Read Timugon Murut JAKARIA 3 Bible Online

JAKARIA 3 - Timugon Murut bible

JAKARIA 3

¹Ralalom ru pinaintalang ra bokon, nanulu' TUHAN ra Tingganai Maayo Imam Josua raki'. Tingganai Maayo Imam Josua tatanga' minigor ra saang ru malaikat ru TUHAN. Tingganai ru riwato[2] ondo' nakatampos noyo koson manguu' ri Josua, minigor ra sapapa' ri Josua.

²Malaikat ru TUHAN[3] minindagu ra Tingganai ru riwato, “Gama' ru mangukum TUHAN rirun, okou Tingganai ru riwato! Gama' ru TUHAN ondo' motogom ra Jirusalim mangukum rirun. Ulun ti koson ra polompor ru tataun ondo' binunduk intor ra apui.”

³Minigor i Josua ra giu' am nambayang ra ondo' majamol kaga'.

⁴Indagu malaikat no risilo ondo' mangindangan riso giu' ra suruga', “Patiri' min bayang majamol ondo' binayang ru ulun ti.” Kopongo raginio kono ri Josua, “Pinatiran ku noyo tula muno; mangani' aku rirun ra bayang bagu.”

⁵Nanusub io risilo ondo' mangindangan riso mampasampak[4] ra serban mapasau ra ulu ri Josua, am binaal nilo. Ilo pana nampabayang boo ri Josua ra bayang bagu liliwa' malaikat ru TUHAN minigor ra giu' no.

⁶Kopongo raginio malaikat ru TUHAN nambala' ri Josua

⁷ra ragu ru TUHAN Ondo' Maayo Kaga' Kuasa', “Amon ru suguton mu ukum Kuno am mambaal ra kandoi ondo' taakin Kuno rirun, iowon kou manunggul ra kandoi koson ra tingganai giu' ra ralalom Baloi Kuno am niayuk koson manalingapu ra liliut nano. Rongogon Ku pakiasian muno, koson ra Aku riminongog ra pakiasian ru malaikat-malaikat ondo' giu' ra saang Kuno.

⁸Rongogo' noyo Tingganai Maayo Imam Josua, am niayuk akau imam ondo' nasauk ra rangan nano, akau ngaangai' tatandu' ru orou matong ondo' moonsoi. Paat raginio, susubon Ku ulipon Kuno ondo' sabiton ri ‘Talantar’.

⁹Pabantaan Ku rondo' batu tulu' persegi giu' ra saang ri Josua. Tulisin Ku ra tulisan-tulisan ra batu no. Ralalom songorou, patirin Ku tula ru pagun ti.

¹⁰Paat orou raginio masaboi, moonong ulun mangkimait ra pasambalayan nano matong am sumia' ra kaansayan am kinamio giu' ra tatanga' ru umo ru anggur am puun ru ara min.”