Read Timugon Murut 1 MAKABI 11 Bible Online

1 MAKABI 11 - Timugon Murut bible

1 MAKABI 11

¹Raja' Ptolimius ondo' Koonom, raja' ru Misir nanusub ra pulalai ru saujor ondo' maayo kaga' koson ra agis giu' ra nagas ru raat am nanimung ra masuang kapal pangayou. Ralalom ru ruung nano mirot koson mangalap ra pamarintaan ru Raja' Aliksandir maa' raginio paruangon ra wilayah nano galama'.

²Io pana minongoi ra Siria nabaya' ra bantu'-bantu' pababansayan. Mamagun ru ngaangai' bandar nangukab ra kulobon garabang riso am nanguma' riso. Baal raginio binaal nilo minaya' ra susuban ru Raja' Aliksandir, sabap Raja' Ptolimius iwan ungkuyon nano.

³Raja' Ptolimius nomposoroi ra saujor pinagalung giu' ra moonong bandar sinubalan nano.

⁴Pakasaboi giu' ra Asdod, tinuluan io ra nalunsai-nalunsai kuil ru Dagon ondo' nosolob, am niayuk nangalunsai ra bandar am kampung-kampung giu' ra liliut no am intok ru baangkai-baangkai nakabanta'. Baangkai ru ulun ondo' minatoi ra nosolob ralalom pangayawan tinuntur giu' ra galur ru ralan ondo' musiti' sailin ru Raja' Ptolimius.

⁵Tinunung niayuk riso atan ondo' binaal ri Jonatan, am kuayan mampalaat ra inggalan nano. Kaa' nongkoror ayuk Raja' Ptolimius.

⁶Minongoi i Jonatan ra Jopi koson manguma' ra raja' ra upacara maayo. Nantatabi' ilo am nombolong ra giu' no.

⁷Paat ra suabon no nangator i Jonatan ra raja' polos ra Sungoi Iliutirus, am saguli' ra Jirusalim.

⁸Koson raginio noyo pangkiralanan ru Raja' Ptolimius nanalison ra kuasa' ra bandar-bandar giu' ra galur ru nagas polos ra Siliukia-Raat. Nangatang io ra malaat ra Raja' Aliksandir am

⁹nangator ra bilin ra Raja' Dimitrius, “Iou pambaal takau ra nabantuan. Anak ruandu' kuno raino nasauk ra andu' ri Raja' Aliksandir am pataakon ku rirun, am okou mamarinta ra pamarintaan ru ama' muno.

¹⁰Pansagulian guang kuno nampataak ra anak ruandu' kuno ri Aliksandir, sabap ra mirot io mamatoi raki'.”

¹¹Nampalaat Raja' Ptolimius ra inggalan ru Raja' Aliksandir sabap ra moogot io mangalap ra pamarintaan ru Raja' Aliksandir.

¹²Inalap ru raja' anak ruandu' nano intor ra Raja' Aliksandir am pataaki' no ra Raja' Dimitrius. Inukat ru Raja' Ptolimius ngaangai' pabukatan ra Raja' Aliksandir am nantula' ilo ra napandayan ru ngaangai'.

¹³Raja' Ptolimius siminubol ra bandar Antiokia am siminauk io ra raja' ru Asia Kalasaan Rabugus. Koson raginio noyo io nasauk ra raja' ru Misir am Asia Kalasaan Rabugus.

¹⁴Paat raginio soroi Raja' Aliksandir giu' ra Kilikia sabap ra mamagun ru wilayah raginio tatanga' giminuor.

¹⁵Kaa' pokorongog io ra atan ondo' binaal ru Raja' Ptolimius, minongoi io pangayou ra Raja' Ptolimius. Nanguma' Raja' Ptolimius riso nabaya' ra saujor ondo' maikang, saboi Raja' Aliksandir nagiru'.

¹⁶Giminaai poyo kakuasaan ru Raja' Ptolimius. Liliwa' raginio naguyum Raja' Aliksandir ra kasindungan giu' ra Arab.

¹⁷Kaa' pinatoi io ru sangulun Arab inggalan nano i Jabdiil, am ulu nano inataran ra Raja' Ptolimius.

¹⁸Kopongo ruo ngoorou Raja' Ptolimius galama' minatoi. Pulalai nano ondo' soroi giu' ra bandar-bandar mokoondo' ra kubu kinala ru mamagun ru bandar.

