Read Timugon Murut JAKARIA 10 Bible Online

JAKARIA 10 - Timugon Murut bible

JAKARIA 10

¹Pakitaak ra TUHAN mamparatu' ra rasam bulintok mambusak. TUHAN noyo ondo' mamparatong ra gaun majuut am rumasam saboi umo-umo sumansam ra tayar ru moonong ulun.

²Mangkuot ulun ra sinungkalalaing am ulun mapandai kaga' mangilong, kaa' taam ondo' inapu nilo abau ayuk am ragu kolondo' onong. Mokoondo' ulun ondo' mampaarati' ra inupi, kaa' ragu pinaarati' nilo mampalayau ayuk ramuyun. Simayo ondo' tinaakan nilo pana kolondo' onong. Ginio ra mamagun saugar-ugar koson ra domba ondo' nakalayau. Soroi ilo ralalom kapaganan sabap kolondo' tingganai.

³Indagu TUHAN, “Sumangit Aku ra ulun bansa' ra bokon ondo' mamarinta ra ulun Kuno. Ukumin Ku ilo. Mamagun ru Jiuda longgom Kuno, am Aku, TUHAN Ondo' Maayo Kaga' Kuasa' magalung risilo. Masauk ilo ra kuda ru mangayou Kuno ondo' maikang.

⁴Mampili' Aku ra ulun manguasa', tingganai am panglima intor ra ilo po ngai' koson mamarinta ra ulun Kuno.[12]

⁵Mamagun ru Jiuda mamanang koson ra saujor ondo' manginjang-injang ra pantula' ralalom ru losok giu' ra ralan. Mangayou ilo sabap ra TUHAN mabaya' risilo. Kalaan nilo pantula' ondo' mangura' ra kuda.

⁶Kaikangon Ku mamagun ru Jiuda; mamayag Aku ra mamagun ru Israil. Makaasi' Aku risilo am magibit risilo ngaangai' muli'. Pamakuan Kuno risilo ilain koson ayuk ra ilo kalo igondo' Ku impayi'. Aku noyo TUHAN, i Aki Kapuuno' nilo; iowon Ku pakiasian nilo.

⁷Mamagun ru Israil masauk ra maikang koson ra ulun tutumula', am maansukan koson ra ulun ondo' nanginum ra wain. Papag nilo mangkara' ra kamanangan ti, am maansukan sabap ra binaal ru TUHAN.

⁸Piawon Ku ulun Kuno, timungon Ku ilo. Bayagon Ku ilo, am ilo kasuangon koson ragili.

⁹Kabalu' pana pinantutuliar Ku ilo ra gino ngai' ru bansa', kaa' giu' ra intok maalur makakara' ilo Raki'. Ilo am anak-anak nilo maayag am mababaya' muli'.

¹⁰Intor ra Misir am Asyur, ibiton Ku ilo muli', am mampaayan risilo giu' ra pagun nilo galama'. Paayanon Ku ilo giu' ra Giliad am giu' ra Libanon; titikop ru pagun no nososok ra mamagun.

¹¹Paat ra ilo lumaup ra raat ru kapaganan, Aku, TUHAN mampalamba' ra kinulun ondo' mangimbolo', saboi Sungoi Nil pana mapua' kalingon. Ulun ru Asyur ondo' lumimbau mampainggana' ra guang, am Misir ondo' maikang kaga' matatakan ra kuasa'.

¹²Kaikangon Ku ulun Kuno; sumambayang ilo am gumagaya' Raki'.” TUHAN nakaindagu noyo.