Read Timugon Murut 1 MAKABI 5 Bible Online

1 MAKABI 5 - Timugon Murut bible

1 MAKABI 5

¹Bansa'-bansa' ra sambalayan siminangit kaga' paat nokorongog ra ulun ru Jaudi nambaal ra altar am nampapasau saguli' ra Baloi ru Tuhan.

²Namatas ilo koson mangala ra ngaangai' ulun ru Jaudi ondo' minayan giu' ra tatanga' nilo. Ilo pana tumalimpuun mamatoi ra ulun ru Jaudi.

³Namulunsar i Judas ra papag ri Isau giu' ra Idumia mamaar ra Akrabatena, sabap ra marayus ilo magawang ra ulun ru Israil. Kinala no ilo am kinuasa' am tinakawan ilo.

⁴I Judas niayuk mangkara' ra kalaatan ru bansa' Baian ondo' nasauk ra lolob ru bansa' Israil, sabap ra masalok ilo mangipa' ra ulun ru Israil giu' ra ralan-ralan.

⁵Ulun ru Baian inaput no giu' ralalom ru kubu-kubu nilo, Ilo pana nagawang risilo am nagibot ra mamuso risilo. Kubu-kubu no sinolob no nababaya' ra ngaangai' ulun ondo' soroi giu' ra ralalom nano.

⁶Kopongo raginio minongoi i Judas pamulunsar ra ulun ru Amon. Giu' no minuma' io ra saujor ondo' maayo am maikang ondo' tiningganai ri Timotius.

⁷Ruruli' i Judas namulunsar risilo saboi nangala risilo.

⁸Ginaau no bandar Jaijir am kampung-kampung giu' ra mamaar no, am saguli' ra libung Judia.

⁹Ulun bansa' ra bokon ondo' minayan giu' ra Giliad naguum koson mangala ra ulun ru Israil ondo' minayan giu' ra wilayah nilo. Kaa' ulun ru Israil nagiru' giu' ra kubu Datima,

¹⁰am nangator rondo' surat ragitio ri Judas am pabukat-pabukat nano, “Ulun bansa' bokon giu' ra libung mai naguum ondo' tiningganai ri Timotius. Nagiru' akai giu' ra kubu Datima. Raino tumampos ilo masaga' mampagaau ra kubu ti am mangala ramon.

¹¹

¹²Masuang intor ramon pinatoi noyo. Ratong kano koson mampalabus ramon.

¹³Ngaangai' ungkuyon ru Jaudi ondo' minayan giu' ra wilayah Tob pinatoi noyo. Anak andu' nilo inaut koson ra ulun rinakop am longgom nilo inibit minugar. Olo'-olo' saribu ngaulun ramon kinala noyo ra giu'.”

¹⁴Kalo poyo nakai' binasa' surat, pulusat ru ulun-ulun sinusub ra bokon nagibit ra pambalaan intor ra Galilia. Naririlak bayang nilo tatandu' mangiluk guang.

¹⁵Konilo, “Pulalai maayo ru ulun Ptolimais, Tirus, Sidon am ngaangai' ulun bansa' bokon ondo' minayan giu' ra Galilia natimung noyo koson mamuso ramon.”

¹⁶Pokorongog ra ngaangai' no, i Judas am mamagun nambaal ra pansunuran maayo kaga' koson mamatas ati kulaan mangindangan ra pabukat nilo ondo' nalumpa' ru kapaganan maayo sabap ra pamulunsaran ru pantula'.

¹⁷Indagu i Judas ri Simon maayo nano, “Pilio' noyo masuang ulun am ongoi no palabuso' pabukat-pabukat takau giu' ra Galilia. Aku am i Jonatan boborok takau mongoi giu' ra Giliad.”

¹⁸I Judas pana nangiruan ra pulalai nano ra bokon koson magalung ra libung Judia. I Ajaria am i Jusup anak ri Jakarya inanian ra kandoi maningganai ra mamagun.

¹⁹Indagu i Judas risilo, “Akau ruo saukon ku ra tingganai ru mamagun, kaa' pai' ongoi pangayou ra ulun bansa' bokon ra akai kalo poyo makasaguli'.”

²⁰Talu ngaribu ngaulun saujor pana pinataak ri Simon koson mongoi ra Galilia, am balu' ngaribu ngaulun saujor pinataak ri Judas koson mongoi ra Giliad.

²¹Kopongo raginio minongoi i Simon ra Galilia am nambaal ra masuang pamulunsaran ra ulun bansa' bokon ra giu'. Nangala io

²²am nangilou risilo saboi ra bandar Ptolimais. Olo'-olo' 3,000 ngaulun saujor ru pantula' pinatoi am tinakawan.

²³Ulun ru Jaudi pana ondo' minayan giu' ra Galilia am Arbata, am niayuk anak andu' am rapu' masuang nilo, inibit ri Simon ra Judia ra naansukan kaga'.

