Read Timugon Murut UNTABAN 5 Bible Online

UNTABAN 5 - Timugon Murut bible

UNTABAN 5

¹Indagu TUHAN ri Musa,

²“Susubo' noyo ulun ru Israil mapaingkual ra ngaangai' ulun ragitio intor ra pangkiman: moonong ulun ondo' makamaruol ra kungkung ondo' maaja', kapoam maruol mologo, am niayuk moonong ulun majamol sabap ra nangambong ra baangkai.

³Susubo' noyo ngaangai' ulun ondo' majamol mingkual maa' raginio kalo majamalan nilo pangkiman, intok ayanan Kuno mabaya' ra ulun Kuno.”

⁴Sinugut ru ulun ru Israil susuban raginio, am paingkualo' boo ngaangai' ulun koson raginio intor ra pangkiman.

⁵Nangani' TUHAN ri Musa

⁶ra aturan ragitio ra ulun ru Israil. Paat ra sasangulun kalo gumagaya' ra TUHAN am mambaal ra sala ra ulun bokon,

⁷ulun no musiti' mangiou ra tula nano am mambayar ra kalubatan ra koyoon, ruangin ra ruo ngoopor piatus ra ulun ondo' nalubatan no.

⁸Kaa' amon ru ulun ra nalubatan no minatoi noyo am kolondo' pabukat ra mamaar ondo' mangapu ra bayaran ru kalubatan, bayaran no musiti' pataakon ra TUHAN am masauk ra imam tatangan. Pambayaran ra kalubatan no iono paruangon ra domba gawayan ondo' maindalom pataakon ra tayar ru upacara pamasawan ra ulun makasala.

⁹Koson niayuk ra moonong indangan luntukon ondo' pataakon ru ulun ru Israil ra TUHAN; indangan no masauk ra imam ondo' mangapu no tatangan.

¹⁰Atan ondo' pataakon ru sasangulun ra TUHAN, masauk ra ulun no galama' tatangan. Atan ondo' pataakon no ra imam ayuk, masauk ra imam no tatangan.

¹¹Nanusub TUHAN ri Musa

¹²ra manaak ra aturan ragitilo ra ulun ru Israil. Maaru' lair sangulun ungkuyon maingot ra andu' nano; manantam ralaki no ra kalo gumagaya' riso andu' nano am napalaat andu' no ra inan sabap ra nakimarulug ra ungkuyon ra bokon. Kaa' kalo naaruan ru ralaki no sabap ra baal raginio binaal ra sininok am kolondo' sasi', am kalo narampatan andu' nano; kapoam maaru' lair maingot sangulun ralaki, kabalu' pana magulayun andu' nano gumagaya' riso.

¹⁵Ralalom ru karuo-ruo baal raginio, ralaki no musiti' magibit ra andu' nano ra imam. Ralaki no musiti' magibit ra taak ondo' inaru': Sakilogram tapung barli, kaa' kalo linatakan ra umau jaitun kapoam kaminyan sabap ra taak no intor ra ralaki ondo' manantam, am pataakon ra mambala' ra baal ondo' motopot.

¹⁶Manusub imam ra ruandu' no jumalai am migor ra saang ru altar.

¹⁷Mapasasar imam ra timug mapasau ralalom rondo' mangkuk tana', am mapasubol koborok boo ra tana' intor ra sulig ru Kim ru TUHAN ralalom ru mangkuk no koson kapaiton timug no.

¹⁸Tulimbayon boo ru imam abuk ru ruandu' no, am pabantaan taak tapung ralalom kalindu' ru ruandu' no. Guuton ru imam no mangkuk ondo' makatimug mapait ondo' maparatong ra ulas.

¹⁹Imam no pana mampator am manusub ra ruandu' no mangiou. Mindagu imam ra, “Amon ru kalo liminapau kou, kalo matiu' kou ra ulas ondo' porotongon ru timug ti.

²⁰Kaa' amon ru liminapau kou,

²¹polosoon noyo TUHAN mapasauk ra inggalan muno rondo' ulas ra gino ngai' ru bansa' muno. Kumumpis tingkuangon muno am kumabung tinai' muno.

²²Timug ondo' maparatong ra ulas ti sumubol ralalom tinai' muno am mapakabung, am niayuk mapakumpis ra tingkuangon muno.” Ruandu' no musiti' tumaam ra, “Mangiou aku, polosoon noyo TUHAN mambaal raginio.”

²³Mopongo raginio imam musiti' manulis ra ulas no am luluon no ra timug mapait giu' ralalom ru mangkuk no.

²⁴Kalo poyo manusub imam no ra ruandu' no manginum ra timug ondo' maparatong ra maruol,

²⁵imam no musiti' mangalap ra taak tapung intor ra kalindu' ru ruandu' no, am potoroyon ginio koson pataakon ra TUHAN, am pabantaan ginio ra rasawat ru altar.

²⁶Mopongo raginio imam no musiti' mangalap ra sogonggom tapung no koson tatandu' ra ngaangai' no pataakon, am solobon ginio giu' rasawat ru altar. Pupus no, imam no musiti' manusub ra ruandu' no manginum ra timug no.

²⁷Amon ru liminapau noyo ruandu' no, mangkinibit timug no riso ra marualan kaga'; kumabung tinai' nano am kumumpis tingkuangon nano. Inggalan nano masauk ra ulas ra gino ngai' ru bansa' nano.

²⁸Kaa' amon ru kolondo' sala nano, kalo matiu' io ra ulas am lakat poyo makapaganak.

²⁹Ginio noyo aturan no paat sangulun ungkuyon maingot am manantam ra andu' nano ra liminapau noyo. Andu' no musiti' susubon migor ra saang ru altar am imam no musiti' mapaugar ra upacara raginio.

³¹Kolondo' sala ru ralaki no; amon ru makasala andu' no, musiti' io mansaan ra kinibit no.