Read Timugon Murut 1 MAKABI 4 Bible Online

1 MAKABI 4 - Timugon Murut bible

1 MAKABI 4

¹I Gorgias am 5,000 ngaulun pulalai ru saujor mantana' am 1,000 ngaulun pulalai mangkuda ondo' mapandai kaga' nangiruan ra pangkiman paat ra rondom,

²koson mambaal ra pamulunsaran pulalion ra pangkiman ru Jaudi. Inataran ilo ru kukula' ngaulun manulu' ra ralan intor ra kubu giu' ra Jirusalim.

³Kaa' norongog ri Judas baal raginio, io am pulalai nano pana minongoi koson namulunsar ra pulalai ru raja' giu' ra Imaus,

⁴liliwa' i Gorgias am pulalai nano lakat poyo nantutuliar giu' ra liwar ru pangkiman.

⁵Rondom raginio i Gorgias am pulalai nano nakasaboi ra pangkiman ri Judas, kaa' kalo nakatuum ilo sangulun pana ra giu' no. Indoson nilo i Judas am ulun nano nagiru' noyo. Pulalai ri Gorgias pana minongoi paguyum risilo giu' ra kagunungan.

⁶Paat ra maar matawang, i Judas nababaya' ra 3,000 ngaulun siminalula' giu' ra tana' marata'. Kinandoi mangayou nilo kalo naukop koson ra ondo' gogoton nilo.

⁷Nakakito ilo ra pangkiman ru ulun bansa' bokon ondo' maikang am kubu-kubu nilo liniputan ru pulalai mangkuda, ngaangai' no ulun ondo' mapandai kaga' ralalom pangayawan.

⁸Kaa' indagu i Judas ra ulun nano, “Pai' pagalabo makakito ra pulalai nilo ondo' maayo, am pai' kalaa' amon ru mamulunsar ilo ritakau.

⁹Karaa' ati kulaan ru kinamatuaan takali binayag giu' ra Raat Galaga paat ilo inilou ru raja' ru Misir am pulalai nano.

¹⁰Ibok takano raino mampiau ra Tuhan maa' raginio makaasi' Io ritakau. Gama' ru makara' No nabantuan Nano am kinamatuaan takali am mamuso ra pulalai ondo' umaan takau orou raiti'.

¹¹Ngaangai' bansa' bokon pana makapandai ra Israil mokoondo' ri Aki Kapuuno' ondo' nampalabus am namayag ra ulun Nano.”

¹²Paat ra ngaangai' ulun bansa' bokon no nakakito ri Judas am ulun nano matong mamulunsar,

¹³miningkual ilo intor ra pangkiman nilo koson mamulunsar. I Judas am ulun nano nanamput ra bujung am

¹⁴tumalimpuun mangayou. Pulalai ru bansa' bokon no binulunsar saboi nagiru' ra tana' marata',

¹⁵kaa' ilo ondo' minugar giu' ra tinaulian pinuso. Ulun ru Israil nangilou ra pantula' saboi maalur giu' ra Gijir, tana' marata' Idumia am bandar-bandar Asdod, am niayuk Jamnia. Intor ra bala ru pantula' mokoondo' 3,000 ngaulun minatoi.

¹⁶Paat ri Judas am pulalai nano siminaguli' intor ra pangilawan,

¹⁷indagu io ra ulun nano, “Pai' kaansol guang mangalap ra kuliamos. I Gorgias am pulalai nano lakat poyo soroi ra kagunungan ti. Lakat takau poyo manguma' ra pamulunsaran ra bokon. Musiti' takau magulayun tumaan am mingkotog gumula'. Mopongo raginio makapangalap kau ra kuliamos maya' ra kasagaan ru guang.”

¹⁸

¹⁹Kopongo i Judas minindagu, santayaran ra pulalai ru pantula' siminalula' intor ra kagunungan.

²⁰Pulalai ru pantula' no nakakito ra saujor nilo nagiru' noyo. Intor ra lisun ondo' makapal nakapandai ilo ra pangkiman nilo nosolob.

²¹Paat nakakito ra ngaangai' no, nalaa' ilo. Paat ra ilo nakakito ra pulalai ri Judas poyo giu' ra tana' marata' ondo' nakatampos koson mangayou,

²²ngaangai' ilo nagiru' ra Palistin.