¹⁹I Dimitrius ondo' Karuo nasauk ra raja' ralalom bilor 167.[29]

²⁰Paat raginio nanimung i Jonatan ra ulun intor ra Judia koson mamulunsar ra kubu giu' ra Jirusalim. Nambaal ilo ra masuang kuliamos mangayou koson ra pamulunsaran no.

²¹Kaa' kukula' ngaulun ru Jaudi ra malaat ondo' masisang ra bansa' galama' minuma' ra Raja' Dimitrius ondo' Karuo. Nambala' ilo riso ra i Jonatan tatanga' magawang ra kubu giu' ra Jirusalim.

²²Pokorongog ra baal raginio siminangit Raja' Dimitrius am nataki' minongoi ra bandar Ptolimais. Nangator io rondo' surat ri Jonatan nabaya' ra susuban koson mompolonggo' ra pagawangan nano am mataki' matong muma' ra raja' giu' ra Ptolimais.

²³Kaapu ayuk bilin no, nanusub i Jonatan maa' raginio pagawangan no rayuson. Nampili' io ra kukula' ngaulun intor ra ulun-ulun maningganai giu' ra Israil am kukula' ngaulun imam koson maya' riso. Pinantuwo no painawo nano galama',

²⁴minuma' io ra raja' giu' ra Ptolimais am nagibit ra mas, pirok, bayang am masuang tangguang ra bokon no. Kinoonsoi ru binaal nano saboi masaga' raja' riso.

²⁵Kabalu' pana i Jonatan sinimbaalan ra ragu malaat ru kukula' ngaulun malaat intor ra bansa' nano galama',

²⁶moonsoi pinamakuan riso ru raja', koson ondo' binaal ru raja'-raja' ra nakapagulu. Inanian i Jonatan ra kaurumatan giu' ra saang ru ngaangai' rangan ru raja'.

²⁷Piniot io ralalom kandoi nano koson ra Tingganai Maayo Imam am ralalom ru ngaangai' kandoi kaurumatan ondo' ginuut ra kalo poyo raginio. Mulu' poyo niayuk pinasauk io ra gino ngai' maatang ra rangan ru raja'.

²⁸I Jonatan pana nakitaak ra raja' maa' raginio libung ru Judia am katatalu libung ru Samaria pinalabus intor ra cukai, am nambantu' io mampataak ra 11,000 ngakilogram pirok koson ra palit nano.

²⁹Nangiou raja', am namiot ra ngaangai' baal raginio, nanulis io rondo' surat posoboyon ri Jonatan. Suang ru surat no,

³⁰“Raja' Dimitrius posoboyon ra pabukat i Jonatan am bansa' ru Jaudi, kaansayan!

³¹“Nangator akai noyo ra surat intor ramuyun ngaangai' pinasaboi ri Lastinis pabukat mai. Ralin ru surat no atarin mai koson pambalaan ramuyun ngaangai'.

³²‘Raja' Dimitrius, posoboyon ra Ondo' Urumaton kaga' i Lastinis, kaansayan.

³³Namatas akai noyo koson mangani' ra ondo' moonsoi palilion ayuk ra ulun ru Jaudi koson mambalos ra binaal moonsoi sabap ra ilo rangan mai ondo' gumagaya' am nanugut ra ondo' musiti' baalon nilo ramon.

³⁴Iniou mai kaapuan nilo ra libung Judia am katatalu libung, iono bandar Ipraim, Lida am Ramataim am niayuk libung ra mamaar no. Katatalu libung ru Samaria no inaru' mai masauk rondo' ra Judia. Baal raginio mampakauli' ra ulun ondo' magibit ra taak giu' ra Jirusalim, sabap ra cukai kabilaran intor ra ampos tinanom am kikinawa' sala' ka boo tayar ru raja', kaa' tayar ru Baloi ri Aki Kapuuno'.

³⁵Intor ra orou raiti' akai niayuk nampalabus risilo intor ra mambayar ra cukai sampiopor, cukai ru usi' am ngaangai' cukai luntuk ra raja' ayuk.

³⁶Kolondo' rondo' pana ra ondo' rinagu ra ralalom ru surat ti masulang intor raino koson ra sabubuoi no.

