Read Timugon Murut 1 MAKABI 3 Bible Online

1 MAKABI 3 - Timugon Murut bible

1 MAKABI 3

¹I Judas ondo' sabiton ri Makabi minalit ri Matatias, ama' nali.

²Sinungka' ilo ru pabukat-pabukat nano am ngaangai' ulun minaya' ra ama' nano. Ralalom ru guang maikang namparayus ilo ra pangayawan tayar ru Israil.

³I Judas namparuang ra nasugutan ru bansa' nano; nambayang io ra bayang basi' koson ra maayo ulun. Naukop io ra kuliamos ru pangayawan nano am manindung ra pangkiman ra ilang.

⁴Koson io ra singa' ondo' mansasangal maguyum ra ondo' saamon.

⁵Ulun minanggal ra ukum inilou-ilou no, sinolob no ngaangai' ondo' nangimbolo' ra bansa' nano.

⁶Ngaangai' ulun malaat naubong am nansibuni sabap ra malaa' riso. Koson raginio noyo io nakasugut nampalabus ra bansa' nano.

⁷Nangkinibit io ra masuang raja' maruol guang, kaa' bansa' ru Israil sinauk no ra maansukan. Topot noyo io karaan am omporon ra sabuoi no sabap ra atan ondo' binaal nano.

⁸Sinuku' no ngaangai' bandar ru Judia am namuso ra ngaangai' ulun malaat am niayuk nampalabus ra Israil intor ra kaimbalaan ondo' maagat.

⁹Inggalan nano nauligan kaga' saboi ra pompor ru tana' ti, sabap ra nanimung io ra ulun ondo' maar mapuso.

¹⁰Kopongo raginio i Apolonius nambaal rondo' pulalai ru saujor nagamung ra ulun bansa' bokon am pulalai maayo intor ra Samaria koson mamulunsar ra bansa' Israil.

¹¹Pokorongog ra baal raginio, i Judas minongoi ra intok pangayawan, am nangala am namatoi ri Apolonius. Masuang pantula' minatoi am ondo' bokon no nagiru'.

¹²Kuliamos-kuliamos nilo ginaau. Ilang ri Apolonius inalap ri Judas am pinakai no buoi ru bayag nano.

¹³I Siron, panglima pulalai pangayawan ru Siria, nokorongog ra i Judas nanimung noyo rondo' pulalai maayo, nakaaya' santimung ulun gumagaya' ondo' nakatampos mampatoi ondo' tiningganai nano.

¹⁴Kon ri Siron, “Inggalan kuno mauligan kaga' ra titikop ru pamarintaan amon ru mangayou ri Judas am ulun nano ondo' kalo mampalio ra susuban ru raja'.”

¹⁵Jalai boo i Siron inindangan ru sampulalai maayo ulun malaat ondo' masaga' mansuli' ra Israil.

¹⁶Pakasaboi io giu' ra ginting Bit-Oron, i Judas am santimung boborok ulun nano minatong uma' ri Siron.

¹⁷Pakakito ra pulalai ri Siron sumuku', indagu ilo ri Judas, “Ati kulaan pulalai takau ondo' boborok ti makagula' ra pulalai maayo am maikang koson raginio! Itakau pana naagui am kalo poyo nakaakan nonsongorou!”

¹⁸Taam i Judas, “Matasu' ayuk pulalai boborok mangala ra pulalai ondo' maayo. Tayar ru Tuhan kolondo' nansasala' mamayag ra masuang ulun kapoam sanganu ayuk.

¹⁹Ralalom ru pangayawan, kamanangan kalo lumansan ra pulalai ondo' maayo. Kuasa' ru Tuhan noyo ondo' mangaru' ra ampos no.

²⁰Pulalai ru ulun ondo' matong manggal ritakau no malilimbau kaga' am malaat. Masaga' ilo mampagaau ra ngaangai' linonggom takau am mamatoi ritakau am anak andu' takau.

²¹Kaa' mingkotog takau manggal koson ra painawo am ugama takau.

²²Tuhan galama' mamuso ra pantula' giu' ra talupak ru mato takau. Ginio ra pai' kano kalaa' risilo!”

²³Pakaindagu raginio, i Judas am ulun nano namulali' namulunsar ri Siron am pulalai nano am namuso risilo.

