Read Timugon Murut JAKARIA 7 Bible Online

JAKARIA 7 - Timugon Murut bible

JAKARIA 7

¹Paat ra orou kaapat ra sila' Kisliw, sila' kasiam, ralalom bilor kaapat ra pamarintaan ru Raja' Darius, TUHAN nangani' raki' ra tanou.

²Mamagun ru Bitil nanusub ri Sarijir am i Rigim-Milik am niayuk ulun nilo mongoi ra Baloi ru TUHAN Ondo' Maayo Kaga' Kuasa' koson makibarakat ra TUHAN.

³Sinusub ilo niayuk mangkuot ra imam-imam am nabi-nabi, “Lakat poyo kia akai musiti' manulaboi ra kapusaan ru Baloi ru TUHAN ra mampali ra moonong sila' kalimo, koson ondo' binaal mai ra bibilor buoi no?”

⁴Gitio noyo tanou ru TUHAN ondo' minatong raki'.

⁵Indagu Io, “Balai' ngaangai' mamagun ru pagun ti am imam-imam ra mampali am sulaboi ondo' binaal nilo ra sila' kalimo am katulu' buoi tulu' ngoopor ngambilor ti, sala' ka mangurumat Raki'.

⁶Paat ilo mangakan am manginum, binaal raginio pana koson mangansuk ra guang nilo galama'.”

⁷Ginio noyo ondo' rinagu ru TUHAN ondo' pinabala' galing ra nabi-nabi ra galing i, paat ra Jirusalim lakat poyo inayanan am mamagun nano langkaya'. Paat ragili ulun sala' ka ayuk minayan giu' ra pekan-pekan ra liliut ru bandar, kaa' niayuk giu' ra tampilon rabugus am giu' ra pipilon toojo ru bulur giu' ra tampilon ra kalasaan.

⁸Nangani' TUHAN ra tanou ti ri Jakaria,

⁹“Paat ra galing i, nangani' Aku ra susuban ti ra ulun Kuno, ‘Akau musiti' mambaal ra matimpok, moonsoi guang am makaasi' ra ulun ru akau po ngai'.

¹⁰Pai' imboloo' ruandu' napuor, anak nailusan ra matuo, ulun bokon ondo' minayan ra tatanga' min, kapoam osoi ayuk ondo' ralalom ru kapaganan. Pai' pangatang ra baal ondo' malaat ra ulun ru akau po ngai'.’

¹¹Kaa' ulun Kuno mokotog ulu am marara' rumongog ra susuban Kuno; silongon nilo talingo maa' raginio kalo mokorongog.

¹²Kinokotog nilo guang saboi kalo siminugut ra pangilaan ondo' tinaakan Kuno risilo ondo' pinabala' galing ra nabi-nabi ra galing i. Ginio ra siminangit Aku kaga' risilo.

¹³Kalo tinaam Ku pakiasian nilo sabap marara' ilo rumongog paat ra Aku mindagu.

¹⁴Koson ra bagiu' mapuor, kinuliagai Ku ilo saboi ilo minayan kalalaat giu' ra pagun ra bokon. Tana' ondo' malabung ti nasauk ra mapua', masiluk kaga', am kolondo' ulun minayan.”