Read Timugon Murut JAKARIA 6 Bible Online

JAKARIA 6 - Timugon Murut bible

JAKARIA 6

¹Nakakito Aku ra pinaintalang ra bokon. Raino ti nakakito aku ra apat kurita' kuda miningkual intor ra ruo gunung gangsa'.

²Kurita' kuda ondo' kasaa' binunduk ru kuda malia', ondo' karuo bininduk ru kuda maitom,

³ondo' katalu binunduk ru kuda mapulak, am ondo' kaapat binunduk ru kuda ondo' tangkakalut.

⁴Kopongo raginio nangkuot aku ra malaikat no, “Tuan, atan kia arati' ru kurita' kuda ti?”

⁵Taam io, “Gitio noyo apat angin ondo' bagu minatong intor ra saang ru Tuhan ondo' namingkal ra tana' ti am limbowon.”

⁶Kurita' kuda ondo' binunduk ru kuda maitom sumuku' ra Babilonia giu' ra ralayo. Kuda mapulak sumuku' ra kalasaan am kuda ondo' tangkakalut sumuku' ra pagun giu' ra rabugus.

⁷Paat ra kuda ondo' tangkakalut no miningkual, ilain ra ngaangai' ru kuda no kalo boo makapaginaa koson mongoi pangimumui ra tana' ti. Indagu malaikat no, “Ongoi kano pangimumui ra tana'!” Ngaangai' ru kuda no minongoi.

⁸Kopongo raginio golok malaikat no raki', “Kuda ondo' minongoi ra Babilonia giu' ra ralayo nampalinos ra sangit ri Aki Kapuuno'.”

⁹Nangani' TUHAN ra tanou ti raki'.

¹⁰Indagu Io, “Alapo' taak ondo' pataakon ru ulun ondo' bagu siminaguli' intor ra pamatiran giu' ra Babilonia, iono i Gildai, i Tobia am i Jidaya. Ibito' noyo taak nilono ra mataki' giu' ra baloi ri Josia anak ri Jipanya.

¹¹Baalo' rondo' karaun intor ra mas am pirok ondo' pinataak nilono, am pasampako' karaun no ra ulu ri Tingganai Maayo Imam i Josua anak ri Jojadak.

¹²Balai' io ra Aku, TUHAN Ondo' Maayo Kaga' Kuasa' mindagu, ‘Ulun ondo' sabiton ri Talantar nakasugut giu' ra intok sinarayan nano, am mambaal io saguli' ra Baloi ru TUHAN.

¹³Io noyo ondo' mambaal ra Baloi Kuno am mangapu ra urumat ondo' aniin ru raja', am mamarinta io ra mamagun nano. Sangulun imam mamaya' riso am maguyu mangandoi ra moonsoi.’

¹⁴Karaun no buliin giu' ra ralalom ru Baloi Kuno koson mapabansuk ri Gildai,[7] i Tobia, i Jidaya am i Josia.”[8]

¹⁵Ulun intor ra intok maalur matong koson mangindangan mambaal ra Baloi ru TUHAN. Mopongo Baloi ra binaal saguli' no, makapandai kau ra TUHAN Ondo' Maayo Kaga' Kuasa' nanusub raki' mongoi ramuyun. Ngaangai' ru baal raginio masauk amon totopot kau gumagaya' ra susuban ru TUHAN, i Aki Kapuuno' min.