Read Timugon Murut 1 MAKABI 14 Bible Online

1 MAKABI 14 - Timugon Murut bible

1 MAKABI 14

¹Ralalom bilor 172[32] Raja' Dimitrius ondo' Karuo nanimung ra saujor nano, am minongoi ra Midia naguyum ra indangan koson mangayou ri Tripon.

²Paat i Arsakis ondo' Koonom, raja' ru Pirsia am Midia nokorongog ra Raja' Dimitrius siminubol noyo ra wilayah nano, nangator io sangulun panglima am kukula' ngaulun pulalai koson mamparakop ra Raja' Dimitrius ra maayag.

³Saujor ru Raja' Dimitrius binulunsar am kinala. Raja' Dimitrius galama' rinakop am inibit minuma' ra Raja' Arsakis am inaput.

⁴Buoi ru pamarintaan ri Simon, pagun ru Judia namimio. Piniratan no kaansayan ru bansa' nano. Pamarintaan nano kasagain ru ulun kinuasa' nano, am io inurumat buoi ru bayag nano.

⁵Jopi rondo' bandar raralan ru kapal kinuasa' no, saboi inukab ralan sumuku' ra kapuluan Junani. Binaal moonsoi ri Simon no nambaal riso ra nauligan poyo kaga'.

⁶Kinalangka' ri Simon wilayah ru bansa' nano am nanguasa' ra titikop pagun.

⁷Masuang ulun rinakop ra pangayawan inibit no minuli'. Gijir, Bit-Jur am kubu giu' ra Jirusalim kinuasa' no. Kubu no kinuasa' no intor ra ngaangai' jamol, am kolondo' sangulun pana makaanggal riso.

⁸Nangandoi ulun ru Jaudi ra tana' nilo ra moonsoi am mamimio. Tana' pana makaampos am puun-puun tataun nangkawa' ra maawas.

⁹Ungkuyon-ungkuyon mamulok nambayang ra bayang sarampun ru saujor ondo' moonsoi kaga', kaa' ulun-ulun matutuo mantuturung giu' ra rondo' intok mindagu ra bulintok ondo' moonsoi no.

¹⁰Inula' i Simon akanon tayar ru bandar-bandar am inukapan no ra pangampin ondo' maikang. Io ra nauligan kaga' no giminaai giu' ra titikop pagun.

¹¹Nangani' io ra kaansayan ra bansa' nano, saboi naansukan ilo kaga'.

¹²Moonong ulun maayag ra moonsoi giu' ra saau ru puun ru anggur am puun ru ara nano, am kolondo' mampakalaa' risilo.

¹³Ngaangai' raja' ondo' mantula' risilo kinala noyo, am giu' ra pagun no kolondo' ondo' mangayou ra ulun ru Jaudi.

¹⁴Nangindangan i Simon ra masuang ulun sabansa' riso ondo' musikin. Giminagaya' io ra Ukum ri Musa am namuso ra ngaangai' ulun malaat am minanggal ra ukum.

¹⁵Baloi ru Tuhan kinaindon no. Io niayuk namparuang ra masuang kaga' kuliamos koson pakuan ru sambayang.

¹⁶Tanou intor ra pinatayan ri Jonatan nampangiluk kaga' ra guang ru ulun ru Roma am Sparta.

¹⁷Kaa' pokorongog ulun Sparta ra i Simon namalit ra boborok nano koson ra Tingganai Maayo Imam, am ra nanguasa' io ra titikop ru pagun am ngaangai' ru bandar nano,

¹⁸nanulis ilo ri Simon koson manalimbagu ra pabukatan am pabukatan ragili binaal nilo ri Judas am i Jonatan, pabukat-pabukat nano. Surat ondo' inukir ra sampila' tambaga'

¹⁹binasa' ra pantuuman ru mamagun giu' ra Jirusalim.