²⁴Inilou nilo pantula' giu' ra ralan mambusul intor ra Bit-Oron saboi ra tana' marata' am namuso ra olo'-olo' 800 ngaulun, kaa' ondo' bokon no nagiru' ra Palistin.

²⁵Intor raginio i Judas am pabukat-pabukat nano kalaanin am urumaton ru bansa'-bansa' ra libung no.

²⁶Ngaangai' bansa' mindagu ra pangayawan ondo' binaal ri Judas, am baal raginio norongog niayuk ru Raja' Antiokus.

²⁷Paat ra Raja' Antiokus nokorongog ra kasaukan no, siminangit io kaga'. Nanusub io maa' raginio ngaangai' pulalai ru pangayawan ru pamarintaan nano magamung masauk ra pulalai ru saujor ondo' maayo kaga' ondo' maikang kaga'.

²⁸Saujor-saujor ginajian ra gaji' sambilor intor ra upis ru ruit ru pamarintaan, am sinusub ilo tumampos manguma' ra atan ayuk.

²⁹Kaa' kalupus raginio napandayan no ra ruit kalo naukop giu' ra upis ru ruit. Ampos ru ruit cukai intor ra wilayah-wilayah timinutus, sabap ra kajajawan am pagalabaan sabap ru raja' galama' paat io nangiru' ra undang-undang ondo' soroi intor poyo ra galing i.

³⁰Kaindalaman ru Raja' Antiokus mangani' ra tangguang-tangguang ra guang mataau, nasailan intor ra raja'-raja' ra nakapagulu. Kaa' raino maimamang io ruit kalo maukop koson ra tangguang. Mulu' poyo koson pakayon ra balanja' ra kaindalaman pana kalo maukop. Baal raginio igondo' nasauk igondo' kapoam induo ragili.

³¹Mapagon kaga' guang ru raja' am namatas koson mongoi ra Pirsia am mampalulur ra cukai intor ra ngaangai' wilayah ra giu' am manimung ra ruit ondo' masuang.

³²I Lisias, sangulun ondo' nauligan kaga' makapabukatan ra raja', sinauk ra gabenor koson manguasa' ra pamarintaan intor ra Sungoi Iprat saboi ra balitan ru Misir.

³³I Lisias niayuk sinauk ra uakil ru anak ungkuyon nano Antiokus ondo' Kalimo, saboi raja' makasaguli'.

³⁴Suai poyo raginio inanian i Lisias ra ngaangai' gaja am sampiruo intor ra saujor ru pamarintaan. Io pana inanian ra panuluan intor ra ngaangai' inatangan ru raja', mulu' poyo intor ra mamagun ru Judia am Jirusalim.

³⁵Sinusub i Lisias koson mangator ra sampulalai saujor koson manggal ra ulun ru Jaudi, linuntuk ayuk ondo' lakat poyo soroi giu' ra Jirusalim, koson mangayou am mamandak ra kaikangan nilo, am mangala risilo ra malingon saboi ra ilo kalo boo kakaraan.

³⁶Sinusub io nangalap ra tana' nilo am nampataak ra tana' no ra ulun bansa' bokon ondo' pinabanding ra titikop ru wilayah no.

³⁷Ralalom bilor 147[8] raja' nabaya' ra pulalai saujor ra bokon no minintor ra Antiokia, pusor bandar nano. Liminaup io ra Sungoi Iprat am inongoi ngaangai' tana' masawat ru Pirsia.

³⁸Kopongo raginio i Lisias nampili' ra talu ngaulun tingganai nauligan kaga' intor ra rangan ru raja' koson masauk ra tingganai ru pulalai ru saujor. Ilo noyo i Nikanor, i Gorgias am i Ptolimius anak ri Doriminus.

³⁹Inataran ilo nababaya' ra 40,000 ngaulun pulalai ru saujor mantana' am 7,000 ngaulun pulalai mangkuda koson mamulunsar am mamuso ra pagun Judia koson ra nanusuban ru raja'.

⁴⁰Ilo pana minugar nababaya' ra ngaangai' pulalai. Pakasaboi giu' ra tana' marata' mamaar ra Imaus, nangkim ilo ra giu' no.

