Read Timugon Murut JIPANYA 2 Bible Online

JIPANYA 2 - Timugon Murut bible

JIPANYA 2

¹Akau bansa' ondo' kalo mapandai mauyu', pakaliman kano

²ra akau kalo poyo pagiruon koson ra apol ondo' siobon ru angin. Pakaliman kano ra kalo poyo makasaboi orou sangitan ru TUHAN, am ra akau kalo poyo malumpa' ra sangit ru TUHAN ondo' bibilak.

³Saguli' no ra TUHAN, akau ngaangai' ulun ondo' gumagaya' ra susuban Nano. Baalo' noyo atan ondo' kasagaan ru TUHAN, am painggana' guang mino giu' ra saang Nano. Maaru' lair akau makalabus intor ra ukuman paat ra orou ru TUHAN mampakito ra sangit Nano.

⁴Kolondo' boo osoi pana ondo' mayan giu' ra bandar Gaja. Bandar Askilon iruanin. Mamagun ru Asdod pagiruon ralalom sampiruo orou,[4] am mamagun ru Ikron pagiruon intor ra bandar nilo.

⁵Aibui boo ramuyun, akau ulun ru Palistin, bansa' ondo' minayan giu' ra nagas. Inaru' noyo ru TUHAN ukuman ramuyun. Mamuso Io ramuyun, am kolondo' sangulun pana maayag.

⁶Tana' min giu' ra kiing ru raat masauk ra padang sakot; kalukub-kalukub ru magagalung am kandang ru domba baalon ra giu'.

⁷Mamagun ru Jiuda ondo' maayag mayan ra tana' min. Alungin nilo bibiag tinambiag ra giu' no, am paat ra rondom ti mombolong ilo giu' ra baloi-baloi giu' ra bandar Askilon. TUHAN, i Aki Kapuuno' nilo mabaya' risilo am mampasauk risilo langkaya' saguli'.

⁸ TUHAN Ondo' Maayo Kaga' Kuasa' mindagu, “Nokorongog Aku noyo ra bansa' ru Moab am Amon nagasab am nangiis ra ulun Kuno. Masawat ragu nilo sabap ra ginaau nilo tana' ru ulun Kuno.

⁹Sabap ra Aku TUHAN ondo' maayag, i Aki Kapuuno' ondo' sambaan ru Israil, magibot Aku ra Moab am Amon pusoon koson ra Sodom am Gomora. Pagun-pagun no mososok ra tulubong ru usi' am sabubuoi no masauk ra nalunsai ondo' mantilayun ondo' tuwin ru bulungkut-bulungkut makaruui. Ulun Kuno ondo' naayag mampagaau ra rapu' ru mamagun ru pagun-pagun no am mampagaau ra tana' nilo.”

¹⁰Koson raginio noyo mamagun ru Moab am Amon ukumin sabap ra kinalimbau am minsawat guang nilo, am niayuk sabap ra nagasaban nilo ra ulun ru TUHAN Ondo' Maayo Kaga' Kuasa'.

¹¹TUHAN mangkinibit risilo malaa' kaga'. Tutukon No dewa-dewa ra tana' ti. Mopongo raginio ngaangai' bansa' sumambayang ra TUHAN, sigagama' giu' ra pagun galama'.

¹² TUHAN niayuk mangukum ra matoi ra mamagun ru Itiopia.

¹³Mopongo raginio pakayon ru TUHAN kuasa' Nano koson manutuk ra Asyur. Bandar Niniwi saukon ra intok ondo' masiluk kaga' am tana' kaagisan ondo' mapua'.

¹⁴Giu' no bibiag tinambiag am ngaangai' salinut ru bibiag magupu'. Susuit puok manabunsut giu' ra intok nalunsai no am manimpakaak intor ra gigimpalan. Susuit bangkaak[5] manimpakaak giu' ra lugu' ru kulobon. Tataun sidar ra baloi-baloi ru bandar no koyoon iruo'.

¹⁵Ginio noyo ondo' masauk ra bandar ondo' noloos maansukan am ondo' mangkara' ra inan nano makakaansayan. Mamagun nano mangkara' ra bandar nilo noyo bandar ondo' maayo kaga' ra tana' ti. Mapara' siluk no ru libung no, kolondo' ulun minayan ra intok no ondo' ayuk am bibiag ru kataunan ondo' makabunsut ra giu' no! Moonong ulun ondo' mansail giu' ra bandar no magasab riso am makaliman ra malaa'.