Read Timugon Murut UNTABAN 32 Bible Online

UNTABAN 32 - Timugon Murut bible

UNTABAN 32

¹Bansa' ru Rubin am bansa' ru Gad mokoondo' ra masuang bibiag tinambiag. Paat ilo nakakito ra mapara' bonsoi ru tana' Jaijir am Giliad ra intok panambiagan,

²minongoi ilo uma' ri Musa, i Iliajar am tingganai-tingganai ru Israil ra bokon. Indagu bansa' ru Rubin am bansa' ru Gad,

³“Bandar-bandar ondo' inayanan ru ulun takau ra indangan ru TUHAN, moonsoi kaga' ra panambiagan, iono bandar Atarot, Dibon, Jaijir, Nimra, Gisybon, Iliali, Sibam, Nibo am Bion. Sabap ra masuang toojo bibiag tinambiag maino,

⁵pataako' noyo ramon tana' raginio koson ra akai tatangan. Pai' akai susubo' sumandaup ra Sungoi Jordan am mayan ra giu' no.”

⁶Taam i Musa, “Masaga' kau kia mayan ragiti, am ondo' boo ulun rondo' bansa' ramuyun mongoi pangayou?

⁷Kua kinalawo min guang ru ulun ru Israil koson sumandaup ra Sungoi Jordan am mongoi ra tana' ondo' pataakon ru TUHAN risilo?

⁸Ginio noyo baal ondo' binaal ru ama' min giu' ra Kadis-Barnia paat ra aku nanusub risilo mongoi pansigo ra tana' no.

⁹Minongoi ilo saboi ra Limayak Iskol am nakakito ra tana' no. Kaa' pakasaguli' ilo, kinalawo nilo guang ru ulun ru Israil, saboi malaa' ulun ru Israil mongoi ra tana' ondo' pinataak ru TUHAN risilo.

¹⁰Paat ra orou raginio siminangit TUHAN am indagu,

¹¹‘Kalo gumagaya' ulun raginio Raki'. Ginio ra mampator Aku ra kolondo' sangulun pana ondo' miningkual intor ra Misir, ondo' umur no nasailan ruo ngoopor ngambilor mokoongoi ra pagun ondo' binantu' Kuno ri Abragam, i Isak am i Jakub.’

¹²Ngaangai' ulun natiu' ra ukuman no ondo' ayuk am i Kalib anak ri Jipuni ulun ru Kinas no am i Josua anak ri Nun, sabap ra ilo ruo giminagaya' ra TUHAN.

¹³Siminangit TUHAN ra ulun ru Israil am nambaal risilo timinanggau giu' ra tana' kaagisan buoi apat ngoopor ngambilor, saboi minatoi noyo ngaangai' papag ondo' giminuor ra TUHAN.

¹⁴Raino akau poyo masauk koson ra ama' mini, rondo' poyo sukor bagu ru ulun ondo' makatula. Maparatong kau poyo ra sangit ru TUHAN ra ulun ru Israil.

¹⁵Amon ru akau, bansa' ru Rubin am bansa' ru Gad kalo gumagaya' ra TUHAN raino, igondo' poyo TUHAN mangiruan ra ulun ru Israil ra tana' kaagisan ti, am akau noyo nangkinibit ra kapusaan nilono.”

¹⁶Minuma' bansa' ru Rubin am bansa' ru Gad ri Musa am indagu, “Pagulu iowo' noyo akai mambaal ra kandang makatimbok batu ra domba maino am bandar makatimbok ra anak andu' maino.

¹⁷Mopongo raginio tumampos akai maya' ra gino ngai' bansa' maino mongoi pangayou. Akai maningganai ra bulunsar raginio saboi makaindangan akai risilo mayan ra tana' ondo' masauk ra ilo tatangan. Liliwa' raginio anak andu' maino makaayan ragiti, ralalom ru bandar-bandar ondo' makatimbok am makapamayagan intor ra bulunsar ru mamagun ru pagun ti.

¹⁸Kalo muli' akai ra baloi ra kalo poyo ngaangai' ulun ru Israil makatana' koson ra tungkuson.

¹⁹Kalo mangalap akai ra koborok pana intor ra tana' giu' ra sandaup ru Sungoi Jordan, sabap ra nakaapu akai noyo ra tayar maino tampilon ra sirangon ru Sungoi Jordan.”

