Read Timugon Murut JAKARIA 14 Bible Online

JAKARIA 14 - Timugon Murut bible

JAKARIA 14

¹Mamaar masaboi paat ra TUHAN mimbuor koson ra akim. Paat raginio Jirusalim takawin ru ulun, am kuliamos tokowon no tatayaron ra talupak ru mato nilo galama'.

²Timungon ru TUHAN ngaangai' bansa' koson mangayou ra Jirusalim. Bandar no gaawon, baloi-baloi nano takawin am ruandu'-ruandu' nano sowoon. Sampiruo ra mamagun nano patirin ra pagun, kaa' ondo' bokon no kalo pabandingon intor ra bandar no.

³Kopongo raginio bagu no TUHAN mamulunsar ra bansa'-bansa' no koson ra galing i.

⁴Paat raginio, migor Io giu' ra Bulur Jaitun giu' ra tampilon sirangon ru Jirusalim. Kopongo raginio Bulur Jaitun malapak kapiruo ru limayak ondo' malangka', tumalimpuun intor ra sirangon saboi ra kalasaan. Sampiruo ra bulur no minsir mongoi ra tampilon ralayo am sampiruo poyo mongoi ra tampilon rabugus.

⁵Magiru' kau mansail ra limayak ondo' nampalapak ra bulur no. Magiru' kau koson ra kinamatuaan min ragili paat nasauk tana' mogonggon bulintok ra pamarintaan ri Ujia, raja' ru Jiuda. TUHAN, i Aki Kapuuno' kuno matong mababaya' ra ngaangai' malaikat Nano.

⁶Paat raginio, kolondo' boo bulintok masimu' am kolondo' bolobou ondo' kumotog,

⁷kapoam kalandaman. Orou matawang ayuk, am niayuk paat ra rondom ti. TUHAN ayuk makapandai ra paat nano masauk.

⁸Paat orou raginio, timug ondo' mangani' ra kaayagan tumilis intor ra Jirusalim; sampiruo intor ra timug no tumilis mongoi ra Raat Matoi, am sampiruo poyo tumilis ayuk buoi ru bilor, bulintok tampio am niayuk bulintok rumasam.

⁹TUHAN pana masauk boo ra raja' ru titikop ru tana' ti. Moonong ulun sumamba Riso koson ri Aki Kapuuno' am makaulig Riso ra nogondo' inggalan.

¹⁰Tana' giu' ra titikop ru pagun, intor ra bandar Giba giu' ra ralayo saboi ra Rimon giu' ra rabugus, masauk ra mabanis. Jirusalim sumawat toojo, masawat poyo intor ra tana' giu' ra libung nano; kinalangka' ru bandar no intor ra Kulobon Garabang Binjamin saboi ra Kulobon Garabang Pisuk, iono intok ru kulobon garabang ragili, am intor ra Manara Gananil saboi ra intok pamagaan ra kawa' ru anggur longgom ru raja'.

¹¹Mamagun mayan ra giu' ra maayag, kalo boo lolobon ru kapusaan.

¹²Porotongon ru TUHAN maruol ondo' makalalaa' ra ngaangai' bansa' ondo' mangayou ra Jirusalim. Mato am rila' nilo, mulu' poyo ngaangai' inan nilo mootong liliwa' ilo lakat poyo maayag.

¹³Paat raginio TUHAN mambaal risilo maubong kaga' am malaa' kaga' saboi moonong ulun mamulunsar am mamparakop ra ulun ra sapapa' nano.

¹⁴Mamagun ru Jiuda mangayou koson manaung ra Jirusalim. Gaawon nilo rapu' ru ngaangai' bansa' — mas, pirok am bayang ondo' masuang kaga'.

¹⁵Rondo' maruol ondo' masaran niayuk makalumpa' ra kuda, baghal, unta am kaladai, am niayuk ngaangai' bibiag giu' ra intok nangkiman ru pantula'.

¹⁶Kopongo raginio ngaangai' ulun intor ra bansa'-bansa' ondo' lakat poyo naayag, ondo' namulunsar ra Jirusalim, matong ra Jirusalim ra moonong bilor koson sumamba ra Raja', TUHAN Ondo' Maayo Kaga' Kuasa', am koson mangiantak ra Pangiantakan Mangkalukub ra Raun.

¹⁷Amon ru bansa' ondo' kalo masaga' matong koson sumamba ra Raja', TUHAN Ondo' Maayo Kaga' Kuasa', rasam kalo rumatu' giu' ra pagun nilo.

¹⁸Amon ru bansa' ru Misir marara' mangiantak ra Pangiantakan Mangkalukub ra Raun, ilo pana malumpa' ru maruol ondo' porotongon ru TUHAN ra moonong bansa' ondo' marara' mongoi sambayang.

¹⁹Ginio noyo ukuman ondo' paratuon ra Misir am ngaangai' bansa', amon ru kalo mangiantak ilo ra Pangiantakan Mangkalukub ra Raun.

²⁰Paat raginio lunsing-lunsing ra pinabayang ra kuda pana inukir ra ragu-ragu “Patimpokon tayar ru TUHAN”. Pagangan-pagangan giu' ra Baloi ru TUHAN masauk ra mapasau koson ra mangkuk-mangkuk ondo' pinabanta' giu' ra saang ru altar.

²¹Ngaangai' pagangan giu' ra Jirusalim masauk ra longgom ru TUHAN Ondo' Maayo Kaga' Kuasa'. Ulun ondo' mampataak ra taak simbalui mamakai ra kuliamos no koson mantanok ra kual ru taak simbalui ondo' pinataak. Masaboi paat no, kolondo' boo ulun mantalan giu' ra Baloi ru TUHAN Ondo' Maayo Kaga' Kuasa'.