Read Timugon Murut 1 MAKABI 16 Bible Online

1 MAKABI 16 - Timugon Murut bible

1 MAKABI 16

¹I Juanis anak ri Simon nangiruan ra bandar Gijir koson mambala' ra ama' nano atan ondo' binaal ri Kindibius.

²I Simon pana mindagu ri Juanis am i Judas karuruo ngaulun anak nano ondo' katuaan, “Ngaangai' sasambaloi ru ama' kuno, pabukat-pabukat kuno am aku galama' saboi matoi mangayou tayar ru Israil. Ruruli' akai makasugut mampalabus ra Israil.

³Raino matutuo aku noyo. Kaa' barakat ru asi' ri Aki Kapuuno', akau raino nasukor noyo. Akau musiti' malit raki' am boborok kuno koson mangayou tayar ru bansa' takau. Gama' ru i Aki Kapuuno' galama' mangindangan rirun.”

⁴Kopongo raginio nampili' i Juanis ra 20,000 ngaulun saujor am pulalai mangkuda intor ra pagun no, am nangayou ilo ri Kindibius. Nombolong ilo giu' ra Modiin.

⁵Suabon no riminondom ilo minugar minongoi ra tana' marata'. Giu' no minatong risilo masuang kaga' pulalai mangkuda am pulalai ru saujor mantana', kaa' lolot ru karuruo pulalai no mokoondo' rondo' sungoi.

⁶I Juanis am pulalai nano nangkim natuma' ra pulalai ru pantula'. Pakakito i Juanis ra saujor-saujor nano malaa' lumaup ra sungoi, io galama' nagulu liminaup. Pakakito ra baal raginio ulun-ulun nano siminunu'.

⁷I Juanis pana nantayar ra saujor nano. Pinaayan no pulalai mangkuda giu' ra tatanga' ru pulalai ru saujor ra mantana', sabap ra pulalai mangkuda ru pantula' masuang kaga'.

⁸Bujung tatandu' mangayou sinamputan. I Kindibius am saujor nano nakiala am masuang intor risilo napilatan. Saujor ra bokon nagiru' ra kubu nilo giu' ra Kidron.

⁹I Judas boborok ri Juanis napilatan ralalom ru pangayawan, kaa' narayus i Juanis nangilou ra pantula' polos ra bandar Kidron ondo' binaal noyo saguli' ri Kindibius.

¹⁰Saujor ru pantula' niayuk nagiru' ra manara-manara giu' ra umo-umo ri Asdod, kaa' sinolob ri Juanis ginio saboi napuso. Paat ra orou raginio olo'-olo' 2,000 ngaulun saujor ru pantula' napuso, am i Juanis siminaguli' ra naayag giu' ra Judia.

¹¹Tingganai Maayo Imam i Simon nampasauk ri Ptolimius anak ri Abub ra panglima giu' ra tana' marata' Jiriko. Langkaya' kaga' i Ptolimius,

¹²sabap ra io anak mangiwan ri Simon.

¹³Kaa' liminimbau io am moogot manguasa' ra titikop pagun. Ginio ra nangkara' io ra rondo' inatangan malaat koson mamatoi ri Simon am anak-anak nano.

¹⁴Rondo' paat i Simon nabaya' ra karuruo ngaulun anak nano, i Matatias am i Judas tatanga' minongoi ra bandar-bandar giu' ra wilayah nano koson magilong ra ondo' pakuan ru bandar-bandar no. Ralalom ru sila' Syibat, iono sila' koopor am rondo' ru bilor 177,[35] nakasaboi ilo ra bandar Jiriko.

¹⁵Nabaya' ra guang malaat i Ptolimius nangapu risilo giu' ra kubu boborok ininggalanan ra Dok ondo' binaal no galama'. Nambaal i Ptolimius ra bunsag maayo tayar nilo, kaa' sisinok io nampasibuni ra kukula' ngaulun saujor ra giu' no.

¹⁶Paat i Simon am karuruo ngaulun anak nano nagauk, bigor i Ptolimius am ulun-ulun nano, nangalap ra kinandoi mangayou nilo am namulunsar ri Simon giu' ra intok pagakanan. Namatoi ilo ri Simon, karuruo ngaulun anak nano am kukula' ngaulun minaya'.

¹⁷Koson raginio noyo i Ptolimius nambaal ra kalaatan maayo am nambalos ra moonsoi ra kalaatan.

¹⁸Kopongo raginio nanulis i Ptolimius ra pambalaan intor ra atan ondo' binaal nano am nangator ra raja'. Nakitaak io maa' raginio mangator ra pulalai koson mangindangan riso am maa' raginio pagun no am bandar-bandar no pataakon riso.

¹⁹Nanulis io niayuk posoboyon ra tingganai-tingganai ru pulalai maa' raginio maya' ilo riso nabaya' ra bantu' mangani' ra tangguang ru mas am pirok am niayuk tangguang-tangguang ra bokon risilo.

²⁰Io pana nanusub ra kukula' ngaulun minongoi ra Gijir koson mamatoi ri Juanis. Io niayuk nangator ra kukula' ngaulun ra bokon koson mampagaau ra Jirusalim am Bulur ru Baloi ri Aki Kapuuno'.

²¹Kaa' sangulun nagiru' pagulu ra Gijir am nambala' ri Juanis ra ama' am pabukat-pabukat nano minatoi ra pinatoi, am ra nangator i Ptolimius ra ulun koson mamatoi niayuk riso.

²²Nakatigog kaga' i Juanis nokorongog ra tanou no. Kaa' sabap binalaan noyo galing, naalap no karakop am namuso ra pulalai ru ulun ondo' inataran koson mamatoi riso.

²³Tunggul intor ra tunung ri Juanis, pangayawan nano, kinapanggol nano tumula', ati kulaan io nambaal saguli' ra timbok-timbok ru bandar am intor ra binaal-binaal moonsoi nano ra bokon,

²⁴ngaangai' no tinulisan ra tunung ru pamarintaan nano koson ra Tingganai Maayo Imam nalupus ama' nano.