²⁴Liliwa' raginio i Judas Makabi am i Jonatan boborok nano liminaup ra Sungoi Jordan am minugar buoi talu ngoorou nansail ra tana' kaagisan.

²⁵Nakatuum ilo ra ulun Nabatai ondo' nanguma' risilo ra moonsoi. Santimungan ulun no nantunung ra ngaangai' ondo' nakalumpa' ra ulun ru Jaudi giu' ra Giliad.

²⁶Nambala' ilo ra masuang ulun ru Jaudi naaput giu' ra bandar-bandar Bojra, Bisir, Alima, Kapso, Makid am Karnaim; ngaangai' no bandar maayo ondo' mokoondo' ra kubu.

²⁷Mokoondo' poyo ulun ondo' naaput giu' ra bandar-bandar ra bokon giu' ra Giliad. Nambala' ilo niayuk ra pantula' makaguang mambaal ra pamulunsaran ra kubu-kubu no ra suabon no, am malansan makapamparakop am makapangala ra ngaangai' ulun ru Jaudi ralalom songorou ayuk.

²⁸Ginio ra i Judas am pulalai nano nataki' liminikou am minugar nansail ra tana' kaagisan mongoi ra Bojra. Bandar no kinuasa' no am moonong ungkuyon pinatoi. Kopongo tinakawan, sinolob bandar no saboi nakai'.

²⁹Kopongo raginio minugar ilo am nosorondom minugar minongoi ra kubu Datima.

³⁰Paat mamaar matawang, i Judas am anak-anak nano nakakito ra pulalai ondo' maayo kaga' namulunsar ra kubu no. Tatanga' ilo mampaatang ra tukar-tukar am tataun-tataun panutu koson mamulunsar ra ulun ru Jaudi giu' ra ralalom ru kubu.

³¹Pokorongog ra ngongonsol, golok am bolos ru bujung intor ra bandar, nakaliman i Judas ra pamulunsaran nakatalimpuun noyo.

³²Indagu io ra ulun nano, “Orou raiti' musiti' kau mamulunsar koson ra pabukat-pabukat takau!”

³³I Judas pana nambaal talu pulalai am namulunsar ra pantula' intor ra bakulung. Liliwa' jiminalai, nanamput ilo ra bujung am kinosongou pakiasian-pakiasian.

³⁴Paat ra pulalai ondo' tiningganai ri Timotius nakakito ri Judas Makabi, nagiru' ilo am naimbolo' ra kinala ra maayo. Paat orou raginio olo'-olo' 8,000 ngaulun minatoi.

³⁵Kopongo raginio likou i Judas koson mamulunsar ra bandar Maapa. Bandar no kinuasa' no, am ngaangai' mamagun ungkuyon pinatoi. Bandar no pana tinakawan am sinolob saboi nakai'.

³⁶Pakaugar intor ra giu' no, ginaau no bandar Kapso, Makid, Bisir am bandar-bandar ra bokon giu' ra libung Giliad.

³⁷Kopongo raginio nanimung i Timotius rondo' pulalai ra bokon am nangkim nantuma' ra bandar Rapon giu' ra sandaup ru sungoi.

³⁸Nanusub i Judas ra kukula' ngaulun koson mansigo ra pangkiman no. Pakasaguli', nambala' ilo riso, “Ngaangai' bansa' bokon giu' ra liliut takau naguum noyo ri Timotius am nababaya' nambaal ra pulalai ondo' maayo.

³⁹Ulun ru Arab niayuk ginajian koson mangikang ra pulalai. Nangkim ilo giu' ra sandaup ru sungoi, nakatampos koson mamulunsar ritakau.” Jalai boo i Judas koson mangayou risilo.

⁴⁰Liliwa' i Judas am ulun-ulun nano minggaar ra sungoi, indagu i Timotius ra pagawai-pagawai ru saujor nano, “Amon ru magulu io lumaup, kalo makagula' takau, sabap ra maaru' maala no itakau.

⁴¹Kaa' amon ru malaa' io am mangkim giu' ra sandaup no, itakau lumaup am mangala riso.”

⁴²Pakasaboi i Judas giu' ra sungoi, pinaayan no pagawai-pagawai pinatimpok giu' ra kiing ru sungoi am nanusub risilo, “Pai' iowo' sangulun pana lumonggo'. Ngaangai' musiti' jumalai mangayou!”

⁴³I Judas galama' ondo' kasaa' liminaup koson mangayou ra pantula', am ngaangai' ru ulun nano siminunu' riso. Ulun bansa' bokon ra giu' no tinula' ra saang nano. Pinatiran nilo kinandoi mangayou nilo am nagiru' ra kuil giu' ra Karnaim.

⁴⁴Kaa' i Judas am ulun-ulun nano nanguasa' ra bandar no am nonolob ra kuil am ngaangai' ulun ondo' soroi ra ralalom no. Bandar no pana liningon kinala, am ondo' bansa'-bansa' ra bokon kalo boo makaanggal ri Judas.

