Read Timugon Murut 1 MAKABI 2 Bible Online

1 MAKABI 2 - Timugon Murut bible

1 MAKABI 2

¹Paat raginio sangulun imam intor ra sasambaloi ri Joarib ondo' inggalan no i Matatias, anak ri Juanis, akupu ri Simion, minanding intor ra Jirusalim am namagun giu' ra bandar Modiin.

²I Matatias mokoondo' limo ngaulun anak: I Juanis ondo' sabiton ri Gadi,

³i Simon ondo' sabiton ri Tasi,

⁴i Judas ondo' sabiton ri Makabi,

⁵i Iliajar ondo' sabiton ri Abaran, am i Jonatan ondo' sabiton ri Appus.

⁶Paat ri Matatias nagilong ra ngaangai' nanjamalan ondo' binaal giu' ra Judia am giu' ra Jirusalim,

⁷kono, “Aibui boo raki' ti! Kua anako' aku koson magilong ra karatuan ru bansa' kuno am bandar matulai? Musiti' kia mongkoror aku ayuk liliwa' bandar no pataakon ra pantula' am Baloi ru Tuhan maratu' ra kalindu' ru ulun bansa' ra bokon?

⁸Baloi ri Aki Kapuuno' koson ra ulun ondo' kolondo' pangurumatan;

⁹kuliamos suang nano ondo' moonsoi nakai' tinakou. Anak-anak takau pinatoi giu' ra ralan-ralan, kamulakan ungkuyon takau pinuso ru ilang ru pantula'.

¹⁰Kuasa' ru Jirusalim tinalingaau noyo am rapu' nano tinakou ru ngaangai' bansa'.

¹¹Ngaangai' kuliamos pinamunga' inalap noyo; natatakan io ra kalabusan nano am nasauk ra ulipon.

¹²Ilai' noyo intok matulai; ngaangai' ondo' moonsoi am matulai ra tayar takau jinamalan am linunsai ru ulun bansa' ra bokon.

¹³Atan nua' boo onong ru kaayagan ra tayar takau?”

¹⁴Rilako' boo ri Matatias am anak-anak nano bayang nilo sabap ra mangiluk guang am nambayang ra konoon karung tatandu' mangulir.

¹⁵Pagawai-pagawai ru raja' ondo' pinangandoi koson mampajajal ra ulun ru Jaudi mangiruan ri Aki Kapuuno', minatong ra Modiin koson mampataak ra taak simbalui ra dewa-dewa.

¹⁶Masuang ulun ru Israil minuma' risilo. I Matatias am anak-anak nano minaya' timinimung.

¹⁷Pagawai-pagawai ru raja' minindagu ri Matatias, “Okou sangulun tingganai ondo' maayo am urumaton kaga' ra bandar ti am sinungka' ru anak-anak am ngaangai' ru pabukat muno.

¹⁸Okou tupo masauk ra ulun kasaa' ondo' mambaal ra susuban ru raja'. Ngaangai' bansa' ra bokon, mamagun ru Judia, am niayuk ngaangai' ulun ondo' lakat poyo minayan giu' ra Jirusalim nambaal noyo raginio. Amon maya' kou, okou am anak-anak muno aniin ra panabitan ‘Rangan ru Raja'’ am urumaton ra aniin ra mas, pirok am masuang taak ra bokon.”

¹⁹Taam i Matatias ra bolos mosongou, “Polosoon ngaangai' bansa' ralalom pamarintaan ragitio gumagaya' ra raja' am mangiruan ra ugama ru kinamatuaan nilo.

²⁰Aku, anak-anak kuno, am ngaangai' pabukat kuno magulayun gumagaya' ra nabantuan ondo' binaal ri Aki Kapuuno' am kinamatuaan mai.

²¹Ralalom indangan ri Aki Kapuuno', magulayun akai mampaguut ra Ukum am susuban-susuban Nano.

²²Marara' akai gumagaya' ra susuban ru raja' am marara' sumiang sanganu pana intor ra ralan akai sumambayang.”

²³Kopongo ayuk io minindagu, sangulun ru Jaudi intor ra Modiin minongoi ra saang ru ulun masuang koson mampataak ra taak simbalui giu' ra rasawat ru altar, topot koson ra susuban ru raja'.

²⁴Paat nakakito ra ulun no, siminangit kaga' i Matatias. Sangit nano nasimbulukan saboi inan nano monontol. Jalai io am pamatoi ra ulun no mamaar ra altar.

