Read Timugon Murut 1 MAKABI 1 Bible Online

1 MAKABI 1 - Timugon Murut bible

1 MAKABI 1

¹Sejarah ti timinalimpuun paat ra Raja' Aliksandir, anak ri Pilipus intor ra Makidonia, minintor intor ra Makidonia am namulunsar ra Raja' Darius, raja' Pirsia am Midia. Kinala no Raja' Darius am nampagaau ra panturungan ru raja' no, am ginio noyo ra pamarintaan ru Junani kinalangka'.

²Nambaal io ra masuang pangayawan: bandar-bandar mokoondo' ra kubu ginaau no am raja'-raja' ru pagun ondo' kinuasa' nano pinatoi.

³Sinuku' no pompor-pompor ru tana' ti am nantakou ra masuang bansa'. Titikop ru tana' kalo makaanggal riso. Io pana nasauk ra malilimbau am masawat ragu.

⁴Tinimung no saujor ondo' maikang am nanguasa' ra masuang pagun, bansa' am ulun manguasa', am jinajalan ilo mambayar ra cukai ra raja'.

⁵Kopongo namarinta buoi mopor am ruo ngambilor, narualan Raja' Aliksandir am nakaliman ra patayan nano nasaboi noyo. Io pana nampiau ra panglima-panglima ondo' nauligan kaga' ondo' inila' nababaya' riso intor ra boborok am nantayar-tayar ra pamarintaan nano risilo.

⁶

⁷

⁸Kopongo Raja' Aliksandir minatoi, panglima-panglima nano minalit ra pamarintaan, am nanguasa' giu' ra wilayah ru sigagama'.

⁹Sigagama' nilo siminauk ra raja'. Papag ru raja'-raja' no namarinta ra bibilor buoi no am namparatong masuang kaimbalaan ra tana' ti.

¹⁰Antiokus Ipipanis iono anak ungkuyon ru Raja' Antiokus ondo' Katalu intor ra Siria, papag ru sangulun intor ra panglima ru Raja' Aliksandir. Antiokus Ipipanis no malaat am igondo' nasauk ra ulun rinakop giu' ra Roma, kalo poyo nasauk ra raja' ralalom ru bilor 137.[1]

¹¹Paat raginio giu' ra Israil siminalula' santimungan ulun ondo' kalo mampalio ra Ukum ri Musa am mokoondo' ra malaat pangkimaitan ra ulun masuang. Konilo, “Moonsoi poyo ra itakau mambaal ra nabantuan ra bansa'-bansa' ra sambalayan takau. Kararaan takau koson lumatok risilo, magibit ayuk ra kapaganan ritakau.”

¹²Pamaguangan raginio inapu ra moonsoi.

¹³Kukula' ngaulun risilo masaga' muma' ra raja', am nangiou raja' risilo koson maya' ra kaulayan ru bansa'-bansa' ra bokon.

¹⁴Giu' ra Jirusalim nambaal ilo rondo' stadium koson ondo' mokoondo' giu' ra bandar-bandar Junani.

¹⁵Iniru' nilo babaya' ru sunat nilo am nangiruan ra nabantuan ri Aki Kapuuno'. Nagamung ilo[2] ra bansa'-bansa' ra bokon am nambaal ra kalaatan.

¹⁶Paat ra Raja' Antiokus nakakito ra pamarintaan nano maikang noyo, makaguang io manguasa' ra Misir am mamarinta ra pagun no niayuk.

¹⁷Namulunsar io ra Misir ra rondo' kapal mangayou ondo' maayo am saujor ondo' maikang, nakaaya' kurita'-kurita' kuda pamulunsar am gaja-gaja.

¹⁸Ralalom ru pamulunsaran no Raja' Ptolimius, raja' ru Misir no kinala; Ptolimius nagiru' am gino ngai' ru saujor nano, masuang minatoi.

¹⁹Nakasugut Raja' Antiokus nampagaau ra bandar-bandar ondo' makakubu giu' ra Misir am nantakou ra titikop pagun.

²⁰Kopongo Misir kinala ralalom bilor 143,[3] Raja' Antiokus siminaguli', am nabaya' ra saujor ondo' maayo kaga' namulunsar io ra pagun ru Israil am bandar Jirusalim.

