak ra aturan ragitio ra ulun ru Israil. Sanginan sapi' ruandu' ra malia' ondo' kalo najamaran am kalo igondo' pinakai ra mangandoi musiti' pataakon ri Musa am i Arun.

³Pataakon boo ri Musa am i Arun sapi' no ra Imam Iliajar. Sapi' no musiti' ibiton ra liwar ru pangkiman am simbaluyon ra saang ri Imam Iliajar.[30]

⁴Ra bubua' ru kalindu' nano boo, malap i Iliajar ra sanganu raraa' ru sapi' no, am patakison no boo ginio intulu' ra tampilon ru Kim ru TUHAN.

⁵Ngaangai' ru sapi' no, makaaya' kungkung, kual, raraa' am tinai' nano musiti' solobon giu' ra saang ru imam.

⁶Imam no pana musiti' mangalap ra sanganu tataun sidar, satanggayan Isop am rondo' tali malia', am papatiron boo ngaangai' no ra apui ondo' tatanga' monolob ra sapi' malia' no.

⁷Imam no musiti' mampupu' ra bayang nano am mariu', am io makaumpos ra pangkiman, kaa' magulayun io majamol saboi tumolop mato ru orou.

⁸Ulun ondo' monolob ra sapi' no musiti' mampupu' ra bayang nano am mariu', kaa' magulayun io majamol saboi tumolop mato ru orou.

⁹Mopongo raginio sangulun ondo' kalo majamol no musiti' mangumung ra kaau ru sapi' ra raitii' ni am pabantaan ginio giu' ra liwar ru pangkiman, giu' ra rondo' intok ondo' kalo majamol. Buliin kaau no ra giu' no maa' raginio mapakai ru ulun ru Israil ginio koson mampatampos ra timug tayar ru upacara pamasawan. Upacara raginio koson mamuso ra tula.

¹⁰Ulun ondo' nangumung ra kaau no musiti' mampupu' ra bayang nano, kaa' magulayun io majamol saboi ra tumolop mato ru orou. Aturan ragitio masauk ra sabuoi-buoi no ra ulun ru Israil am niayuk ulun bansa' ru bokon ondo' minayan risilo.

¹¹Osoi ondo' nangambong ra baangkai masauk ra majamol ra buoi tulu' ngoorou.

¹²Paat ra orou katalu am orou katulu', ulun no musiti' mangimpasau ra inan ra timug ru upacara, am bagu no mapasau io. Kaa' amon ru kalo mapasau io paat ra orou katalu am orou katulu', magulayun io majamol.

¹³Osoi ondo' nangambong ra baangkai am kalo nangimpasau ra inan magulayun majamol, sabap ra timug tayar ru upacara pamasawan kalo poyo pinawas riso. Napajamol ulun no ra Kim ru TUHAN, sabap ra raginio kalo boo karaan io ra ulun ri Aki Kapuuno'.

¹⁴Paat ra sasangulun matoi giu' ralalom ru rondo' kim, osoi ayuk nokosoroi giu' ra ralalom ru kim no, kapoam osoi ayuk mumpos ra ralalom no masauk ra majamol ra buoi tulu' ngoorou.

¹⁵Ngaangai' rarapu' ru timug am pagangan tana' ondo' kolondo' tataub giu' ralalom kim no masauk ra majamol.

¹⁶Moonong ulun ondo' nangambong ra baangkai ru ulun ondo' pinatoi, kapoam ondo' minatoi ayuk toojo giu' liwar ru baloi, masauk ra majamol ra buoi tulu' ngoorou. Koson niayuk ra ulun ondo' nangambong ra lobong kapoam bungul ru ulun minatoi.

¹⁷Tayar ru mapapasau ra ulun ondo' majamol no, sanganu kaau ru sapi' ruandu' malia' ondo' sinolob koson mangampun ra tula, moonsoi alapon. Kaau no musiti' pasubolon ra ralalom rondo' pagangan tana', am lingigin ra timug ondo' inalap intor ra timug ondo' tumilis.

¹⁸Tayar ru baal ondo' kasaa', iono paat mokoondo' ulun matoi giu' ralalom ru kim, sangulun ondo' kalo majamol no musiti' mangalap ra satanggayan Isop am pososopon ginio ra timug no, am patakison boo ginio ra kim am niayuk ngaangai' kuliamos am ra ulun ondo' soroi giu' ralalom ru kim. Tayar ru baal karuo, iono paat sasangulun nangambong ra baangkai, lobong kapoam bungul ru ulun minatoi, sangulun ondo' kalo majamol no musiti' mapatakis ra timug no ra ulun ondo' majamol ra ralan ondo' nogondo' niayuk.

¹⁹Ulun ondo' kalo majamol no musiti' mapatakis ra timug no ra ulun ondo' majamol, paat ra orou katalu am ra orou katulu'. Paat ra orou katulu', maampus upacara pamasawan ra ulun majamol no. Ulun no musiti' mampupu' ra bayang nano am mariu'. Intor ra paat tumolop mato ru orou masauk ulun no ra mapasau.

²⁰Osoi ondo' masauk ra majamol kaa' kalo mambaal ra upacara pamasawan ra inan, magulayun majamol sabap ra timug ru upacara pamasawan kalo poyo pinawas riso. Napajamol ulun no ra Kim ru TUHAN am kalo boo karaan ra ulun ri Aki Kapuuno'.

²¹Musiti' kau gumagaya' ra aturan ragitio ra sabuoi-buoi no. Ulun ondo' mapatakis ra timug tayar ru upacara pamasawan no musiti' mampupu' ra bayang nano. Osoi ondo' nangambong ra timug tayar ru upacara pamasawan no masauk ra majamol saboi tumolop mato ru orou.

²²Atan ayuk ondo' kinambong ru sangulun ondo' majamol masauk ra majamol, am ulun bokon ondo' nangambong no niayuk masauk ra majamol saboi tumolop mato ru orou.