Read Timugon Murut MIKA 1 Bible Online

MIKA 1 - Timugon Murut bible

MIKA 1

¹Paat ra pamarintaan ri Raja' Jotam, Raja' Agas am Raja' Gijkia koson ra raja' ru Jiuda, nangani' TUHAN ra tanou ragitio ri Mika, ondo' intor no bandar Morisyit. Nanulu' TUHAN ra ngaangai' baal ru Samaria am Jirusalim ri Mika.

²Rongog kano, akau ngaangai' bansa'; ilai' noyo, akau ngaangai' mamagun ru tana' ti! TUHAN Raja' masauk ra sasi' koson manguu' ramuyun ngai'. Rongog kano! Mindagu Io intor ra intok Nano ondo' matulai giu' ra suruga'.

³Mingkual TUHAN intor ra intok Nano ondo' matulai; Timinuun am minugar Io ra tampak ru gunung-gunung ra tana' ti.

⁴Ngaangai' gunung liminuu' ra ragana' ru kalayam Nano koson ra dian ralalom ru apui ondo' mapaang; tana' intor ra gunung lumuyu' mongoi ra limayak koson ra timug giu' ra rasawat ru bulur tumilis mongoi ra ragana'.

⁵Ngaangai' baal no masauk sabap ra ulun ru Israil makatula noyo am giminuor ri Aki Kapuuno'. Osoi nua' pinalansan ra guor ru Israil? Samaria, pusor ru bandar nano galama'! Osoi nua' pinalansan ondo' sumamba ra sinungkalalaing giu' ra Jiuda? Jirusalim!

⁶Ginio ra mindagu TUHAN, “Saukon Ku Samaria ra tuntur ru natuyas giu' ra padang, am intok ru ulun mantanom ra puun ru anggur. Mamatir Aku ra batu natuyas ru bandar no mongoi ra limayak, am makito boo puun ru bandar no.

⁷Pusoon Ku ngaangai' sinungkalalaing no, am moonong kuliamos ondo' longgom ru ulun mantalan ra inan giu' ra kuil pusoon ralalom ru apui. Ngaangai' sinungkalalaing nano masauk ra ginsamol. Naalapan ru Samaria ra ngaangai' kuliamos no koson ampos ru sumamba ra dewa kalabungan; raino pantula' nano piboo nagibit ra kuliamos-kuliamos no koson taakin ra ulun-ulun mantalan ra inan giu' ra kuil ru bokon.”

⁸Indagu boo i Mika, “Ginio ra mangulir aku am mantangi'. Koson mampakito ra kangilukan ru guang kuno, mugar aku ra mantilagas am kolondo' kasut. Mampaung aku koson ra taani am mompoloong koson susuit unta.

⁹Pilat ru Samaria kalo mapali', am Jiuda mataki' malumpa' ru kaimbalaan ondo' nogondo'. Kapusaan nakasuku' noyo ra kulobon garabang ru Jirusalim, intok namagunan ru bansa' kuno.”

¹⁰Pai' pambala' ra pantula' giu' ra Gat ra itakau naala. Pai' polosoo' ilo magilong ritakau mantangi'. Mamagun ru Bit-Li-Apra kau ngai',[1] pagiluir kano ralalom ru kaau koson tatandu' malumpus guang.

¹¹Mamagun ru Sapir kau ngai', ongoi no ra pagun namatiran ra magibaang am mauyu'. Mamagun ru Jaanan kalo baani mongoi ra liwar ru bandar. Paat ra akau nakaining ra mamagun ru Bit-Gaijil mantangi', makapandai kau ra kolondo' intok sindungan ra giu' no.

¹²Mamagun ru Marot malaa' paat maginaa ra ulun mongoi pangindangan, sabap karaat ondo' pinaratong ru TUHAN mamaar noyo ra Jirusalim.

¹³Mamagun ru Lakgis, paatango' noyo kuda ra kurita' ru kuda. Tumilu ra tula ru ulun giu' ra Israil, mangkinibit kau ra ulun ru Jirusalim makatula.

¹⁴Raino mamagun ru Jiuda kau ngai', balai' noyo ra ugaran mino koson mangiruan ra bandar Morisyit-Gat. Raja'-raja' ru Israil kalo makaalap ra indangan intor ra bandar Akjib.

¹⁵Mamagun ru Marisya kau ngai', pataakon kau ru TUHAN ra pantula' ondo' gumaau ra bandar mino. Ilo tingganai ru Israil ondo' makakuasa' mongoi pansibuni ra ralalom ru luang batu ra giu' ru Adulam.

¹⁶Mamagun ru Jiuda kau ngai', lomporo' noyo abuk mino koson tatandu' mangulir ra lalaing-lalaing katagaman mino. Lingono' min buluti' abuk, sabap ra ngaangai' anak min patirin intor ra pagun.