Read Timugon Murut 1 MAKABI 6 Bible Online

1 MAKABI 6 - Timugon Murut bible

1 MAKABI 6

¹Liliwa' Raja' Antiokus ondo' Kaapat tatanga' mongoi liput ra tana' marata' ra masawat ru Pirsia, nokorongog io ra bandar Ilimais nauligan kaga' sabap ra mas am pirok nano.

²Kuil giu' ra bandar no niayuk langkaya' kaga', sabap ra giu' no binulian perisai-perisai mas, bayang-bayang basi', am kinandoi mangayou ondo' tinatang ri Aliksandir anak ungkuyon ru Raja' Pilipus, raja' kasaa' ru Makidonia.

³Ratong boo Raja' Antiokus masaga' mangayou am mantakou ra bandar no. Kaa' kalo mangintopot io sabap ra kuayan nano napandayan ru mamagun.

⁴Nangayou ilo riso saboi io nagiru' am minuli' ra Babil ra maruol guang.

⁵Paat ra Raja' Antiokus lakat poyo giu' ra Pirsia, sangulun sinusub minatong riso am nampatanou ra pulalai-pulalai ondo' inataran nano ra Judia kinala.

⁶Pinososot tanou ri Lisias am pulalai nano ondo' maikang nagiru' kalalaat intor ra ulun ru Jaudi ondo' giminaai maikang sabap ra kinandoi mangayou, kaukapan, am kuliamos tinakou nilo intor ra pulalai-pulalai ondo' kinala nilo.

⁷Ulun ru Jaudi niayuk nampalunsai ra atan ondo' sabiton nilo “Karaat Ondo' Makalalaa' ” ondo' pinatirong ru Raja' Antiokus giu' ra rasawat ru altar giu' ra Jirusalim. Giu' ra liput Baloi ru Tuhan binaal timbok ondo' masawat koson ragili. Bandar Bit-Jur, rondo' intor ra bandar ru raja', niayuk kinuasa' am piniot.

⁸Pokorongog ra pambaalan no, nakatigog raja' am naimbolo' ra katigagan saboi narualan. Maruol kaga' guang nano sabap ra ngaangai' no kalo nasauk koson ra ondo' inatang nano.

⁹Nabuoi io kaga' liminangan ra giu' no, sabap ra guang nalumpus kaga'. Pupus no nakaliman io ra patayan nano nasaboi noyo.

¹⁰Io pana nampiau ra ngaangai' rangan nano am indagu risilo, “Kalo mokororot aku am guang kuno mangiluk sabap ra magalabo.

¹¹Pagulu nangkuot aku ra inan galama' kua kalumpa' aku ru kapaganan ondo' ruruli' ti, alika buoi ru pamarintaan kuno, mataau guang kuno am kasagain ru ulun.

¹²Kaa' raino nakara' ku ngaangai' kalaatan ondo' binaal kuno giu' ra Jirusalim, am nampagaau ra kuliamos mas am pirok intor ra Baloi ri Aki Kapuuno' am kolondo' sasaban nanusub nangala ra mamagun ru Judia.

¹³Nalimanan ku ra ginio sabap ra aku nalumpa' ru karaat ti. Raino matoi aku ra mangiluk kaga' guang giu' ra pagun bansa' ra bokon.”

¹⁴Io pana nampiau ri Pilipus, sangulun rangan nano, am nampasauk riso ra panguasa' ru titikop pamarintaan.

¹⁵Pinataak no karaun ru pamarintaan, sukub am sinsing meterai nano ri Pilipus nabaya' ra bilin maa' raginio alungin am ilaan i Antiokus anak nano maa' raginio masauk ra raja' ra tauli no.

¹⁶Raja' Antiokus ondo' Kaapat pana minatoi ra giu' ralalom bilor 149.[16]

¹⁷Paat ri Lisias nokorongog ra minatoi noyo raja', pasauko' no i Antiokus ondo' mamulok ra raja'. Intor ra boborok inalungan io ri Lisias. Raino ininggalanan io ri Iupator.

