Read Timugon Murut ABAKUK 3 Bible Online

ABAKUK 3 - Timugon Murut bible

ABAKUK 3

¹Gitio noyo pakiasian ri Nabi Abakuk:[7]

²Iou TUHAN, nokorongog aku no ra intor ra binaal Muno, guang kuno natikop ra imuag. Gama' ru baalon Mu poyo binaal Muno ondo' makaimuag ra paat maiti. Pakaasi' no ramon kabalu' pana sumangit Kou.

³Matong Kou poyo intor ra Idom;[8] Okou i Aki Kapuuno' ondo' matulai matong intor ra Kabuluran Paran. Katulayan Muno nakatikop ra limbowon; tana' ti natikop ra pangamparan Rirun.

⁴Matong Kou am makapiniat koson ra ganit; sinda mapaang intor ra kalindu' Muno, ra giu' noyo kuasa' Muno pasibunion.

⁵Nanusub Kou ra maruol magulu Rirun am nanusub ra kapatayan sumunu' Rirun.

⁶Paat ra Okou lumonggo', muyog tana' ti; paat ra Okou magilong, bansa'-bansa' songongonsol. Gunung-gunung ondo' lair noyo soroi natutuk kalingon; bulur-bulur ondo' nagulayun soroi pana liminonson, bulur-bulur intok Muno mugar intor noyo ra galing.

⁷Nakito ku ulun ru Kusian malaa', am ulun ru Midian monontol.

⁸Sungoi kia nangkinibit Rirun siminangit, iou TUHAN? Raat kia nangkinibit Rirun siminangit? Sinakayan Mu gaun am siminakoi ra gaun ru rasam maawas, paat ra Okou matong koson mangani' ra kamanangan ra ulun Muno.

⁹Nakatampos Kou noyo mamakai ra tanggayan ru panah Muno, nakatampos koson mampalabus ra anak panah Muno. Tana' ti lumata' am sungoi tumilis.

¹⁰Paat ra gunung-gunung makakito Rirun, ngaangai' no muyog; rasam rumatu' intor ra limbowon. Timug giu' ra ragana' ru tana' mompongoos am kinulun nano lumapos.

¹¹Paat ra panah Muno ondo' maribok manguliat, am tanggulan ondo' suminda ra manguliat, mato ru orou am sila' lumonggo' minsir.

¹²Ralalom ru sangit lumiput Kou ra tana' ti; ralalom ru sangit manginjang Kou ra bansa'-bansa'.

¹³Miningkual Kou koson mamayag ra ulun Muno, koson mamayag ra raja' pinili' Muno. Namparatu' Kou ra tingganai ru ulun malaat, am namuso ra ngaangai' maamaya' nano.

¹⁴Anak panah Muno nansabut ra panglima saujor nano, paat ra saujor nano matong koson ra bagiu' koson mangkinibit ramon magiru' ra mantutuliar. Maansayan ilo koson ra ulun ondo' simininok mangimbolo' ra ulun musikin.

¹⁵Kikinjangin Mu raat ra kuda Muno, am timug ru raat ondo' lumapos manamputa'.

¹⁶Norongog Ku ngaangai' no am monontol aku; bibil kuno monontol sabap ra malaa' aku. Inan kuno malawo kalo maikang, kalayam kuno nakasaru[9] paat ra mugar. Maginaa aku ra guang mororo' paat raginio Okou mangukum ra ulun ondo' mamulunsar ritakau.

¹⁷Kabalu' pana puun ru ara kalo nambusak, am puun ru anggur kalo nangkawa', kabalu' pana ampos ru puun jaitun makangiluk ra guang, am umo ru gandum makasinduol ra guang, kabalu' pana ngaangai' domba matoi, am kandang ru sapi' kolondo' suang no,

¹⁸masalok aku maansayan am maansukan, sabap ra Okou TUHAN i Aki Kapuuno' mamayag raki'.

¹⁹Okou noyo TUHAN Raja' ondo' nangani' raki' ra kaikangan, koson ra kalayam ru tambang, kalayam kuno kinaikang Mu, am pamayagan kuno inalungan Mu giu' ra kagunungan.