²⁰Gitio noyo ralin ru surat ondo' inataran ru ulun Sparta: “Mamagun ru Sparta am tingganai-tingganai nano posoboyon ra Tingganai Maayo Imam i Simon, tingganai-tingganai am imam am niayuk ngaangai' mamagun ru Jaudi, pabukat-pabukat mai, kaansayan!

²¹Ulun-ulun sinusub min minongoi ra mamagun mai nambala' ra akau ngaangai' totopot nauligan am urumaton. Rinatangan nilo napabansuk kaga' ramon.

²²Pambalaan nilo tinulisan mai noyo ralalom namatasan ra pantuuman ru mamagun koson ragitio: ‘Numinius anak ri Antiokus am i Antipatir anak ri Jason, ulun sinusub ra maatang kaga' ra bansa' Jaudi, minatong ramon koson manalimbagu ra pabukatan mai.

²³Pantuuman ru mamagun masaga' mangapu risilo ra maayo guang mangurumat am namparalin ra pambalaan nilo ralalom piagam ru bandar koson ra pangkaraan ra tayar ru mamagun Sparta. Ralin intor ra dokumin no binaal tayar ru Tingganai Maayo Imam i Simon.' ”

²⁴Kopongo raginio nanusub i Simon ri Numinius minongoi ra Roma am nagibit ra tangguang perisai mas ondo' maayo am bagat no 44 ngakilogram koson mamiot ra pabukatan ra ulun ru Roma.

²⁵Pokorongog mamagun ra ngaangai' kasaukan no, indagu ilo, “Ati kulaan mai makapambalos ra binaal moonsoi ri Simon am anak-anak nano?

²⁶Io am pabukat-pabukat nano am ngaangai' sasambaloi ru ama' nano iono ulun ondo' baani kaga'. Pinagiru' nilo noyo ngaangai' pantula' takau am jamin ru kalabusan ru bansa' takau.” Ginio ra nanulis ilo ra sampila' tambaga' ondo' tinair ra batu-batu pangkaraan giu' ra Bulur Sion.

²⁷Gitio noyo suang ru tinulisan no: “Paat ra orou koopor am balu' sila' Ilul ra bilor 172,[33] iono bilor katalu ra pamarintaan ru Tingganai Maayo Imam i Simon giu' ra Asaramil,

²⁸ralalom pantuuman maayo ru imam-imam am mamagun, tingganai-tingganai ru bansa' am ulun-ulun matutuo, pinatanou baal-baal ragitio:

²⁹Moonong makamasauk ra pangayawan ra pagun ti, i Simon anak ri Matatias papag ri Joarib am pabukat-pabukat nano nangkinuo ra painawo nilo koson mamayag ra Baloi ri Aki Kapuuno', bansa' am Ukum takau ra pantula'. Nagibit ilo ra pangurumatan maayo ra bansa' takau.

³⁰Pinasimpung noyo ri Jonatan bansa' takau am nasauk ra Tingganai Maayo Imam saboi io minatoi.

³¹Kopongo raginio pantula' masaga' mampajunjung am mamuso ra pagun ti am niayuk mampajamol ra Baloi ri Aki Kapuuno'.

³²Kaa' kiminakat i Simon am nangayou tayar ru bansa' takau. Masuang kaga' ruit nano pinaindangan no koson mampakan am kaukapan ru kinandoi mangayou ra pulalai mangayou ru pagun.

³³Bandar-bandar giu' ra Judia kinapiot no, mulu' poyo giu' ra Bit-Jur giu' ra balitan, ondo' ragili nasauk ra intok nambulian ra kinandoi mangayou ru pantula'. Pinaayan no boo rondo' pulalai ru Jaudi koson mayan ra bandar no.

³⁴Piniot no poyo bandar raralan ru kapal Jopi am bandar Gijir giu' ra balitan Asdod ondo' ragili minayan saujor ru pantula'. Giu' ra bandar-bandar no pinaayan no ulun ru Jaudi, am inukapan ilo ra atan ayuk ondo' makapakuan risilo koson mambaal saguli' ra bandar no.

