Read Timugon Murut JIPANYA 3 Bible Online

JIPANYA 3 - Timugon Murut bible

JIPANYA 3

¹Aibui boo ra Jirusalim, bandar malaat ondo' masaga' gumuor ra TUHAN am ondo' mangimbolo' ra mamagun nano galama'.

²Bandar no kalo mampalio ra bilin ru TUHAN, am kalo noyo boo mangapu ra pangilaan Nano. Bandar no kalo malansan ra TUHAN am kalo makiindangan Riso.

³Tingganai-tingganai ru bandar no koson ra singa' ondo' mansasangal. Akim-akim no koson ra taani maitilan ondo' masuung kaga' saboi saputul bungul pana kolondo' ondo' natatang koson ra suabon no.

⁴Nabi-nabi ru bandar no kalo malansanan am kalo maintopot; imam-imam nampajamol ra atan ondo' pakayon ra tayar ru TUHAN ayuk am napatimpurok ra ukum ri Aki Kapuuno' koson ra kaatangan nilo galama'.

⁵Kaa' TUHAN lakat poyo giu' ra bandar no. Magail Io mambaal ra motopot am kalo igondo' nambaal ra ondo' sala. Moonong susuab ti maaru' mangani' Io ra katimpakan ra ulun Nano. Kaa' ulun ondo' kalo makaulig ra katimpakan giu' ra bandar no magulayun mambaal ra malaat ra kalo makaulig ra mauyu'.

⁶Indagu TUHAN, “Nampaluus Aku noyo ra masuang bansa'; nanutuk Aku ra bandar-bandar nilo, am nampasauk ra timbok am niayuk manara-manara nilono ra nalunsai. Bandar-bandar nilo masiluk kolondo' ulun namagun am ralan-ralan pana masiluk; kolondo' boo ulun minayan ra giu' no.

⁷Mangkara' Aku, ‘Raino maaru' ulun Kuno mangurumat Raki' am mangapu ra pangilaan Kuno. Maaru' masalok ilo mangkara'[6] ra pangilaan ondo' pinataak Ku risilo.’ Kaa' ilain ra giminaai ilo poyo nambaal ra malaat intor ra buoi ti.”

⁸Indagu TUHAN, “Kaa' ilai' min! Inaani' ayuk orou ra Aku kumakat koson ra sasi' koson manguu' ra bansa'-bansa'. Namatas Aku noyo koson manimung ra bansa'-bansa' am pamarintaan-pamarintaan maa' raginio makalumpa' Ku sangit Kuno risilo. Titikop ru tana' ti pusoon ra apui ru sangit Kuno.

⁹Kaa' malupus raginio kulawon Ku guang ru bansa'-bansa' no, saboi makiasi' ilo Raki' ayuk am sala' ka tuhan-tuhan ra bokon. Ngaangai' bansa' no gumagaya' Raki'.

¹⁰Kaa' niayuk intor ra Itiopia[7] ondo' maalur, ulun Kuno ondo' nantutuliar no matong am mampataak ra taak simbalui Raki'.

¹¹Paat raginio, akau ulun Kuno, kalo boo pana mauyu' kau sabap giminuor kano Raki'. Impayin Ku moonong ulun malilimbau am minsawat ragu; akau kalo boo gumuor Raki' giu' ra bulur Kuno ondo' matulai.[8]

¹²Ulun ondo' asabin am ondo' minggana' guang polosoon Ku mayan ra giu' no. Matong ilo makiindangan Raki'.

¹³Ulun ru Israil ondo' maayag kalo lumaat ra osoi pana; kalo magabau ilo am kalo mamparuung. Lumangkaya' ilo am makakaansayan; kalo malaa' ilo ra osoi pana.”

¹⁴Akau ulun ru Israil, pakaansuk kano am parimbai! Akau mamagun ru Jirusalim, pakaansuk kano ra totopot ru guang!

¹⁵Linanggaan noyo ru TUHAN mangukum ramuyun; Pinagiru' No ngaangai' pantula' min. TUHAN, raja' ru Israil, mabaya' ramuyun, kolondo' boo ondo' mampakalalaa' ramuyun.

¹⁶Masaboi paat no ra ulun mindagu ra Jirusalim, “Okou Bulur Sion, pai' kalaa' am pai' kalawo guang.

¹⁷TUHAN, i Aki Kapuuno' min mabaya' ramuyun; namanang kau sabap ra kuasa' Nano. Naansukan TUHAN am naansayan sabap akau; nangani' Io ramuyun ra kaayagan bagu[9] sabap ra motogom Io ramuyun. Napabansuk kau ra guang Nano, am Io pana marimbai ra maansukan,

¹⁸koson ra ulun ondo' tatanga' munsag.” Indagu TUHAN, “Kalo boo polosoon Takamin malumpa' ru karaat; kalo boo polosoon Takamin asabin.

¹⁹Masaboi paat no; ukumin Ku ulun nangimbolo' ramuyun. Bayagon Ku ulun kimpo', am ibiton muli' ulun ondo' pinatiran. Mangkinibit Aku ra ulun mangurumat risilo, saboi giu' ra titikop ru tana', kalo boo asabin ilo.

²⁰Masaboi paat no; ibiton Ku muli' ulun ondo' nantutuliar; pasaukon Takamin ra mauligan kaga' giu' ra titikop ru tana', am pasaukon kau ra langkaya' igondo' poyo.” TUHAN nakaindagu noyo.