³⁷‘Baalo' ralin ru surat susuban ti koson pataakin ri Jonatan maa' raginio pabantaan giu' ra Bulur Sion saboi makito ru ngaangai' ulun.' ”

³⁸Nakito ru Raja' Dimitrius ra pagun nano moonsoi am mamimio ragana' ru pamarintaan nano, am kolondo' boo ondo' nakimangayou riso. Pinolonggo' ru raja' ngaangai' saujor nano. Ngaangai' ru saujor sinusub minuli' ra baloi ru sigagama', ondo' ak am pulalai ru saujor bansa' ra bokon ondo' ginajian intor ra kapuluan ru Junani. Sabap ra binaal raginio, saujor-saujor ondo' nangandoi intor ra raja'-raja' ra nakapagulu i tumalimpuun masisang ra Raja' Dimitrius.

³⁹Ulun-ulun ondo' ragili nanungka' ra Raja' Aliksandir, mokoondo' sangulun ondo' inggalan nano i Tripon. Ilai' no ra ngaangai' pulalai nambutok ra Raja' Dimitrius. Ginio ra timinuum io ri Imalkui, ulun ru Arab ondo' nagalung ri Antiokus anak ungkuyon ru Raja' Aliksandir ondo' lakat poyo mamulok.

⁴⁰Nabuoi niayuk i Tripon minayan ra giu'. Jinajalan no i Imalkui koson mampataak ra anak no riso maa' raginio pasaukon ra raja' koson malit ra ama' nano. Io niayuk nambala' ri Imalkui intor ra ondo' binaal ru Raja' Dimitrius am kasisangan ru saujor-saujor no riso.

⁴¹Liliwa' raginio pinabala' ri Jonatan kitaakon ra Raja' Dimitrius maa' raginio pulalai-pulalai nano linugut saguli' intor ra kubu giu' ra Jirusalim am intor ra kubu-kubu ra bokon giu' ra Judia, sabap ra narayus mangayou ra Israil.

⁴²Taam Raja' Dimitrius, “Kitaakon muno iowon ku, am paat ra mokoondo' kaluagan, okou am bansa' muno aniin ku ra kaurumatan maayo.

⁴³Kaa' raino maa' poyo atarin mu ulun koson mangindangan raki' mangayou, sabap ra ngaangai' pulalai kuno giminuor noyo.”

⁴⁴I Jonatan pana nangator 3,000 ngaulun ondo' baani kaga' giu' ra Antiokia. Masaga' kaga' raja' ra rinatangan nano.

⁴⁵Kaa' 120,000 ngaulun mamagun ru bandar timinimung giu' ra pusor bandar ra kuayan koson mamatoi ra raja'.

⁴⁶Paat ra ulun masuang no nanguasa' ra ralan-ralan am tumalimpuun mamulunsar, nagiru' raja' ra ralalom ru istana.

⁴⁷Raja' pana nakiindangan ra pulalai ru Jaudi, am ilo ngaangai' timinimung giu' ra libung nano. Nantutuliar ilo giu' ra titikop ru bandar am namatoi olo'-olo' 100,000 ngaulun.

⁴⁸Binayag nilo raja' am nanalingaau ra bandar no am sinolob saboi napuso.

⁴⁹Paat ra ulun masuang nakakito ra bandar nilo kinuasa' ngaangai' ru ulun ru Jaudi, nangkaus ilo am giminolok-golok makimasi' ra raja'. Konilo,

⁵⁰“Pakimobonsoi no ramon! Pai' polosoo' ulun ru Jaudi marayus mangayou ramon am bandar ti!”

⁵¹Ulun giminuor nampatir ra kinandoi mangayou nilo am nobobonsoi. Ulun ru Jaudi pana urumaton kaga' ru raja' am ngaangai' ulun ralalom ru pamarintaan. Kopongo raginio siminaguli' ilo ra Jirusalim am nagibit ra masuang kuliamos ginaau.

⁵²Intok ru Raja' Dimitrius koson ra raja' kinaikang am pagun nano moonsoi am mamimio.

⁵³Kaa' sinulang no ngaangai' bantu' nano am riminuli' nangayou ri Jonatan. Kalo binalasan no kinoonsoi ri Jonatan riso, kaa' nantipagon io kaga' ri Jonatan.

⁵⁴Kukula' buoi raginio siminaguli' i Tripon ri Antiokus ondo' lakat poyo mamulok kaga'. I Antiokus pana pinatanou koson ra raja'.