²⁰Taam i Musa, “Amon ru totopot kau manugut ra bantu' mino, tampos kano koson mangayou ra tayar ru TUHAN.

²¹Ngaangai' ru ulun mino ondo' makapangayou musiti' sumandaup ra Sungoi Jordan; sabap ra susuban ru TUHAN, musiti' bulunsaron nilo pantula' takau saboi makapangala TUHAN ra pantula',

²²am magaau tana' no. Mopongo raginio makauli' kau, sabap ra sinugut min noyo pinalansanan ramuyun ra TUHAN am ra gino ngai' bansa' min ulun ru Israil. Ginio ra mangiou TUHAN ra tana' tampilon ra sirangon ru Sungoi Jordan ti akau tatangan.

²³Kaa' amon ru kalo manugut kau ra bantu', karaa' ra makatula kau ra TUHAN. Sotopot no, ukumin kau sabap ra tula mino.

²⁴Ongoi kano pambaal ra bandar mino am kandang ru domba mino, kaa' suguto' noyo bantu' mino!”

²⁵Indagu ulun intor ra bansa' ru Gad am bansa' ru Rubin, “Gumagaya' akai ra susuban muno.

²⁶Anak andu' maino am niayuk sapi' am domba maino paayanon ragiti, ra bandar-bandar Giliad ti.

²⁷Kaa' nakatampos akai mangayou sabap ra susuban ru TUHAN. Sumandaup akai ra Sungoi Jordan am mangayou koson ra rinagu mu noyo.”

²⁸Ginio ra nanaak i Musa ra susuban ragitio ra Imam Iliajar, i Josua am tingganai-tingganai ru Israil ra bokon, kono,

²⁹“Amon ru ulun ru Gad am ulun ru Rubin sumandaup ra Sungoi Jordan am nakatampos mangayou sabap ra susuban ru TUHAN, am amon ru mabaya' ra indangan nilo, makasugut kau mampagaau ra tana' no, taaki' noyo risilo tana' Giliad koson ra tungkuson nilo.

³⁰Kaa' amon ru kalo sumandaup ilo ra Sungoi Jordan koson mangayou mabaya' ramuyun, makaapu ilo ayuk ra tayar ru tana' giu' ra Kanaan, nogondo' ramuyun.”

³¹Taam ulun intor ra bansa' ru Gad am bansa' ru Rubin, “Gumagaya' akai ra susuban ru TUHAN.

³²Sabap ra susuban ru TUHAN, sumandaup akai ra sungoi am mongoi ra tana' ru Kanaan. Mongoi akai pangayou maa' raginio tana' tampilon ra sirangon ru Sungoi Jordan ti magulayun akai tatangan.”

³³Kopongo raginio pataako' ri Musa ngaangai' wilayah ru Raja' Sigon, raja' ru ulun ru Amori no am niayuk wilayah ru Raja' Og, raja' ru pagun Basan, nakaaya' ngaangai' bandar am tana' ra libung no ra bansa' ru Gad am bansa' ru Rubin, am niayuk ra sampiruo bansa' ru Manasi.

³⁴Bansa' ru Gad nambaal saguli' ra bandar ondo' makatimbok: Dibon, Atarot, Aroir,

³⁵Atarot-Sopan, Jaijir, Jogbiga,

³⁶Bit-Nimra am Bit-Aran.

³⁷Bansa' ru Rubin nambaal saguli' ra bandar Gisybon, Iliali, Kiryataim,

³⁸Nibo, Baal-Mion (inggalan ragitio kinulau noyo) am Sibam. Ininggalanan bagu nilo bandar-bandar ondo' binaal saguli' no.

³⁹Bansa' ru Makgir anak ri Manasi namulunsar ra bandar Giliad am ayani' ginio. Pinagiru' nilo ulun ru Amori ondo' namagun ra giu' no.

⁴⁰Ginio ra nanaak i Musa ra tana' Giliad ra bansa' ru Makgir, am ayan ilo ra giu' no.

⁴¹I Jair, niayuk intor ra bansa' ru Manasi, namulunsar am minayan ra kukula' pekan, am inggalani' no ginilo ra “Pekan-Pekan Jair”.

⁴²I Noba namulunsar am minayan ra bandar Kinat am ngaangai' pekan ra libung no. Ininggalanan no bandar raginio ra Noba, sumugut ra inggalan nano galama'.