Read Timugon Murut 1 MAKABI 13 Bible Online

1 MAKABI 13 - Timugon Murut bible

1 MAKABI 13

¹Nokorongog i Simon ra i Tripon nanimung noyo ra saujor ondo' maayo ra kuayan sumubol ra pagun Judia am mamuso raginio.

²Nakapandai i Simon ra tanou no nampalaa' ra mamagun am nonontol. Io pana minongoi ra Jirusalim. Nanimung io ra ngaangai' mamagun,

³am mirot manimayo risilo ra mindagu, “Nakapandai kau ra mapara' boo suang ondo' binaal ru sasambaloi ru ama' kuno, pabukat-pabukat kuno am aku koson ra Ukum ri Musa am Baloi ri Aki Kapuuno'. Nakapandai kau niayuk intor ra ngaangai' pangayawan am kapaganan ondo' nailian mai.

⁴Ngaangai' pabukat kuno nangkinuo ra painawo nilo sabap ra Baloi ru Tuhan, Ukum am bansa' takau. Intor risilo aku ayuk ondo' lakat poyo naayag.

⁵Kaa' marara' aku mamayag ra inan galama' paat ra makalalaa' ra atan pana. Kalo nangkara' aku ra moonsoi aku poyo intor ra pabukat-pabukat kuno.

⁶Kabalu' pana masuang bansa' ondo' masisang ritakau naguguum noyo koson mamuso ritakau, mingkotog aku mampatoi koson manaung ra bansa' kuno, Baloi ru Tuhan am anak andu' min.”

⁷Pokorongog ra ragu-ragu raginio, guang ru mamagun maantak,

⁸am taam ilo ra mosongou kaga', “Kaayag i Simon, tingganai takau ondo' bagu, minalit ri Judas am i Jonatan!

⁹Paningganai no ramon ralalom pangayawan! Ngaangai' susuban muno baalon mai!”

¹⁰I Simon pana nanimung ra ngaangai' saujor am nalingas nomongo ra timbok-timbok ru Jirusalim am namiot ra ngaangai' pangampin nano.

¹¹Nangator io ri Jonatan anak ri Absalom am niayuk rondo' pulalai ru saujor ondo' maayo kaga' giu' ra bandar Jopi. Pinagiru' ri Jonatan mamagun nano, am io galama' pana namagun ra giu' no.

¹²Liliwa' raginio i Tripon am rondo' pulalai ru saujor ondo' maayo nangiruan ra bandar Ptolimais koson mamulunsar ra pagun Judia. I Jonatan boborok ri Simon inibit koson ra ulun rinakop.

¹³Paat raginio nangkim i Simon mamaar ra bandar Adida giu' ra igig ru tana' marata'.

¹⁴Pokorongog i Tripon ra minalit noyo i Simon ri Jonatan boborok nano, am ra nakatampos io noyo koson mangayou riso, nangator io ra bilin nano ri Simon,

¹⁵“Rinakop mai i Jonatan, boborok muno sabap paat makakandoi, kalo nambayar io ra utang-utang nano ra upis kausinan ru pamarintaan.

¹⁶Kaa' palabuson mai io amon ru bayarin mu 3,000 ngakilogram pirok ramon am mangator ruo ngaulun anak ungkuyon nano koson ra ulun rinakop koson jamin ra kalo gumuor io ramon malupus io palabuson.”

¹⁷Kabalu' pana nakapandai i Simon ra rinuung io, nangator io niayuk ra ruit no am karuruo ngaulun anak ri Jonatan, sabap marara' io mapasingkual ra guang masisang intor ra mamagun.

¹⁸Malaa' io risilo mindagu ra i Jonatan pinatoi sabap ra i Simon marara' mangator ra ruit am karuruo ngaulun anak nano.

¹⁹Binaya' no kinitaak ri Tripon, kaa' liminungkang i Tripon ra bantu' nano am kalo nampalabus ri Jonatan.

