Read Timugon Murut UNTABAN 24 Bible Online

UNTABAN 24 - Timugon Murut bible

UNTABAN 24

¹Paat raginio nakapandai i Biliam ra masaga' TUHAN riso mambarakat ra ulun ru Israil. Ginio sabap ra kalo boo naguyum io ra tatandu'-tatandu' koson ra ondo' binaal nano ra kalo poyo raginio. Nagilong io ra tana' kaagisan,

²am nakakito ra ulun ru Israil nangkim ralalom pulalai sumugut ra bansa' ru sigagama'. Kinuasa' i Biliam ru Ambiluo ri Aki Kapuuno',

³am indagu ra ragu inala' ragitio, “Gitio noyo tanou ri Biliam anak ri Bior, ragu ru sangulun ondo' nakakito toojo,[38]

⁴sangulun ondo' riminongog ra ragu ri Aki Kapuuno'. Nakito ku pinaintalang intor ri Aki Kapuuno' Ondo' Maayo Kaga' Kuasa', liliwa' naaba', kaa' ra nasingkarat mato.

⁵Kim-kim ru Israil moonsoi toojo,

⁶koson ra barisan maawar ru puun kurma, kapoam koson ra taman giu' ra kiing ru sungoi; koson ra puun gaharu ondo' tinanom ru TUHAN, kapoam koson ra puun sidar giu' ra kiing ru timug.

⁷Makaalap ilo ra timug ru rasam ra luluab, am mantanom ra sampug giu' ra umo ondo' maukop ra timug. Raja' nilono maayo poyo intor ra Raja' Agag, am pamarintaan nano kalangkaan.

⁸Nagibit i Aki Kapuuno' risilo miningkual intor ra Misir; Nangayou Io ra tayar risilo koson ra sapi' masigo. Namuso ilo ra pantula', nomopol ra bungul nilo, am namandak ra panah nilo.

⁹Bansa' Israil koson ra singa' mapanggol ondo' tatanga' tumangus, paat ra mombolong, kolondo' sangulun pana baani mangkarat riso. Osoi ondo' mambarakat ra Israil no barakaton, am osoi ondo' magulas ra Israil no ulason.”

¹⁰Ra siminangit toojo, ginonggom ru Raja' Balak gonggom am indagu ri Biliam, “Nanusub aku rirun magulas ra pantula'-pantula' kuno, kaa' nambarakat kou poyo boo risilo saboi intalu.

¹¹Raino uli' noyo! Kabalu' pana nambantu' aku mambayar rirun, kaa' TUHAN kalo mangiou rirun mangapu ra bayaran muno.”

¹²Taam i Biliam, “Binalaan ku noyo ulun-ulun sinusub muno ra

¹³kabalu' pana mangani' kou raki' ra ngaangai' mas am pirok giu' ra istana muno, kalo makaanggal aku ra susuban ru TUHAN ra mambaal ra kasagaan kuno galama'. Mindagu aku ayuk ra atan ondo' sinusub ru TUHAN.”

¹⁴Indagu i Biliam ra Raja' Balak, “Raino masaga' aku muli' ra bansa' kuli. Kaa' ra kalo poyo mugar aku, polosoo' aku no mambala' rirun ra atan ondo' baalon ru ulun ru Israil ra bansa' muno ra orou tauli no.”

¹⁵Raguo' boo ri Biliam inala' ragitio, “Gitio noyo tanou ri Biliam anak ri Bior, ragu ru sangulun ondo' nakakito toojo,[39]

¹⁶sangulun ondo' riminongog ra bala' ri Aki Kapuuno', am nangapu ra kapandayan intor Riso Ondo' Masawat Kaga'; sangulun ondo' nakakito ra pinaintalang intor ri Aki Kapuuno' Ondo' Maayo Kaga' Kuasa' liliwa' naaba', kaa' ra nasingkarat mato.

¹⁷Nakakito aku ra orou matong, nakakito aku ra bansa' ru Israil. Intor ra bansa' no, matong sangulun raja', raja' no koson ra butitin mapaang kaga', ondo' sumalula' intor ra Israil. Mamuso io ra tingganai-tingganai ru Moab, am mamuso ra ngaangai' ulun ru Sit.[40]

¹⁸Manguasa' io ra pantula' nano giu' ra Idom, am mapasauk ra tana' nilono ra io tatangan, am marayus Israil masauk ra pamanang.

¹⁹Manginginjang bansa' ru Israil no risilo, am mamuso ra ngaangai' pantula' ondo' lakat poyo maayag.”

²⁰I Biliam pana nakakito ra ulun ru Amalik ralalom ru pinaintalang nano, am raguo' no inala' ragitio, “Amalik iono bansa' ondo' maikang kaga' ra gino ngai' ru ngaangai' bansa', kaa' pupus no mapuso bansa' raginio ra sabubuoi no.”

²¹Ralalom pinaintalang no nakakito niayuk i Biliam ra ulun ru Kini, am raguo' no inala' ragitio, “Intok ayanan muno mapiot toojo, maindon koson ra bunsut ru susuit giu' rasawat ru bulur batu,

²²kaa' mapuso ulun ru Kini, paat ra akau rokopon ru Asyur.”

²³I Biliam pana mindagu ra ragu inala' ragitio, “Osoi kia ulun ondo' timinimung giu' ra ralayo no?

²⁴Matong ulun-ulun mapajunjung no intor ra Siprus am napagaau ra Asyur am Gibir. Kaa' pupus no ilo pana mapuso ra sabuoi-buoi no.”

²⁵I Biliam pana timinampos koson muli' ra intok inayanan nano, am Raja' Balak pana minugar.