²³I Judas pana siminaguli' koson mangalap ra kuliamos ra pangkiman ru pantula'. Nangalap ilo ra masuang kaga' mas am pirok, konoon motomou am malia' matanggilung am niayuk masuang rapu' ra bokon.

²⁴Kopongo raginio ulun ru Jaudi siminaguli' ra pangkiman nilo am narimbai ra rimbai pangamparan ti, “Omporo' noyo Tuhan sabap Io moonsoi. Guang makaasi' Nano mantilayun.”

²⁵Paat orou raginio bansa' ru Israil nakaalap ra kamanangan maayo.

²⁶Ngaangai' ulun bansa' bokon ondo' naayag nambala' ra ngaangai' kasaukan no ri Lisias.

²⁷Paat nokorongog ra pambaalan no nakatigog i Lisias am malawo guang, sabap atan ondo' inatang nano ra Israil kalo nasauk, am atan ondo' nanusuban ru raja' riso kalo nasugut.

²⁸Ralalom ru bilor ra sumunu' no nanusub i Lisias ra 60,000 ngaulun pulalai saujor mantana' ondo' pinili' ra timpokon, am 5,000 ngaulun pulalai mangkuda koson mamulunsar ra ulun ru Jaudi.

²⁹Siminubol ilo ra libung Idumia am nangkim mamaar ra bandar Bit-Jur. Minatong i Judas risilo nabaya' ra 10,000 ngaulun.

³⁰Paat ri Judas nakakito ra saujor ru pantula' ondo' maikang no, nakiasi' io, “Koompor Kou, Mamamayag ra Israil. Ralalom ru kalindu' ru ulipon Muno i Daut, sinulang Mu pamulunsaran ru sangulun ondo' maikang kaga'. Ngaangai' pulalai ru Palistin pinataak Mu ra kalindu' ri Jonatan anak ri Saul am ulun nagibit ra kinandoi mangayou nano.

³¹Gama' ru ralan raginio niayuk pataakon Mu pulalai saujor ti ra kalindu' ru ulun Muno Israil. Polosoon ilo mauyu' sabap ra malansan ra saujor am pulalai mangkuda nilo.

³²Baalo' ilo malaa' am iruo' kaikangan nilo. Polosoon ilo maala am monontol.

³³Musiti' Kou mangala risilo ra ilang ru ulun ondo' motogom Rirun. Gama' ru omporon Kou ru ngaangai' ulun ondo' mangiou Rirun.”

³⁴Ilo pana timinalimpuun nangayou, am ralalom pamulunsaran sangulun mangayou ra sangulun, olo'-olo' 5,000 ngaulun intor ra pulalai ri Lisias minatoi.

³⁵Nakito ri Lisias pulalai nano nagiru', kaa' i Judas am ulun nano jiminalai ra baani kaga' am nakatampos matoi koson ra ulun tutumula'. I Lisias pana liminugut am minongoi ra Antiokia. Giu' no nampagaji' io ra ulun bansa' bokon maa' raginio makasaguli' ra Judia mabaya' ra pulalai saujor ondo' maayo poyo.

³⁶Indagu i Judas am pabukat-pabukat nano, “Pantula' takau naala noyo. Ibok ongoi takau ra Jirusalim koson mangimpasau ra Baloi ri Aki Kapuuno' am patimpokon saguli'.”

³⁷Ngaangai' saujor pana nababaya' minongoi giu' ra Bulur Sion.

³⁸Ilai' nilo Baloi ri Aki Kapuuno' iniruanan ra naliung-liung, altar najamalan, am kulobon garabang nosolob. Liliut tinuwan ru bulungkut makaruui koson giu' ra kataunan kapoam giu' ra gunung. Lamin-lamin ru imam-imam linunsai.

³⁹Ilo pana namparilak ra bayang nilo sabap mangiluk guang, mantangi' ra bolos matangil, am kaau pinatauk ra rasawat ru ulu.

⁴⁰Liminaub ilo ra tana', am paat nokorongog ra bolos ru bujung, moonong ulun mampiau ra Tuhan.

⁴¹Kopongo raginio nanusub i Judas ra saujor nano mamulunsar ra ulun ondo' soroi giu' ralalom ru kubu, liliwa' io nangimpasau ra Baloi ri Aki Kapuuno'.

