Read Timugon Murut UNTABAN 36 Bible Online

UNTABAN 36 - Timugon Murut bible

UNTABAN 36

¹Tingganai ru sasambaloi ru bansa' ru Giliad anak ri Makgir, iono akupu ri Manasi anak ri Jusup, minuma' ri Musa am tingganai-tingganai ra bokon.

²Konilo, “Nanusub noyo TUHAN rirun mantayar ra tana' ru Kanaan ra ulun ru Israil ra magundi'. Nanusub noyo TUHAN niayuk maa' raginio mangani' kou ra tungkuson ri Jilapiad, pabukat maino, ra anak-anak ruandu' nilo.

³Kaa' karaa' noyo, amon ru anak-anak ruandu' nano anduon ru ungkuyon intor ra bansa' ra bokon, tungkuson nilono longgom ru ulun ra bokon. Koson poyo raginio, mairuruan boo tana' wilayah ondo' inaru' ra tayar maino.

⁴Paat ra Bilor Papasagulian, paat ra ngaangai' rapu' ondo' tinalan noyo pasagulion ra tatangan galing no, tana' tungkuson ru anak-anak ruandu' ri Jilapiad no masauk ra tungkuson ru bansa' ru ulun ondo' naguot risilo. Koson poyo raginio bansa' maino matatakan ra tana' no.”

⁵Ginio ra nanaak i Musa ra ulun ru Israil ra susuban ru TUHAN ti. Indagu i Musa, “Atan ondo' rinagu ru bansa' ru Manasi no totopot noyo motopot.

⁶Gitio noyo susuban ru TUHAN: Guguang ru anak-anak ri Jilapiad no mangindalaki ra osoi pana, am ulun indalakion no intor ayuk poyo ra bansa' nilono galama'.

⁷Tungkuson ru moonong ulun ru Israil magulayun masauk ra tungkuson ru bansa' nano.

⁸Moonong ruandu' ondo' nakaapu noyo ra tungkuson intor ra bansa' nano, musiti' mangindalaki ra ungkuyon intor ra bansa' nano galama'. Ralan ragitio, moonong ulun ru Israil manungkus ra tana' tungkuson ru kinamatuaan nano,

⁹am tungkuson no kalo makabanding intor ra rondo' bansa' mongoi bansa' ra bokon. Moonong bansa' marayus manungkus ra tana' tungkuson no galama'.”

¹⁰Ginio ra anak-anak ruandu' ri Jilapiad iono i Mala, i Tirja, i Golga, i Milka am i Noa pana nambaal ra atan ondo' nanusuban ru TUHAN ri Musa. Nangindalaki ilo ra pantukir nilono galama'.

¹²Nangindalaki ilo ra ulun intor ra bansa' ru Manasi anak ri Jusup. Ginio ra, tana' tungkuson nilo nagulayun tinungkus ru bansa' ru ama' nilono.

¹³Ginio noyo ngaangai' inaru' am aturan ondo' tinaakan ru TUHAN ra ulun ru Israil ra pinasaboi galing ri Musa, paat ra ilo giu' ra tana' marata' ru Moab, giu' ra sandaup ru Sungoi Jordan, nantaluma' ra bandar Jiriko.