Read Timugon Murut MALIAKI 2 Bible Online

MALIAKI 2 - Timugon Murut bible

MALIAKI 2

¹Mindagu TUHAN Ondo' Maayo Kaga' Kuasa' ra imam-imam, “Gitio noyo susuban Kuno ramuyun:

²Musiti' kau mangurumat Raki' ra binaal min. Amon ru marara' kau rumongog ra ragu Kuno, ulason Takamin. Ulason Ku ngaangai' ondo' apuon min koson ra barakat. Sotopot no, inulas Ku noyo ngaangai' no sabap ra kalo lioon min susuban Kuno.

³Ukumin Ku anak-anak min, am luitin Ku bulos min ra ampangara' ru bibiag ondo' pataakon min. Mopongo raginio ralaaton kau ru ulun ra nampabujukan ra ampangara'.

⁴Koson raginio ra akau makapandai ra Aku nangani' ramuyun ra susuban ti maa' raginio nabantuan Kuno am imam-imam, papag ri Liwi kalo masulang.

⁵Ralalom ru nabantuan no binantu' Ku mangani' risilo ra kaayagan moonsoi am mamimio. Suguton Ku nabantuan no maa' raginio mangurumat ilo Raki'. Paat raginio topot ra mangurumat ilo Raki' am malaa' Raki'.

⁶Mangila' ilo ra atan ondo' motopot am sala' ka ondo' sala. Lumampit ilo Raki'; sala' ka ayuk mambaal ilo ra kasagaan Kuno, kaa' ilo niayuk mangindangan ra masuang ulun maa' raginio lumonggo' mambaal ra malaat.

⁷Imam-imam musiti' toojo mangila' ra atan ondo' motopot intor ri Aki Kapuuno'. Mamagun musiti' matong ra imam-imam koson makapandai ra kasagaan Kuno sabap ilo ulun sinusub ru TUHAN Ondo' Maayo Kaga' Kuasa'.

⁸Kaa' raino, akau imam-imam, siminiang intor ra ralan ondo' motopot. Pangilaan min nangkinibit noyo ra masuang ulun nambaal ra kasalaan. Inanggal min nabantuan ondo' binaal Kuno ramuyun.

⁹Ginio ra Aku pana mangkinibit ramuyun kalo urumaton ru ulun ru Israil sabap ra kalo ginagaya' min kasagaan Kuno, am sabap ra pinasusuai min ulun paat ra akau nangila'.”

¹⁰Sala' ka kia itakau ngaangai' mokoondo' ra ama' ondo' nogondo'? Sala' ka kia itakau ngaangai' binaal ri Aki Kapuuno' ondo' nogondo'? Kaa' kua ritakau kalo manugut ra bantu' rondo' am bokon? Kua kia pagasab takau ra nabantuan ondo' binaal ri Aki Kapuuno' ra kinamatuaan takau?

¹¹Mamagun ru Jiuda minanggal ra bantu' nilo ri Aki Kapuuno' am niayuk nambaal ra baal-baal ondo' makalalaa' giu' ra Jirusalim am giu' ra titikop pagun. Jinamalan nilo noyo Baloi ru TUHAN ondo' tagamin ru TUHAN. Ungkuyon nagandu' noyo ra ruandu' ondo' siminamba ra dewa-dewa ru bansa' ra bokon.

¹²Gama' ru inggion ru TUHAN ulun ondo' nambaal raginio intor ra ulun ru Israil, am kalo mangiou risilo maya' ra bansa' takau koson mampataak ra taak simbalui ra TUHAN Ondo' Maayo Kaga' Kuasa'.[1]

¹³Suai raginio mokoondo' poyo binaal min. Tinimugan min altar ru TUHAN ra lomou; nantangi' kou am nanulaboi sabap ra TUHAN kalo boo mangapu ra taak min.

¹⁴Mangkuot kou ra sasaban no ra Io kalo boo mangapu ra taak muno. Koson raginio baal no sabap ra TUHAN nakapandai ra okou kalo boo giminagaya' ra ruandu' inandu' muno paat ra akau mamulok. Ruandu' no rangan ru kaayagan am andu' min, kaa' liminungkang kou ra bantu' riso, kabalu' pana binantu' mu noyo ra saang ri Aki Kapuuno' koson magulayun gumagaya' riso.

¹⁵Sala' ka kia i Aki Kapuuno' nampasauk rirun rondo' inan am rondo' saliguor ra ruandu' no? Atan kia arati' ri Aki Kapuuno' ra baal raginio? Arati' Nano ioginio maa' raginio makaalap kou ra anak ondo' totopot ulun ri Aki Kapuuno'. Ginio ra, tutuno' noyo maa' raginio kolondo' ulun ra gino ngai' min ondo' liminungkang ra bantu' ra andu' nano.

¹⁶Mindagu TUHAN i Aki Kapuuno' ru Israil, “Masisang Aku ra mangali. Marara' Aku paat sangulun intor ramuyun mambaal ra malaat koson raginio ra andu' nano. Tutuno' noyo maa' raginio kalo lumungkang kau ra bantu' koson magulayun gumagaya' ra andu' min.”

¹⁷Binaal min TUHAN nasuraan ra ragu-ragu min. Kaa' nangkuot kau, “Ati kulaan akai nambaal ra TUHAN nasuraan?” Mindagu ra, “Ngaangai' ulun ondo' nambaal ra malaat karaan ra moonsoi ru TUHAN Ondo' Maayo Kaga' Kuasa', am maansayan Io risilo.” Kapoam mangkuot ra, “Ati kia i Aki Kapuuno' ondo' karaan ra matimpok no?”