²⁵Pagawai ru raja' ondo' nampajajal ra ulun mampataak ra taak simbalui pinatoi no niayuk. Io pana nampalunsai ra altar no.

²⁶Ralan raginio noyo i Matatias nampakito ra maayo guang nano koson magalung ra Ukum, koson ondo' binaal ri Pinigas paat namatoi ri Jimri anak ri Salom.

²⁷Kopongo raginio liniput ri Matatias bandar liliwa' gumolok, “Osoi ondo' gumagaya' ra nabantuan ri Aki Kapuuno' am moogot gumagaya' ra Ukum Nano, maya' raki'!”

²⁸Io am anak-anak nano pana nangiruan ra ngaangai' longgom nilo giu' ra bandar am nagiru' giu' ra kagunungan.

²⁹Paat raginio mokoondo' masuang ulun ru Israil ra bokon ondo' moogot magalung ra pabukatan moonsoi ri Aki Kapuuno' am gumagaya' ra Ukum Nano. Nagibit ilo ra anak andu' am niayuk bibiag tinambiag nilo am nagiru' ra tana' kaagisan maa' raginio makainggalur intor ra kaimbalaan ondo' maagat.

³⁰

³¹Kalo nabuoi nalupus pagawai-pagawai ru raja' am pulalai giu' ra kubu giu' ra Jirusalim binalaan ra masuang ulun ondo' minanggal ra susuban ru raja' nagiru' noyo koson nansibuni giu' ra tana' kaagisan.

³²Rondo' pulalai maayo nangilou am nakatuum risilo. Nangkim ilo nantaluma' ra ngaangai' ulun ru Jaudi no am timinampos koson mamulunsar risilo paat ra orou Sabat.

³³Galaki' nilo ulun ru Jaudi, “Sama' noyo raino! Ingkual! Gagaya' kano ra susuban ru raja' maa' raginio maayag kau!”

³⁴Taam ilo, “Kalo! Marara' akai mingkual koson gumagaya' ra susuban ru raja'. Marara' akai manggal ra aturan ru orou Sabat!”

³⁵Nataki' saujor-saujor napatalimpuun mamulunsar risilo,

³⁶kaa' ulun ru Jaudi kalo minanggal risilo ra sanganu pana. Kalo binobol nilo pantula' nilo ra batu kapoam nongompong ra ralan giu' ra intok-intok nansibunian nilo.

³⁷Konilo, “Akai ngaangai' matoi ra guang mapasau. Polosoon limbowon am tana' ti masauk ra sasi' ra akau namatoi ramon ra kalo matimpok.”

³⁸Ilo pana binulunsar ru pantula' paat ra orou Sabat. Olo'-olo' saribu ngaulun minatoi, nakaaya' ungkuyon, ruandu' am anak-anak am niayuk bibiag tinambiag nilo.

³⁹Pokorongog ra tanou raginio, i Matatias am rangan-rangan nano mangiluk kaga' guang

⁴⁰am nagindagu ra ilo galama', “Amon ru itakau ngaangai' nambaal koson ra pabukat-pabukat takau am marara' tumula' ra ulun bansa' ra bokon koson mangampin ra painawo am ugama takau, maaru' kalo boo mabuoi maluus takau intor ra tana' ti.”

⁴¹Paat orou raginio namatas ilo koson manggal paat ilo bulunsaron ra orou Sabat, maa' raginio kalo matoi ilo ngaangai' koson ra pabukat-pabukat nilo ondo' nakai' pinatoi giu' ra intok nansibunian nilo.

⁴²Kopongo raginio i Matatias am ulun-ulun nano binaya' ru santimung ulun ondo' mangandoi ayuk ri Aki Kapuuno' am sabiton ra ulun Mursyid, ulun ru Israil ondo' maikang kaga', am osoi ayuk ondo' masaga' magalung ra Ukum.

⁴³Suai raginio moonong ulun ondo' nagiru' intor ra kaimbalaan, minaya' amung risilo koson mampaikang ra pulalai nilo.

⁴⁴I Matatias pana nambaal ra rondo' pulalai saujor am ra sangit nano namulunsar ra ulun ru Jaudi ondo' makatula am minanggal ra Ukum. Ilo ondo' nakalabus musiti' magiru' ra bansa' ra bokon maa' raginio maayag.

⁴⁵I Matatias am rangan-rangan nano minongoi giu' ra ngaangai' intok am nampalunsai ra altar-altar ru ulun bansa' ra bokon.