²¹Ra kinalimbau nano siminubol ra ralalom Baloi ri Aki Kapuuno' am nangalap ra altar mas, tampakan ra lampung am ngaangai' pinangukop no,

²²mija' patampakan ra ruti' pataakon, sangkir-sangkir am mangkuk-mangkuk, intok ru kaminyan intor ra mas, tabir am karaun-karaun. Ngaangai' kuliamos mas pinamunga' ra tampilon saang ru Baloi ri Aki Kapuuno' niayuk inalap no.

²³Inalap no atan ayuk intor ra mas am pirok am niayuk ngaangai' kuliamos mokologo am rapu' nakasibuni ondo' natuum no ra giu' no.

²⁴Ngaangai' no inaut no ra pagun nano galama'. Namatoi io ra masuang ulun am ra lilimbau napatanou ra atan ondo' binaal nano.

²⁵Giu' ra titikop ru Israil, ulun nalumpa' ru kangilukan maayo.

²⁶Ulun-ulun manguasa' am matutuo salaa-laa, kamulakan ungkuyon am ruandu' takau marualan, ruandu'-ruandu' mairu' kinantalur nilo.

²⁷Moonong ungkuyon maguot marimbai ra rimbai sulaboi am ruandu' inuot mangulir giu' ra lamin nano.

²⁸Ngaangai' mamagun ru Israil mauyu', pagun takau najajou sabap ra mamagun nano.

²⁹Pakasail ruo ngambilor, Raja' Antiokus nangator ra sangulun tingganai mampalulur ra cukai giu' ra bandar-bandar giu' ra Judia. Minatong io ra bandar Jirusalim nabaya' ra sampulalai saujor ondo' maayo,

³⁰am mindagu moonsoi ra mamagun. Kalo totopot io nanaak ra nabantuan pabansayan, am mamagun nangintopot riso. Pulali' io namulunsar ra bandar no am nangkinibit ra nalunsai ra najanjayan; masuang ulun ru Israil minatoi.

³¹Bandar tinakawan am sinolob; baloi-baloi am ngaangai' timbok ru bandar linunsai.

³²Bibiag tinambiag ginaau am ruandu'-ruandu' am niayuk lalaing-lalaing inaut koson ra ulun rinakop.

³³Kopongo raginio tayar ru bandar giu' ra tampilon ralayo Baloi ru Tuhan kinapiot ra timbok-timbok ondo' masawat am mapiot am niayuk manara-manara ondo' mapiot kaga', am intok no sinauk ra kubu nilo.

³⁴Giu' no pinaayan nilo santimungan ulun giminuor ru Jaudi ondo' makatula am ulun-ulun minanggal ra ukum koson mangikang ra pangampin.

³⁵Pinasubol nilo niayuk kinandoi mangayou am akanon am niayuk ngaangai' kuliamos tinakou intor ra Jirusalim. Kubu no koson ra lolob maayo ra bandar.

³⁶Kubu no nasauk ra lolob ra tayar ru Baloi ru Tuhan, pantula' malaat ondo' marayus mangipa' ra Israil.

³⁷Ulun ondo' kolondo' sala potoyon giu' ra libung ru altar ondo' jinamalan ru ulun mamatoi.

³⁸Mamagun ru Jirusalim nagiru' ra nalaa' am bandar no nasauk ra intok ayanan ru ulun bansa' ra bokon. Jirusalim nasauk ra intok suai ra mamagun nano galama' ondo' najajalan nangiruan ra intok no.

³⁹Baloi ru Tuhan masiluk koson ra tana' kaagisan, orou-orou pangiantakan nano nasauk ra orou panguliran. Orou Sabat nasauk ra pagasaban, pangurumatan nano nasauk ra baal kukuritin.

⁴⁰Pagasaban nano raino maayo koson ra katulayan nano ragili; kinaayo nano nasauk noyo ra panguliran.

⁴¹Kopongo raginio Raja' Antiokus napaingkual ra susuban ondo' mangitaak ra ngaangai' bansa' ralalom ru wilayah ru pamarintaan nano koson mangiruan ra kaulayan ru sigagama' am masauk rondo' bansa'. Ngaangai' bansa' ra bokon giminagaya' ra susuban no.