²⁰Kopongo raginio jiminalai i Tripon minaya' ra ralan bokon minongoi ra Adora koson manguasa' am mamuso ra pagun no. Kaa' i Simon am saujor nano nongompong riso ra ati ayuk pana angayan ri Tripon.

²¹Liliwa' raginio saujor ru pantula' giu' ra kubu ru Jirusalim nangator ra ulun-ulun sinusub mongoi ri Tripon koson mampajajal riso maa' raginio mataki' matong mansail ra tana' kaagisan am magibit ra lutu' ra tayar nilo.

²²Tinampos ri Tripon ngaangai' pulalai mangkuda nano koson mugar intor ra giu' no. Kaa' rondom raginio riminatu' ais batu ra maawas kaga' saboi kalo makaugar ilo. I Tripon pana liminugut am minongoi ra Giliad.

²³Paat ilo mamaar noyo ra bandar Baskama, pinatoi ri Tripon i Jonatan, am baangkai nano linobong ra giu' no.

²⁴Kopongo raginio naruli' i Tripon am minuli' ra pagun nano.

²⁵I Simon pana nanusub ra kukula' ngaulun nagibit ra baangkai ri Jonatan giu' ra Modiin, maa' raginio maalap kolobong giu' ra bandar ru kinamatuaan nano.

²⁶Ngaangai' bansa' ru Israil mangiluk kaga' guang nanulaboi ri Jonatan, am nangulir ilo ra nabuoi kaga'.

²⁷Kopongo raginio giu' ra rasawat ru kalabangan ru ama' am pabukat-pabukat nano, pinatirong ri Simon rondo' batu pangkaraan ondo' masawat ondo' makito intor ra maalur. Tampilon ra pagulu am talikuron nano inangkupan ra batu ondo' inasa'.

²⁸Io pana nambaal niayuk ra tulu' piramid ondo' nataluma' rondo' am bokon tayar ru ama' am ina' nano am niayuk kaapat-apat ngaulun pabukat nano.

²⁹Giu' ra liliut ru piramid-piramid no pinatirong no lugu'-lugu' maayo. Giu' ra rasawat no mokoondo' ra inukiran ra kaukapan ru kinandoi mangayou am giu' ra kiing nano inukiran ra kapal-kapal. Batu pangkaraan no binaal koson ra pangkaraan koson mantilayun, maa' raginio makito ru ngaangai' ulun ondo' masundoi giu' ra raat.

³⁰Lobong ondo' binaal ri Simon giu' ra bandar Modiin lakat poyo soroi saboi raino.

³¹Liliwa' raginio liminaat i Tripon ra Raja' Antiokus ondo' Koonom, raja' ondo' lakat poyo mamulok no, am namatoi riso.

³²I Tripon pana nanturung ra kurisi' ru pamarintaan ru Asia Kalasaan Rabugus am namparatong ra kajajawan ra wilayah raginio.

³³Binaal ri Simon kukula' kubu giu' ra pagun Judia am inukapan no ra manara-manara ondo' masawat, timbok-timbok ondo' maikang am kulobon garabang am tataun pamiot ra kulobon. Pinatuntur no niayuk ula' ru akanon giu' ra ralalom no.

³⁴Io pana nangator ra ulun sinusub ra Raja' Dimitrius ondo' Karuo koson makitaak maa' raginio wilayah no palabuson intor ra cukai, sabap i Tripon mampagaau ayuk risilo.

³⁵Nangator Raja' Dimitrius ra taam ragitio:

³⁶“Raja' Dimitrius posoboyon ra Tingganai Maayo Imam i Simon, am rangan ru raja'-raja', posoboyon ra bansa' Jaudi am tingganai-tingganai nilo, kaansayan!

³⁷Nakaapu akai noyo ra karaun mas am tanggayan palma ondo' inataran muli. Nakatampos akai noyo mambaal ra nabantuan rirun am manulis ra pagawai-pagawai ru cukai maa' raginio mangani' ra kalabusan intor ra cukai.

³⁸Ngaangai' ondo' inaru' mai ragili ramuyun parayuson masauk, am kubu-kubu ra binaal min masauk ra longgom min.

