Read Timugon Murut 1 MAKABI 12 Bible Online

1 MAKABI 12 - Timugon Murut bible

1 MAKABI 12

¹Paat ri Jonatan nagilong ra kaluagan ondo' moonsoi riso, nampili' io kukula' ngaulun am nanusub risilo mongoi ra Roma koson mapapiot am manalimbagu ra pabukatan ra ulun ru Roma.

²Nangator io niayuk ra surat-surat am bilin ondo' nogondo' giu' ra Sparta am kukula' intok ra bokon.

³Ulun-ulun sinusub no pana minongoi ra Roma. Minuma' ilo ra Dewan Pagun maayo am nambala' ra sinusub ilo ru Tingganai Maayo Imam i Jonatan am bansa' Jaudi ra bokon koson manalimbagu ra pabukatan am pagamungan ra Roma.

⁴Dewan Pagun maayo pana nangani' risilo ra surat-surat tayar ru tingganai-tingganai giu' ra pagun-pagun ondo' sinailan nilo, am kinitaak maa' raginio atarin ilo muli' ra pagun Judia ra maayag.

⁵Gitio noyo ralin ru surat ondo' inataran ri Jonatan ra ulun ru Sparta:

⁶“Tingganai Maayo Imam i Jonatan, Pasimpungan ru Ulun-ulun Matutuo, imam-imam am ngaangai' bansa' Jaudi, posoboyon ra pabukat-pabukat mai giu' ra Sparta, kaansayan!

⁷Ragili Raja' Ariios, raja' ru pabukat-pabukat nangator ra surat ri Onias, Tingganai Maayo Imam mai koson mambala' ra karuruo bansa' takau mabubukat. Ralin ru surat no pinaaya' mai ragiti.

⁸Ulun sinusub ri Raja' Ariios inuma' ri Onias ra maayo guang mangurumat, am surat ondo' nambala' ra pagamungan am pabukatan takau inapu no.

⁹Sotopot no pagamungan koson raginio kolondo' pakuan ramon, sabap ra nokoowot akai ra kaikangan intor ra Buuk Kitab ondo' soroi ramon.

¹⁰Kaa' nangkinam akai nangator ra surat ti niayuk koson manalimbagu ra pabukatan am pantutunan takau ra pabukat-pabukat, sabap ra kalo masaga' akai masauk ra ulun bansa' ra bokon ramuyun. Nabuoi noyo tupo ra kukula' ngambilor ra nakasail intor ra surat ondo' kasaa' no.

¹¹Buoi ti intor ra bilor ka bilor, makara' mai akau ra moonong ra kaluagan, paat ra pangiantakan-pangiantakan mai am orou-orou ra bokon paat ra akai nampataak ra taak simbalui am nakiasi', koson ra nontopot ra ondo' binaal ru ulun ra mabubukat.

¹²Naansukan akai sabap ra totopot nauligan kau.

¹³Motopot ra nailian mai masuang kapaganan am pangayawan sabap ra magail bulunsaron ru raja'-raja' ra mamaar ramon.

¹⁴Buoi ru pangayawan no marara' akai mantipagon ramuyun kapoam pagamung am rangan-rangan mai ra bokon,

¹⁵sabap ra nakaalap akai ra indangan ru Tuhan. Io noyo ondo' nangala ra pantula'-pantula' mai am namayag ramon intor risilo.

¹⁶Nampili' akai ri Numinius anak ri Antiokus am niayuk i Antipatir anak ri Jason am nanusub risilo mongoi ra Roma koson manalimbagu ra tutun ru pabukatan am pagamung mai ra ulun Roma.

¹⁷Ilo niayuk sinusub mai mongoi ramuyun koson mampasaboi ra ragu kaansayan mai, am surat ti intor ra panalimbaguan ra pabukatan takau.

¹⁸Kitaakon mai ra balasin min ginio.”

¹⁹Gitio noyo ralin ru surat ondo' ragili inataran nilo ri Onias:

²⁰“Raja' Ariios, raja' ru Sparta posoboyon ra Tingganai Maayo Imam Onias, kaansayan!

²¹Nakatuum akai rondo' dokumin intor ra ulun Sparta am ulun ru Jaudi ondo' nambala' ra mabubukat takau, am karuruo bansa' takau papag ri Abragam.

²²Intor ra akai nakapandai ra baal raginio, moogot akai makaalap ra tanou intor ra baal min.

²³Amon ru nakatampos kano mantayar ra ngaangai' rapu', bibiag tinambiag am tana' min, akai pana manulis ra nakatampos akai no mambaal koson raginio niayuk. Nanusub akai ra ulun mai mambala' ra baal raginio ramuyun.”

²⁴Norongog ri Jonatan ra panglima-panglima ru Raja' Dimitrius siminaguli' nababaya' ra saujor ondo' maayo poyo koson mangayou riso.

²⁵Marara' i Jonatan mangani' ra kaluagan risilo koson sumubol ra wilayah nano. Minugar boo ri Jonatan intor ra Jirusalim am naguma' risilo giu' ra libung Gamat.

²⁶Nanusub i Jonatan ra kukula' ngaulun pinansigo giu' ra pangkiman ru pantula'. Siminaguli' ilo am nambala' ra pantula' nakatampos mamulunsar ra ulun ru Jaudi paat ra rondom.

²⁷Pokotolop mato ru orou, nanusub i Jonatan ra ulun-ulun nano magalung ra nosorondom am naukop ra kinandoi mangayou, nakatampos manguma' ra pamulunsaran ru pantula' ra moonong saat. Pinaayan no niayuk ulun-ulun magalung giu' ra libung ru pangkiman.

