Read Timugon Murut UNTABAN 20 Bible Online

UNTABAN 20 - Timugon Murut bible

UNTABAN 20

¹Paat ra sila' kasaa', ngaangai' ulun ru Israil nakasaboi giu' ra tana' kaagisan Jin, am ilo pana pangkim giu' ra Kadis. Giu' no pinatayan am nampalabangan ri Miriam.

²Rondo' paat raginio giu' ra intok pangkiman ru ulun ru Israil, kolondo' timug. Ginio ra timung ilo ra liput ri Musa am i Arun,

³liliwa' mambubutok, “Moonsoi poyo minatoi akai nababaya' ra pabukat-pabukat mai ra saang ru Kim ru TUHAN.

⁴Kua ibito' min akai mongoi ra tana' kaagisan ti? Masaga' kau kia ra matoi akai ragiti mababaya' ra bibiag tinambiag mai?

⁵Kua ibito' min akai miningkual intor ra Misir, am ongoi ra intok kaimbalaan ti ondo' kalo tinanaman ra atan-atan? Giti kolondo' gandum, kawa' ru ara, kawa' ru anggur kapoam kawa' ru dalima'. Timug inumon pana kolondo'!”

⁶Mininggalur i Musa am i Arun ra ulun no, am bigor ra kulobon ru Kim ru TUHAN. Kubu ilo, am sinda katulayan ru TUHAN pana simininda risilo.

⁷Indagu TUHAN ri Musa,

⁸“Alapo' jujuga' giu' ra Kaban Nabantuan no, okou am i Arun musiti' manimung ra ngaangai' ulun ru Israil. Giu' ra saang nilo ngaangai', indagu ra bulur batu ra giu' no, am mapasalula' boo batu no ra timug. Koon raginio noyo okou mapaingkual ra timug intor ra batu no tayar ru ulun ru Israil, maa' raginio ilo am bibiag tinambiag nilono makainum.”

⁹Alapo' ri Musa jujuga' no koson ra nanusuban ru TUHAN.

¹⁰Nanimung i Musa am i Arun ra ngaangai' ulun ru Israil giu' ra saang ru bulur batu no. Kon ri Musa, “Rongogo' min ulun giminuor kau ngai'! Musiti' kia ru mangingkual akai ra timug intor ra bulur batu ti ramuyun?”

¹¹Kakato' boo ri Musa jujuga' no am palambaa' induo ra bulur batu no. Miningkual timug bubuluak saboi ngaangai' ulun am bibiag tinambiag nilono nakainum.

¹²Kaa' nansawai TUHAN ri Musa am i Arun, am indagu, “Sabap ra kalo kula' kau mangintopot Raki' koson mapakito ra kuasa' Kuno ondo' matulai giu' ra saang ru ulun ru Israil, kalo matingganai min ulun no mongoi ra tana' ondo' binantu' Kuno risilo.”

¹³Kasaukan raginio nasauk giu' ra Miriba.[31] Giu' no nambubutok ulun ru Israil ra saang ru TUHAN, am giu' no niayuk nanulu' TUHAN ra kuasa' Nano ondo' matulai ra ulun no.

¹⁴Panusub boo i Musa ra ulun-ulun sinusub intor ra Kadis mongoi uma' ra raja' Idom. Indagu ulun-ulun sinusub no, “Akai ngaangai' intor ra bansa'-bansa' ru Israil ondo' lakat poyo makapabukatan rirun. Nakapandai kou ra kapaganan ondo' nakalumpa' ramon.

¹⁵Kinamatuaan maili minongoi giu' ra pagun ru Misir am nabuoi kaga' minayan ra giu'. Kinamatuaan maili am akai inimbolo' ru bansa' Misir,

¹⁶am nakiindangan akai boo ra TUHAN. Norongog ru TUHAN piau maili am nanusub ra rondo' malaikat koson maningganai ramon miningkual intor ra Misir. Raino giu' akai ra Kadis, rondo' bandar giu' ra balitan ru tana' muno.

¹⁷Iowo' akai no sumail ra tana' mutu. Akai am bibiag tinambiag maino kalo lumisang ra umo kapoam umo ru anggur muno. Kalo manginum akai ra timug intor ra tulubong muno. Marayus akai maya' ra ralan maayo[32] saboi ra akai makaingkual intor ra tana' muno.”

¹⁸Kaa' taam ulun ru Idom, “Kalo mangiou akai ramuyun mansail ra tana' maiti! Amon ru jumajal kau niayuk, bulunsaron mai akau.”

¹⁹Indagu ulun ru Israil, “Mansail akai ra ralan maayo ayuk. Amon ru manginum akai am bibiag tinambiag maino ra timug min, bayarin mai. Masaga' akai ayuk sumail.”

²⁰Indagu poyo ulun ru Idom, “Kalo iowon kau!” Ingkual ilo boo am saujor mangaikang koson mamulunsar ra ulun ru Israil.

²¹Sabap ra kalo mangiou ulun ru Idom ra ulun ru Israil mansail ra tana' nilono, minaya' ayuk kalalaat ulun ru Israil ra ralan bokon.

²²Ngaangai' ulun ru Israil nangiruan ra Kadis am nakasaboi giu' ra Gunung Gor,

²³giu' ra balitan ru tana' Idom. Giu' no minindagu TUHAN ri Musa am i Arun,

²⁴“Kalo mokoongoi i Arun giu' ra tana' ondo' binantu' Kuno ra ulun ru Israil. Matoi io sabap ra akau ruo kalo giminagaya' ra susuban Kuno giu' ra Miriba.

²⁵Ibito' i Arun am anak nano i Iliajar mongoi ra Gunung Gor.

²⁶Aluso' sukub ru imam ondo' binayang ri Arun am pabayango' sukub no ri Iliajar. Matoi i Arun ra intok raginio.”

²⁷Ginagaya' ri Musa susuban ru TUHAN. Nagaloi i Musa, i Arun am i Iliajar giu' ra Gunung Gor liliwa' inilayan ru ngaangai' ulun ru Israil.

²⁸I Musa pana nangalus ra sukub ri Arun am pabayango' no ri Iliajar. Giu' ra tampak ru gunung no i Arun minatoi, am i Musa am i Iliajar pana timinuun.

²⁹Ngaangai' ulun ru Israil nokorongog ra minatoi noyo i Arun, nangulir ilo riso buoi talu ngoopor ngoorou.