Read Timugon Murut JAKARIA 8 Bible Online

JAKARIA 8 - Timugon Murut bible

JAKARIA 8

¹Nangani' TUHAN Ondo' Maayo Kaga' Kuasa' ra tanou ti ri Jakaria,

²“Moogot Aku kaga' mangindangan ra Jirusalim sabap ra motogom Aku kaga' ra mamagun nano, am sabap ra togom Kuno, siminangit Aku ra pantula' ru bandar no.

³Sumaguli' Aku ra Jirusalim, bandar Kuno ondo' matulai am lumayun ra giu' no. Jirusalim mauligan ra bandar ondo' gumagaya', am bulur ru TUHAN Ondo' Maayo Kaga' Kuasa'[9] am sabiton ra bulur matulai.

⁴Aki am aru' ondo' matutuo noyo kaga', saboi musiti' mugar ra manjujuga', manturung poyo giu' ra padang ru bandar Jirusalim.

⁵Ralan-ralan giu' ra bandar mososok poyo ra anak ungkuyon am ruandu' ondo' mangkukuli.

⁶Baal raginio kalo makaimuag ra ulun ondo' lakat poyo naayag intor ra bansa' ragitio, kaa' kalo makaimuag Raki'.

⁷Mamayag Aku ra ulun Kuno intor ra pagun-pagun intok ilo pinatiran,

⁸am magibit risilo sumaguli' intor ra sirangon am intor ra kalasaan, maa' raginio mayan ilo saguli' giu' ra Jirusalim. Masauk ilo ra ulun Kuno am Aku masauk ri Aki Kapuuno' nilo. Mamarinta Aku risilo ra motopot am matimpok.

⁹Kaikango' guang mino! Raino morongog min ragu-ragu ondo' niayuk rinagu galing ru nabi-nabi paat ra batu maatang pinabanta' koson mambaal saguli' ra Baloi Kuno.

¹⁰Kalo poyo raginio, kolondo' ulun ondo' makaandar mampagaji' kapoam mampasiwa' ra bibiag, am kolondo' ulun ondo' makaliman ra mamimio intor ra ulisoon ru pantula'. Nangkinibit Aku ra ulun mansasangor.

¹¹Kaa' pamakuan Kuno ra ulun intor ra bansa' ragitio ondo' lakat poyo naayag suai intor ra galing i.

¹²Mampatias ilo ra sampug ra kaansayan. Puun ru anggur nilo mangkawa', tana' mangani' ra ampos, am rasam rumatu'. Mangani' Aku ra ngaangai' ru barakat ti ra ulun intor ra bansa' ti ondo' lakat poyo naayag.

¹³Akau mamagun ru Jiuda am Israil! Paat ragili, bulintok ru ulun bansa' ra bokon magulas ra rondo' am bokon, mindagu ilo, ‘Gama' ru karaat ondo' nakalumpa' ra Jiuda am Israil makalumpa' niayuk ramuyun!’ Kaa' bayagon Takamin, saboi ulun bansa' ra bokon no mindagu ra ilo po ngai', ‘Gama' ru barakat ondo' pinataak ra Jiuda am Israil pataakin niayuk ramuyun!’ Ginio ra kaikango' guang mino am pai' kalaa'!”

¹⁴Mindagu TUHAN Ondo' Maayo Kaga' Kuasa', “Paat ra kinamatuaan min napasingkual ra sangit Kuno, namatas Aku koson mangukum risilo ra maagat. Kalo kulawon Ku namatasan Kuno, kaa' sinugut.

¹⁵Kaa' raino masaga' Aku mambarakat ra mamagun ru Jirusalim am Jiuda. Ginio ra pai' kalaa'.

¹⁶Gitio noyo baal ondo' musiti' min baalon: Amon ru mindagu kau, raguo' noyo ondo' motopot ra akau po ngai'. Pamatas no ra matimpok, pamatasan ondo' magibit ra kaansayan, giu' ra intok pangakiman.

¹⁷Pai' pangatang ra baal malaat ra akau po ngai'. Pai' indagu ra ibot kalo motopot. Masisang Aku ra magabau, kalo matimpok am kalaatan.”

¹⁸Nangani' TUHAN Ondo' Maayo Kaga' Kuasa' ri Jakaria ra tanou ragitio,

¹⁹“Mampali ondo' binaal ra sila' kaapat, kalimo, katulu' am koopor masauk ra pangiantakan ondo' natikop ra kaansukan am kasagaan ru mamagun Jiuda. Tagami' noyo katapatan am kaansayan!”

²⁰TUHAN Ondo' Maayo Kaga' Kuasa' mindagu, “Paat masaboi ra mamagun intor ra masuang bandar[10] matong ra Jirusalim.

²¹Mamagun intor ra bandar ondo' rondo' mindagu ra mamagun ru bandar ra bokon, ‘Ibok ongoi takau samba ra TUHAN Ondo' Maayo Kaga' Kuasa' am makibarakat Riso. Baya' kano ramon!’

²²Masuang ulun am masuang bansa' ondo' maikang matong ra Jirusalim koson sumamba ra TUHAN Ondo' Maayo Kaga' Kuasa' am makibarakat Riso.

²³Paat raginio mopor ngaulun bansa' ra bokon matong ra sangulun ru Jaudi am mindagu, ‘Akai niayuk masaga' barakaton koson ramuyun sabap nokorongog akai ri Aki Kapuuno' mabaya' ramuyun.’ ”