⁴²

⁴³Gino ngai' ru ulun ru Israil pana masuang ondo' minaya' ra ugama ru raja' no, am nampataak ra taak simbalui ra sinungkalalaing am niayuk minanggal ra aturan tangusan paat ra orou Sabat.

⁴⁴Nangator niayuk raja' ra ulun sinusub giu' ra Jirusalim am giu' ra bandar-bandar giu' ra Judia nabaya' ra surat susuban ondo' ngaangai' mamagun musiti' maya' ra kaulayan ra bansa' bokon.

⁴⁵Inggalarin ilo mampataak ra taak simbalui koson mapabansuk ra guang ru Tuhan,[4] taak simbalui koson paringkuanangan ra Tuhan,[5] am taak simbalui wain giu' ra Baloi ri Aki Kapuuno', am manusub risilo koson mangiru' ra orou Sabat am ngaangai' pangiantakan,

⁴⁶am niayuk mampajamol ra Baloi ri Aki Kapuuno' am ulun-ulun mangandoi nano.

⁴⁷Jinajalan ilo mambaal ra altar-altar am kuil-kuil intok sambaan ra sinungkalalaing am niayuk mampataak ra bauwi am bibiag kalo iowon ra bokon no.

⁴⁸Inggalarin ilo manunat ra anak-anak nilo am sinusub mampajamol ra inan ra atan ayuk ralan,

⁴⁹maa' raginio lilianin Ukum ri Musa am mangiruan ra kaulayan-kaulayan.

⁵⁰Ulun ondo' manggal ra aturan ru raja' musiti' ukumin ra matoi.

⁵¹Inaru' ru raja' aturan no ra tayar ru titikop pamarintaan nano. Sinauk no ulun-ulun magalung giu' ra ati ayuk am nanusub maa' raginio giu' ra moonong bandar giu' ra Judia mampataak ra taak simbalui ra dewa-dewa.

⁵²Masuang ulun ru Jaudi nakatampos mangiruan ra Ukum ri Musa am giminagaya' ra ulun-ulun magalung no. Jinamalan nilo pagun ra kalaatan nilo,

⁵³am paliso nilo nampajajal ra ulun ru Israil ondo' moonsoi koson mansibuni ra ati ayuk intok.

⁵⁴Paat ra orou koopor am limo ra sila' Kisliw bilor 145,[6] Raja' Antiokus nampaayan ra “Karaat Ondo' Makalalaa' ” giu' ra rasawat ru altar giu' ra Baloi ru Tuhan. Giu' ra bandar-bandar ra titikop Judia binaal altar-altar tayar ru dewa-dewa.

⁵⁵Giu' ra saang ru kulobon ru baloi-baloi am giu' ra ralan-ralan, panalaban ra taak simbalui binaal.

⁵⁶Moonong Ukum ri Musa ondo' natuum rinilak am sinolob,

⁵⁷am osoi ayuk ondo' mapandayan nambuli ra kitab mapasau kapoam gumagaya' ra Ukum ri Musa, ukumin ra matoi maya' ra susuban ru raja'.

⁵⁸Sila' ka sila' ulun ondo' malaat mamakai ra kuasa' nilo ra ulun ru Israil ondo' soroi giu' ra bandar-bandar.

⁵⁹Paat ra orou karuo ngoopor am limo sila' raginio taak simbalui pinataak nilo giu' ra altar ru dewa ondo' pinabanta' giu' ra rasawat ru altar giu' ra Baloi ru Tuhan.

⁶⁰Ina'-ina' ondo' manunat ra anak nilo inukuman ra matoi sumugut ra susuban ru raja',

⁶¹am lalagang-lalagang tinair ra liog. Sasambaloi-sasambaloi nilo am ulun ondo' nambaal ra sunat niayuk inukum ra matoi.

⁶²Kaa' mokoondo' masuang ulun ru Israil ondo' miningkotog minanggal ra aturan ru raja' am marara' mangakan ra akanon ondo' majamol.

⁶³Masaga' ilo poyo matoi intor ra manggal ra nabantuan ru Tuhan am mangakan ra akanon kalo paakanin. Masuang ilo minatoi ra pinatoi.

⁶⁴Israil nalumpa' ra sangit ri Aki Kapuuno' am naimbolo' ilo kaga'.