Read Timugon Murut NAGUM 1 Bible Online

NAGUM 1 - Timugon Murut bible

NAGUM 1

¹Gitio noyo tanou intor ri Aki Kapuuno' intor ra bandar Niniwi. Tanou ti pinabala' ralalom pinaintalang ri Nagum, sangulun nabi intor ra Ilkos.

²TUHAN i Aki Kapuuno' kalo masaga' ra mokoondo' pagilou, ulun ondo' manggal Riso maaru' makaalap ra ukuman. Ra sumangit kaga', mansuli' Io ra pantula' Nano.

³TUHAN kalo mataki' sumangit, kaa' Io makakuasa', am kalo igondo' Io nampalabus ra ulun ondo' nambaal ra kasalaan intor ra ukuman. Giu' ra intok ugaran ru TUHAN, sumalula' puting beliung am taupan; gaun iono kaau intor ra kalayam Nano.

⁴Ra susuban Nano, raat malasak; sungoi pana lasakin. Padang-padang giu' ra Basan mapua', Gunung Karmil pana mapua', am lumonot boo bunga'-bunga' giu' ra Libanon.

⁵Gunung-gunung muyog giu' ra saang ru TUHAN; bulur-bulur lumuu' ra saang Nano. Tana' ti mogonggon paat ra TUHAN matong; tana' ti am ngaangai' ru mamagun nano monontol.

⁶Osoi kia tumaan paat ra TUHAN sumangit? Kolondo' osoi pana makalabus intor ra sangit Nano. Paabuson No sangit Nano ondo' bibilak, saboi batu maumok am masauk ra kaau giu' ra saang Nano.

⁷TUHAN no moonsoi; manindung Io ra ulun Nano paat ra ilo mapagon, magalung Io ra ulun ondo' sumindung Riso.

⁸Pusoon No ngaangai' pantula' Nano,[1] Io koson ra liur maayo ondo' nakalumpa' risilo. Binutus No painawo ru ulun ondo' manggal ra kasagaan Nano.

⁹Kalaatan ra atan kia ondo' inatang min ra TUHAN? Mamuso Io ramuyun ngaangai'. Io kalo pana mansuli'[2] saboi induo ra pantula' Nano.[3]

¹⁰Akau magauk solobon koson ra rami ondo' mapua', koson ra bulungkut makaruui ondo' nanririlit.[4]

¹¹Intor rirun, okou Niniwi, siminalula' noyo sangulun ondo' nototop ra inatangan malaat. Nangatang io koson manggal ra TUHAN.

¹²Gitio noyo ragu ru TUHAN ra ulun Nano, “Kabalu' pana ulun ru Asyur maikang am masuang, pusoon ilo am lumiot. Akau ulun Kuno, kabalu' pana nangkinibit Aku noyo ramuyun naimbolo', kalo boo baalon Ku ginio.

¹³Raino pupusin Ku kuasa' ru Asyur ramuyun, am ukaton Ku rantai ondo' nakabangkil ramuyun.”

¹⁴Gitio noyo ondo' inaru' ru TUHAN intor ra Asyur, “Kolondo' ilo ra papag koson mamparayus ra bansa' nilo. Tutukon Ku sinungkalalaing ondo' giu' ralalom ru kuil-kuil ru dewa nilo. Tatanga' Ku baalon kalalair lobong ra tayar ru ulun ru Asyur, kalo maaya' ilo maayag!”

¹⁵Ilai', sangulun sinusub matong mansail ra gunung-gunung koson mampasaboi ra tanou moonsoi. Matong io koson mampatanou ra kamanangan! Mamagun kau ngai' ru Jiuda, pangiantak kano ra pangiantakan min am suguto' noyo nazar ondo' binantu' min ri Aki Kapuuno'. Ulun malaat totopot kalo boo mamulunsar ra pagun min. Pinuso ilo noyo ra malingon.