³⁵Pakakito mamagun ra gagaya' ri Simon am ngaangai' ru pinirot nano koson ra kasugutan ru bansa' nano, pinasauk io ra Tingganai Maayo Imam am tingganai nilo. Baal raginio binaal nilo sabap ra binaal-binaal moonsoi am gagaya' nano, sabap ra pinaugar no katimpakan am ralalom ru ngaangai' baal minirot koson mampasingkot ra intok ru bansa' nano.

³⁶Ralalom pamarintaan nano nakasugut i Simon namuso ra ulun bansa' ra bokon intor ra pagun Judia, niayuk saujor ru pantula' ondo' minayan giu' ra kubu giu' ra Jirusalim am ondo' maindalom mingkual intor ra giu' koson mampajamol ra liliut ru Baloi ri Aki Kapuuno'.

³⁷Pinaayan no boo ulun ru Jaudi giu' ra kubu no am piniot no niayuk sabap ra kaansayan ru bandar Jirusalim am titikop pagun. Timbok-timbok ru Jirusalim kinasawat no.

³⁸Sabap ra ngaangai' binaal moonsoi no, Raja' Dimitrius nangapu riso koson ra Tingganai Maayo Imam.

³⁹Mangurumat kaga' raja' ri Simon am nangani' riso ra panabitan Rangan ru Raja'.

⁴⁰Baal raginio binaal no sabap ra nokorongog io ra ulun ru Roma manabit ra ulun ru Jaudi rangan, pagamung am pabukat nilo. Io niayuk nokorongog ra ulun sinusub ri Simon inuma' ra maayo urumat giu' ra Roma.

⁴¹Mamagun ru Jaudi am imam-imam nilo masaga' mampasauk ri Simon am papag nano ra tingganai am Tingganai Maayo Imam nilo, saboi minatong sangulun nabi ondo' maintopot.

⁴²Pinasauk i Simon ra panguasa' ru pagun am panglima ru saujor. Makakuasa' io mampasauk ra ulun ondo' lansanin ra kaukapan ru kinandoi mangayou ru saujor am bandar-bandar mokoondo' ra kubu, tingganai ru kandoi nasuangan am pamarintaan ru libung. Io niayuk inanian ra kuasa' koson manalingapu ra Baloi ri Aki Kapuuno'.

⁴³Ngaangai' ru mamagun musiti' gumagaya' riso ralalom ru ngaangai' baal. Ngaangai' surat nabantuan ru pagun musiti' baalon ralalom ru inggalan nano. Inanian io ra kuasa' koson mambayang ra bayang ru pamarintaan am butang mas.

⁴⁴Kolondo' sangulun pana intor ra mamagun kapoam imam ondo' makakuasa' koson sulangon rorondo' kapatasan-kapatasan no kapoam manggal ra susuban ri Simon. Inggalarin niayuk mambaal ra pantimungan giu' ra pagun ra kolondo' pangiawan nano, kapoam mambayang ra bayang ru pamarintaan am butang mas.

⁴⁵Osoi ayuk kalo mampalio kapoam gumagaya' ra aturan-aturan no ukumin.

⁴⁶Ngaangai' ru mamagun nangiou mangani' ra kuasa' ri Simon koson mambaal ra matanda' ra ngaangai' ru pamatasan no.

⁴⁷I Simon pana nangapu raginio am nakatampos sumauk ra panguasa' masawat kaga', Tingganai Maayo Imam, panglima ru saujor am tingganai ru mamagun am niayuk imam-imam.”

⁴⁸Pinatas boo koson ukiron pinabala' no ra sampila' tambaga' am paatangon ginio giu' ra intok ondo' mataki' makito giu' ra intok Baloi ri Aki Kapuuno'.

⁴⁹Ralin nano buliin giu' ra intok kausinan Baloi ri Aki Kapuuno' tayar ri Simon am anak-anak nano.