⁴¹Pulalai ru saujor intor ra Siria[9] am Palistin nagamung risilo. Ulun mantalan intor ra wilayah no, pokorongog ra kinaikang ru saujor, minatong ra nangkiman no. Nagibit ilo masuang ruit am rantai am malansan koson mambali ra ulun ru Israil koson ra ulipon.

⁴²I Judas am pabukat-pabukat nano nakaliman ra makalalaa' ondo' gumayo-gayo, sabap ra pulalai-pulalai ru saujor bansa' bokon no nangkim giu' ra wilayah nilo. Nokorongog ilo niayuk ra raja' nanusub koson mangala ra ngaangai' bansa' nilo saboi maluus.

⁴³Kaa' indagu ilo ra rondo' am bokon, “Ibok paingkakato' takau saguli' bansa' takau intor ra kapusaan am mingkotog tumula' koson ra tana' galama' am Baloi ri Aki Kapuuno'!”

⁴⁴Ngaangai' bansa' pana timinimung koson tumampos koson ra pangayawan am nakiasi' makimasi' ri Aki Kapuuno'.

⁴⁵Jirusalim kolondo' ulun namagun koson ra tana' kaagisan; kolondo' mamagun ondo' mingkual mumpos ra bandar. Baloi ru Tuhan kikinjangin, kubu ru bandar inayanan ru ulun bansa' bokon am sinauk ra intok pambalangan ru ulun ra bokon. Kaansukan liminiot noyo intor ra Israil; bolos ru miujik kalo boo morongog.

⁴⁶Kopongo raginio i Judas am ulun nano timinimung am minongoi ra bandar Mijpa ondo' nantaluma' ra Jirusalim, sabap ragili ulun ru Israil igondo' mokoondo' ra intok sambayangan giu' ra Mijpa.

⁴⁷Nonsongorou ilo nampali, nambayang ra konoon karung tatandu' nangulir, tinaukan ulu nilo ra kaau, am namparilak ra bayang nilo sabap mangiluk guang.

⁴⁸Ralalom ru baal koson raginio, bansa'-bansa' ra bokon makitulu' ra sinungkalalaing nilo, kaa' ulun ru Israil nangukab ra kitab Ukum koson makitulu' ri Aki Kapuuno'.

⁴⁹Nagibit ilo ra bayang ru imam, taak ampos ru tana' ondo' kasaa', am taak sampiopor. Nagibit ilo niayuk ra ulun Nazir ondo' nasugut noyo binaal nilo.

⁵⁰Ngaangai' ru ulun ra bolos matangil nakiasi' koson ragitio, “Iou Tuhan, atan kia ondo' musiti' mai baalon ra ngaangai' ti? Ati kia musiti' pagibitan mai raginilo?

⁵¹Baloi Muno ondo' matulai kininjangan noyo am jinamalan noyo. Imam-imam muno mangulir am nalumpus guang.

⁵²Ulun bansa' ra bokon naguum koson mamulunsar am mamuso ramon. Nakapandai Tuhan ra inatangan nilo koson manggal ramon.

⁵³Amon ru kalo mangindangan Kou ramon, ati kulaan akai tumaan risilo?”

⁵⁴Ilo pana nanamput ra bujung am giminolok ra matangil.

⁵⁵Kopongo raginio, pinasauk ri Judas tingganai-tingganai koson maningganai ra santimung-santimung saujor ondo' suang no saribu, maatus, limo ngoopor am mopor ngaulun.

⁵⁶Kaa' nontopot ra Ukum, sinusub ri Judas minuli' ngaangai' ulun ondo' tatanga' mambaal ra baloi, kapoam mantanom ra umo ru anggur, kapoam bagu ayuk naguot, am niayuk moonong ulun ondo' malaa'.

⁵⁷Pupus no pulalai nano minugar am nangalap ra intok giu' ra tampilon rabugus ru bandar Imaus.

⁵⁸Kon ri Judas risilo, “Tampos kano, am musiti' kau totopot baani! Susuab musiti' kau tumampos mamulunsar ra ulun bansa' bokon ondo' naguum koson mamulunsar am niayuk mamuso ritakau am Baloi ri Aki Kapuuno'.

⁵⁹Moonsoi poyo matoi ralalom pangayawan intor ra makatainu ra kapusaan ru bansa' takau am kapusaan ru Baloi ri Aki Kapuuno'.

⁶⁰Kaa' gama' ru masauk atan ondo' kasagaan ru Tuhan.”