⁴⁶Moonong anak ungkuyon ondo' mapandayan kalo poyo nasunatan giu' ra wilayah ru Israil, jajalin nilo sunati'.

⁴⁷Nakasugut ilo niayuk nampagiru' ra pagawai-pagawai bansa' bokon ondo' liminimbau no.

⁴⁸Inalungan nilo Ukum ri Musa intor ra ulun bansa' bokon am niayuk raja'-raja' nilo, am namandak ra kuasa' ru Raja' Antiokus.

⁴⁹Paat ri Matatias maar noyo matoi, indagu io ra anak-anak nano, “Bulintok raino ti nototop ra kajajawan am kalaatan. Ulun liminimbau nampaguut ra kuasa' am sinauk takau ra kukuritin.

⁵⁰Kaa' akau, anak-anak kuno, musiti' gumagaya' ra ukum am tumampos matoi koson magalung ra nabantuan ri Aki Kapuuno' am kinamatuaan takau.

⁵¹Karaa' noyo atan ondo' binaal ru kinamatuaan takau paat ra galing. Baya' kano ra binaal moonsoi nilo, am akau pana makaalap ra urumat maayo am inggalan min karaan ra sabubuoi no.

⁵²Karaa' noyo ati kulaan i Abragam napandayan ra gumagaya' paat kininaman, saboi Tuhan masaga' mangapu riso.

⁵³I Jusup pana koson raginio paat nakauma' ra kapaganan gumagaya' ra susuban ri Aki Kapuuno' am kalupus raginio nasauk ra ulun manguasa' giu' ra Misir.

⁵⁴I Pinigas, kinamatuaan takau maayo guang nano ra Tuhan, saboi nambantu' Tuhan riso ra papag nano masauk ra imam ra sabubuoi no.

⁵⁵I Josua sinauk ra tingganai giu' ra Israil sabap ra gumagaya' io susuban ri Musa.

⁵⁶I Kalib nangani' ra pambalaan moonsoi ra ulun, am io nangapu ra tana' koson longgom tungkuson.

⁵⁷I Daut nagulayun giminagaya', sabap raginio i Aki Kapuuno' nambantu' riso ra papag nano mamarinta koson ra raja' ra patutungkuson.

⁵⁸I Ilia kinayang giu' ra suruga' sabap ra maayo guang nano koson magalung ra Ukum.

⁵⁹I Anania, i Ajaria am i Misail binayag intor ra bibilak ru apui sabap ra kaintapatan nilo.

⁶⁰I Danil binayag intor ra kabang ru singa' sabap ra guang nano mabanis.

⁶¹Akau sigagama' musiti' tumilu ra kinamatuaan takau, am akau pana makakito ra ulun ondo' mangintopot ra Tuhan kalo masauk ra malawo.

⁶²Pai' kalaa' ra lolob ru ulun malaat, sabap ra kalangkayaan nilo pupusin am baangkai nilo ondo' mootong masauk ra akanon ru lingguang.

⁶³Orou raiti' makaalap ilo ra kaurumatan maayo, kaa' susuab no lumiot ilo. Inan nilo sumaguli' masauk ra tana' am ngaangai' inatangan nilo pupusin.

⁶⁴Anak-anak kuno, akau musiti' maikang am baani koson magalung ra Ukum, sabap ra ralalom ru Ukum akau makaalap ra kaurumatan maayo.

⁶⁵Pabukat min ti, i Simion, ulun ondo' moonsoi guang. Rongog kano riso ra masalok koson ra akau riminongog ra ama' min.

⁶⁶I Judas Makabi maikang kaga' intor poyo ra mamulok. Io masauk ra panglima min am tingganai ru pangayawan manggal ra pantula'.

⁶⁷Timungo' ngaangai' ulun ondo' gumagaya' ra Ukum ri Aki Kapuuno' maa' raginio magamung ramuyun, am jalai kano koson mambalos ra kalaatan ondo' binaal ra bansa' takau.

⁶⁸Ukumi' noyo bansa'-bansa' ra bokon sabap ra binaal nilo. Akau musiti' magulayun gumagaya' ra aturan-aturan ru Ukum.”

⁶⁹Kopongo binarakat no anak-anak nano, i Matatias minatoi

⁷⁰am linobong giu' ra kalabangan ru sasambaloi nano giu' ra Modiin. Ngaangai' bansa' ru Israil nantangi' am nanulaboi ra pinatayan nano. Baal raginio nasauk ralalom bilor 146.[7]