⁴²Pinili' no imam-imam ondo' maaya' am ondo' gumagaya' ra Ukum.

⁴³Nangimpasau ilo ra Baloi ri Aki Kapuuno', nangalap ra batu-batu ondo' jinamalan am pinabanta' ginio giu' ra intok ondo' majamol.

⁴⁴Nansusunur ilo intor ra atan ondo' musiti' baalon ra altar ondo' jinamalan noyo. Altar no intok mampataak ra taak simbalui ondo' mapabansuk ra guang ru Tuhan.[10]

⁴⁵Ilo pana nakaalap ra pamaguangan moonsoi koson mampalungkab raginio maa' raginio kalo asabin ilo sabap ru ginio, ginio boo sabap ra altar no jinamalan noyo ru ulun bansa' bokon. Altar no pana linungkab nilo,

⁴⁶am batu-batu nano pinabanta' giu' ra intok ondo' maaya' giu' ra bulur ru Baloi ri Aki Kapuuno'. Liliwa' raginio maginaa ilo ra sangulun nabi ondo' mamatas intor ra batu-batu no.

⁴⁷Nontopot ra Ukum ri Musa, inalap nilo batu-batu ondo' kalo pinahat am pambaal ra altar bagu koson ra ondo' lair.

⁴⁸Kopongo raginio Baloi ri Aki Kapuuno' pinuna', am tampilon ra ralalom am niayuk liliut nano patimpokon ra Tuhan saguli'.

⁴⁹Nambaal ilo ra kuliamos bagu ru sambayang. Tampakan ra lampung, altar ru kaminyan, am mija' ru ruti' pataakon inibit siminubol ra ralalom Baloi ri Aki Kapuuno'.

⁵⁰Kopongo raginio kaminyan solobon giu' ra rasawat ru altar, am lampung-lampung giu' ra tampakan ra lampung no pinaangan saboi Baloi ri Aki Kapuuno' nasauk ra matawang.

⁵¹Ruti' pataakon pinauli giu' ra rasawat ru mija' am tabir pinaatang. Ngaangai' ru kandoi pana nopongo.

⁵²Orou karuo ngoopor am limo sila' Kisliw, iono sila' kasiam, bilor 148[11] noyo orou pangkaraan ra altar jinamalan ru ulun bansa' bokon. Paat orou raginio niayuk, giu' ra rasawat ru altar ondo' bagu, taak simbalui ondo' nontopot ra Ukum ri Musa pinataak. Patimpokon nilo ra Tuhan ayuk altar baguon liliwa' narimbai ra rimbai-rimbai am kinulian ra gambus, jitor am sanang.

⁵³

⁵⁴

⁵⁵Titikop mamagun kiminubu samba am niayuk nongompor ra Tuhan ondo' nangani' risilo ra kamanangan.

⁵⁶Buoi balu' ngoorou ilo nangiantak ra napatimpakan ra altar. Ralalom ru kaansukan ilo nampataak ra taak simbalui koson mapabansuk ra guang ru Tuhan,[12] taak simbalui koson makibarakat ra Tuhan,[13] am taak simbalui koson paringkuanangan ra Tuhan.[14]

⁵⁷Tampilon ra saang ru Baloi ru Tuhan binungaan ra pinamunga' mas am perisai-perisai. Kulobon-kulobon garabang binaal saguli', lamin-lamin ru imam-imam binaal bagu am kulobon-kulobon nano pinaatang.

⁵⁸Ngaangai' mamagun naansukan kaga' sabap ra pagasaban ondo' pinaratong ru ulun bansa' bokon pinuso noyo.

⁵⁹I Judas, pabukat-pabukat nano am ngaangai' mamagun nangaru' ra napatimpakan ra altar no musiti' iantakon moonong bilor ra kaansukan maayo buoi balu' ngoorou, intor ra orou karuo ngoopor am limo sila' Kisliw.

⁶⁰Kopongo raginio nambaal ilo ra timbok-timbok ondo' masawat am manara-manara maikang giu' ra liput ru Bulur Sion maa' raginio ulun bansa' bokon kalo makasubol am mampajamol poyo.

⁶¹Pinaayan ri Judas sampulalai saujor ra giu' koson magalung raginio. Io niayuk namiot ra bandar Bit-Jur maa' raginio ulun ru Israil mokoondo' ra kubu ondo' tumingkuang ra Idumia.