³⁹Ngaangai' sala' pangaratian am kalungkangan ondo' binaal min saboi raino, inampun mai. Palabuson mai niayuk okou intor ra cukai ru pamarintaan ondo' lakat poyo musiti' muno bayarin am intor ra cukai-cukai ra bokon ondo' saboi raino luluron giu' ra Jirusalim.

⁴⁰Ngaangai' ulun ru Jaudi ondo' maaya', iowon pasubolon ra kandoi magalung ramon ayuk. Ibok kaayag takau ra mobobonsoi.”

⁴¹Ralalom boo ru bilor 170[30] bansa'-bansa' ra bokon liminonggo' nangimbolo' ra ulun ru Jaudi.

⁴²Intor raginio ralalom tumalimpuun naskhah-naskhah am surat-surat nabantuan, ulun ru Jaudi tumalimpuun manulis ra ragu-ragu: “Ralalom bilor kasaa' ru pamarintaan ri Simon, Tingganai Maayo Imam ondo' maayo, panglima am panguasa' ru ulun ru Jaudi.”

⁴³Paat raginio i Simon am saujor nano nagawang ra bandar Gijir. Binaal no rondo' kuliamos mangayou ondo' makabanding-banding. Kuliamos no pinalampit ra timbok ru bandar. Jinunjung no am kinuasa' no rondo' ra manara ru bandar no.

⁴⁴Ulun ondo' soroi giu' ra rasawat ru kuliamos mangayou no timinindak ra ralalom ru bandar am napatabual ra kajajawan maayo.

⁴⁵Mamagun ru bandar, ungkuyon, ruandu' am lalaing-lalaing nagaloi ra rasawat ru timbok am namparilak ra bayang nilo koson tatandu' mangiluk. Gogolok ilo nakimobonsoi ri Simon am ilo.

⁴⁶Pampiau ilo, “Pakaasi' no ramon! Pai' balasi' kalaatan mai!”

⁴⁷I Simon pana nobonsoi risilo am kalo nangayou risilo. Kaa' napagiru' io ra mamagun ru bandar am namasau ra baloi-baloi nilo intor ra sinungkalalaing. Kopongo raginio io am ulun-ulun nano siminubol ra bandar liliwa' narimbai ra rimbai mongompor.

⁴⁸Ngaangai' ondo' nampajamol ra bandar pinatiran no, am pinaayan no ra giu' no ulun ondo' gumagaya' ra Ukum ri Musa. Io niayuk namiot ra pangampin ru bandar am nambaal rondo' istana nano galama'.

⁴⁹Liliwa' raginio saujor nano ondo' minayan ra kubu giu' ra Jirusalim kalo makaingkual mongoi ra libung kapoam sumaguli' koson mantalan am mambali. Natutusan ilo kaga' ra akanon, am masuang kaga' intor risilo minatoi ra naitilan.

⁵⁰Pupus no nakimobonsoi ilo ri Simon. Nangiou io, kaa' pinagiru' ilo intor ra giu' no, am kubu no kinapasau intor ra ngaangai' jamol.

⁵¹Paat ra orou ruo ngoopor am talu ra sila' karuo bilor 171[31] i Simon am ulun-ulun nano siminubol ra kubu no. Nagibit ilo ra raun palma am narimbai ra rimbai mongompor am maringkuanang am kinulian ra jitor, simbal am dandi, sabap ra pantula' maayo ru Israil pinuso noyo.

⁵²Inaru' ri Simon ra moonong bilor orou raginio musiti' iantakon ra maansukan. Kopongo ragino piniot pangampin ru bulur ru Baloi ri Aki Kapuuno' ondo' nakatingkuang ra kubu. Io am ulun-ulun nano pana namagun ra giu' no.

⁵³Liliwa' raginio i Juanis anak ri Simon nasukor noyo, i Simon pana nampasauk riso ra panglima ru ngaangai' pulalai mangayou. Namagun i Juanis giu' ra Gijir.