⁴⁵Kopongo raginio nanimung i Judas ra ngaangai' ulun ru Jaudi ondo' minayan giu' ra Giliad koson mangator risilo ra Judia. Masuang ilo kaga', ulun nasukor am anak andu' am ngaangai' longgom nilo.

⁴⁶Nakasaboi ilo giu' ra Ipron, bandar ondo' maayo am mapiot kaga', ondo' soroi giu' ra silot ru gunung. Kolondo' ralan ra kait kapoam pamiris nano. Rondo' ayuk ralan iono mansail ra bandar no.

⁴⁷Kaa' mamagun nano marara' mangiou ra ulun ru Jaudi mansail. Inangaban nilo kulobon garabang am inampangan ra batu.

⁴⁸Nangator i Judas ra bilin pabukatan risilo, kono, “Mangkiralan akai muli' ra pagun mai. Pasailo' akai ra libung min. Kolondo' sangulun pana manguliso ramuyun; mansail akai ayuk.” Kaa' mamagun ru bandar no marara' mangukab ra kulobon garabang.

⁴⁹I Judas pana nanusub ra moonong ulun mongoi ra intok ru sigagama'.

⁵⁰Saujor-saujor pana timinampos. Namulunsar ilo ra bandar am nantutula' songorou sorondom saboi bandar no nagaau nilo.

⁵¹Ngaangai' mamagun ungkuyon pinatoi, am bandar tinakawan am rinata' ra tana'. Kopongo raginio i Judas am mamagun nansail ra bandar no minugar giu' ra rasawat ru baangkai-baangkai ru mamagun nano.

⁵²Liminaup ilo ra Sungoi Jordan siminuku' ra tana' marata' ra malangka' ondo' nantuma' ra Bit-Sian.

⁵³Galur ru ralan nanimung i Judas ra ulun ondo' natatang am nangansuk ra guang ru mamagun polos ilo nakasaboi giu' ra tana' Judia.

⁵⁴Ralalom ru guang naringkuanang am naansukan nagaloi ilo ra Bulur Sion am nampataak ra taak simbalui koson mapabansuk ra guang ru Tuhan[15] sabap nakasaboi ilo ra naayag ra kolondo' sangulun pana natatak.

⁵⁵Liliwa' raginio i Judas am i Jonatan soroi giu' ra Giliad am i Simon maayo nilo giu' ra Galilia mamaar ra bandar Ptolimais.

⁵⁶I Ajaria am i Jusup anak ri Jakarya, ruo ngaulun panglima ru pulalai giu' ra Judia, nakaalap ra tanou intor ra kinapanggol ri Judas am i Simon.

⁵⁷Indagu ilo boo, “Ibok takano mangayou ra ulun bansa' bokon giti ra libung ti maa' raginio itakau pana mokoowot ra inggalan moonsoi.”

⁵⁸Ilo pana nanusub ra ulun-ulun nilo mamulunsar ra bandar Jamnia.

⁵⁹Kaa' i Gorgias am ulun-ulun nano miningkual intor ra bandar no mongoi pangayou risilo.

⁶⁰I Jusup am i Ajaria kinala am inilou saboi ra balitan ru Judia. Paat orou raginio olo'-olo' 2,000 ngaulun ru Israil napuso.

⁶¹Mamagun naimbolo' ra kakalaan ra maayo sabap ra tingganai-tingganai no moogot masauk ra ulun tutumula' am marara' gumagaya' ri Judas am pabukat-pabukat nano.

⁶²Suai raginio ilo kalo mabubukat ra ulun ondo' pinili' ru Tuhan koson mampalabus ra Israil.

⁶³I Judas Makabi am pabukat-pabukat nano urumaton kaga' ru ngaangai' ulun ru Israil am ulun bansa' bokon. Ati ayuk inggalan nilo morongog,

⁶⁴ulun lumimpu koson mongompor risilo.

⁶⁵Kopongo raginio i Judas am pabukat-pabukat nano minongoi koson mamulunsar ra ulun ru Idumia giu' ra rabugus. Namulunsar io ra bandar Gibron am kampung-kampung ra mamaar nano. Kubu-kubu no tinutuk am manara-manara giu' ra liliut no sinolob.

⁶⁶Intor ra giu' narayus jiminalai minongoi ra pagun Palistin nansail ra bandar Marisa.

⁶⁷Paat orou raginio masuang imam minatoi ralalom pangayawan sabap ra moogot ilo masauk ra mauligan kaga' am tutului nilo miningkual koson mangayou.

⁶⁸Kopongo raginio likou i Judas giu' ra bandar Asdod giu' ra pagun Palistin. Linunsai no altar-altar am nonolob ra sinungkalalaing-sinungkalalaing nilo. Kopongo nantakou ra bandar-bandar nilo, saguli' io ra Judia.