⁵⁵Ngaangai' pulalai ondo' pinolonggo' noyo ru Raja' Dimitrius raino nagamung ra raja' ondo' lakat poyo mamulok no. Raja' Dimitrius binulunsar am kinala am io pana nagiru'.

⁵⁶Ginaau ri Tripon gaja-gaja am nampagaau ra bandar Antiokia.

⁵⁷Raja' Antiokus pana ondo' lakat poyo mamulok no nanulis ra surat ri Jonatan. Suang ru surat no koson ragitio: “Palayunon tokou ralalom kandoi Tingganai Maayo Imam am nampasauk rirun ra panguasa' ra tayar ru kaapat-apat libung. Okou niayuk aniin ra panabitan ‘Rangan ru Raja'’.”

⁵⁸Pinabaya' raginio nangator io rondo' kuliamos am kakamot ru akanon ondo' binaal intor ra mas. Iniou i Jonatan koson manginum intor ra sangkir mas, mambayang ra bayang ru pamarintaan am butang mas, ondo' sulungin ru pabukat-pabukat ru raja'.

⁵⁹Raja' napasauk niayuk i Simon maayo ri Jonatan ra panglima ru libung intor ra balitan ru Libanon saboi ra balitan ru Misir.

⁶⁰Kopongo raginio i Jonatan am saujor nano minugar nansail ra libung Siria Maayo am bandar-bandar nano, am ngaangai' pulalai ru Siria naguum riso koson ra pagamung. Minongoi io ra Askilon am inuma' ra maantak ru mamagun ru bandar.

⁶¹Intor ra giu' minongoi io ra Gaja, kaa' mamagun nano nampaangob ra kulobon garabang ru bandar. Io pana nagawang ra bandar no, am libung giu' ra liliut nano ginaawan am sinolob.

⁶²Mamagun ru Gaja pana nakimobonsoi, am i Jonatan nambaal ra nabantuan risilo. Kaa' anak-anak ru tingganai nilo inataran no koson ra ulun rinakop giu' ra Jirusalim. Kopongo raginio sinailan no pagun raginio polos ra Damsyik.

⁶³Pokorongog i Jonatan ra panglima-panglima ru Raja' Dimitrius am saujor ondo' maayo nakasaboi noyo giu' ra Kadis giu' ra Galilia ra kuayan koson mopolonggo' riso.

⁶⁴Io pana minugar koson nangayou risilo, am i Simon maayo nano tinatang giu' ra Judia.

⁶⁵Nangkim i Simon giu' ra saang ru bandar Bit-Jur, nagawang ra bandar no am nabuoi kaga' nangayou ra mamagun nano.

⁶⁶Pupus no nakimobonsoi ilo, am nangiou i Simon. Kaa' pinagiru' no ilo am namagun ra bandar no. Pinosoroi no boo saujor nano ra giu' no.

⁶⁷Liliwa' raginio i Jonatan am pulalai nano nangkim mamaar ra Tasik Ginisarit. Susuab ayuk poyo ilo minongoi ra tana' marata' Gajor.

⁶⁸Kaa' saujor ru pantula' minuma' risilo ra giu' no, nalupus nangiruan ra masuang ulun giu' ra kagunungan koson mangipa' ra ulun ru Jaudi. Liliwa' raginio saujor ru pantula' nakauma' ri Jonatan,

⁶⁹ngaangai' ulun no miningkual intor ra intok nansibunian nilo am nampaugar ra pamulunsaran.

⁷⁰Ngaangai' saujor ri Jonatan nagiru'. Kolondo' sangulun pana natatang, ondo' ak am ruo ngaulun panglima ru pulalai no, iono i Matatias anak ri Absalom am i Judas anak ri Kalpi.

⁷¹Rinilak ri Jonatan bayang nano sabap ra nakaliman ra kaimbalaan, liliwa' napainggana' ra guang nakiasi' io.

⁷²Io pana siminaguli' namulunsar ra pantula' am nanganjung risilo saboi nagiru'.

⁷³Pakakito ra baal raginio, ulun-ulun nano ondo' tatanga' nagiru' siminaguli' am minaya' nangilou ra pantula' saboi ra nangkiman nilo giu' ra Kadis, am nangkim ra giu' no.

⁷⁴Orou raginio olo'-olo' 3,000 ngaulun saujor ru pantula' minatoi. I Jonatan pana siminaguli' ra Jirusalim.