²⁸Pokorongog saujor ru pantula' ra i Jonatan am ulun-ulun nano nakatampos noyo mangayou, nalaa' ilo kaga'. Nampaang ilo ra apui maayo no giu' ra pangkiman nilo am pagiru',

²⁹I Jonatan am ulun-ulun nano nakakito ra apui maayo no, kaa' suabon no ayuk ilo nakapandai ra atan ondo' nasauk.

³⁰I Jonatan pana nangilou risilo, kaa' kalo nasugut namparakop risilo, sabap ra nakalaup ilo noyo ra Sungoi Iliutirus.

³¹I Jonatan pana liminikou am namulunsar ra ulun Jabadi intor ra bansa' ru Arab. Kinala ilo am longgom nilo ginaau.

³²Kopongo raginio minugar poyo i Jonatan am minongoi ra Damsyik, am siminuku' ra titikop pagun.

³³Liliwa' raginio minongoi i Simon pangayou am nakajalai polos ra Askilon am kubu-kubu giu' ra mamaar no. Kopongo raginio liminikou io am sumuku' ra Jopi, rondo' bandar ra mokoondo' ra kubu, am nampaayan ra saujor nano koson magalung riso sabap nokorongog io noyo ra mamagun moogot mampataak ra bandar mokoondo' ra kubu no ra pulalai ru Raja' Dimitrius.

³⁴

³⁵Pakasaguli' i Jonatan giu' ra Jirusalim, nampiau io ra ulun-ulun matutuo ru mamagun am nangatang nababaya' risilo koson mambaal ra kubu-kubu giu' ra Judia,

³⁶kinasawat timbok-timbok ru Jirusalim am nambaal ra timbok mapatuliar ondo' masawat lolot ru kubu am bandar koson mampasuai ra kubu maa' raginio pantula' kalo makapantalan am mambali ra mamagun.

³⁷Mamagun naguguyu namiot ra pangampin ru bandar, sabap ra santayaran ra timbok tampilon ra sirangon giu' ra galur ru Limayak Kidron nalunsai noyo. Timbok giu' ra tampilon Kapinata niayuk musiti' punaan.

³⁸Nambaal niayuk i Simon saguli' ra bandar Adida giu' ra pipilon ru bulur. Bandar no piniot no am pinaatang no kulobon garabang am tataun pamiot ra kulobon.

³⁹Kopongo raginio minirot i Tripon koson mampaluir ra Raja' Antiokus maa' raginio io galama' masauk ra raja' ru Asia Kalasaan Rabugus.

⁴⁰Kaa' maimamang io ri Jonatan kalo mangiou, am mangayou riso. Ginio ra minongoi i Tripon ra Bit-Sian am kuayan mamparakop am mamatoi ri Jonatan.

⁴¹Minatong niayuk i Jonatan am 40,000 ngaulun saujor ondo' pinili' ra Bit-Sian koson muma' ri Tripon.

⁴²Pakakito ri Jonatan am saujor masuang koson raginio, kalo makakau' i Tripon mamparakop riso.

⁴³Inapu no boo i Jonatan ra maayo guang mangurumat, am pinaulig no io ra ngaangai' rangan nano. Inanian i Jonatan ra masuang tangguang. Ngaangai' rangan am pulalai nano pana sinusub gumagaya' ri Jonatan koson riso galama'.

⁴⁴Nangkuot io ri Jonatan, “Kua pantipagon kou ra ulun masuang raginio, alika kalo mangayou takau?

⁴⁵Moonsoi poyo susubon mu ilo muli'. Moonsoi noyo pilion mu kukula' ngaulun koson mayan mababaya' rirun, am baya' no ramon mongoi ra Ptolimais. Bandar no pataakon ku rirun, niayuk kubu-kubu am pulalai-pulalai ra bokon no am ngaangai' pagawai nano, sabap ginio noyo kuayan ru rinatangan kuti ragiti. Mopongo raginio muli' aku.”

⁴⁶Nangintopot i Jonatan ri Tripon am minaya' ra bilin nano. Nanusub io ra pulalai-pulalai nano muli' ra Judia.

⁴⁷3,000 ngaulun ayuk inibit nano, 2,000 ngaulun tinatang no ra Galilia, am 1,000 ngaulun ra bokon no minaya' riso.

⁴⁸Kaa' paat i Jonatan sumubol ra bandar Ptolimais, inangaban ru mamagun nano kulobon garabang. Rinakop i Jonatan am ngaangai' ulun minaya' riso pinatoi ra ilang.

⁴⁹I Tripon pana nangator ra pulalai ru saujor mantana' am pulalai mangkuda ra Galilia am giu' ra Limayak Jijriil koson mamuso ra ngaangai' saujor ri Jonatan.

⁵⁰Pulalai ru Jaudi nangkara' ra i Jonatan am ngaangai' minaya' riso rinakop noyo am pinatoi. Ilo pana nangikang ra guang ru rondo' am bokon am jiminalai ralalom ru suang ru saujor ondo' nakatampos mangayou.

⁵¹Pakakito pantula' ra ulun ru Jaudi nakatampos koson totopot mampatoi, lukiat ilo.

⁵²Ngaangai' ulun ru Jaudi nakasaboi ra Judia ra naayag kaa' nalaa' kaga'. Ngaangai' mamagun ru Israil nangulir ra mangiluk guang sabap nangkara' ra i Jonatan am ulun minaya' riso minatoi noyo.

⁵³Bansa'-bansa' ra mamaar nilo pana minirot koson mamuso ra ulun ru Jaudi. Nangkara' ilo, “Ulun ru Jaudi kolondo' tingganai kapoam mangindangan. Moonsoi noyo ra mangayou takau risilo maa' raginio maluus ilo.”