¹⁸Liliwa' raginio saujor giu' ra ralalom ru kubu giu' ra Jirusalim nongompong ra ralan tayar ru Israil giu' ra liput ru Baloi ri Aki Kapuuno'. Kalo lumonggo'-longgo' ilo mantipagon ra ulun ru Israil am manungka' ra ulun bansa' ra bokon.

¹⁹Ginio ra namatas i Judas koson mangala risilo. Nanimung io ra ngaangai' mamagun koson magawang ra kubu no.

²⁰Timinimung ilo am nagawang ra kubu no ralalom bilor 150.[17] Nambaal ilo ra manara-manara pagawangan am tataun-tataun panutu.

²¹Kaa' kukula' ngaulun nakapagiru' intor ra pagawangan, am nababaya' ra kukula' ngaulun ru Jaudi ondo' malaat guang,

²²minuma' ilo ra raja' am indagu, “Kula' kia buoi muno maginaa ra kalo poyo mapabigor ra ukum am mambalos ra binaal nilo ra pabukat-pabukat mai?

²³Nangandoi akai ayuk ra ama' muno ra kalo nakigaji', siminugut ra ngaangai' ragu nano am giminagaya' ra ngaangai' susuban nano.

²⁴Kaa' sabap ra baal raginio akai tinula' ru ulun rondo' bansa' ramon, am kubu mai inawangan. Ilo niayuk namatoi ra osoi ayuk ra gino ngai' mai ondo' natuum nilo, am ginaau nilo longgom mai.

²⁵Sala' ka akai ayuk ondo' binulunsar nilo, kaa' niayuk libung giu' ra liput mai.

²⁶Raino nagawang ilo ra kubu giu' ra Jirusalim koson ra gaawon. Ilo niayuk nangikang ra Baloi ri Aki Kapuuno' am bandar Bit-Jur.

²⁷Amon ru kalo mongompong kou risilo ra mataki', baalon nilo masuang poyo, am kalo mokopongompong kou risilo.”

²⁸Pokorongog ra baal no raja' siminangit. Tinimung no ngaangai' rangan, panglima-panglima ru saujor am pagawai ru pulalai mangkuda.

²⁹Io niayuk nampagaji' ra masuang kaga' pulalai intor ra pamarintaan-pamarintaan ra bokon am intor ra pulu'-pulu' giu' ra Raat Tanga'.

³⁰Suang ru pulalai ru saujor nano riminuang nasauk ra 100,000 ngaulun ra tayar ru pulalai ru saujor mantana', 20,000 ngaulun poyo pulalai mangkuda, am 32 ngainan gaja ondo' naila' noyo koson mangayou.

³¹Nansail ilo ra libung Idumia am nagawang ra bandar Bit-Jur. Nambaal ilo ra tataun-tataun panutu am orou-orou buoi no mangayou ra giu' no. Kaa' mamagun ru bandar ondo' inawangan no mangayou ra baani kaga'. Miningkual ilo intor ra bandar am nonolob ra tataun-tataun panutu no.

³²Kopongo raginio i Judas namunduk ra pulalai-pulalai nano intor ra kubu giu' ra Jirusalim am nangkim giu' ra Bit-Jakaria nantaluma' ra saujor ru raja'.

³³Suabon no ra iosusuab ayuk poyo, nanusub raja' ra saujor nano koson magampan mintor mongoi ra Bit-Jakaria. Saujor ra nakatampos mangayou pinabaris am bujung sinamputan.

³⁴Gaja-gaja pinatampos koson pangayawan ra nampakito ra ruu' ru kawa' ru anggur am ruu' ru kawa' ru strawberi risilo.

³⁵Bibiag-bibiag maayo no pinosoroi ra lolot ru barisan ru pangayawan. Moonong gaja binaya' ru 500 ngaulun pinili' intor ra pulalai mangkuda am 1,000 ngaulun ondo' nambayang ra bayang basi' makarantai am tupi' tambaga'.

³⁶Pulalai raginio musiti' mayan magulu intor ra gaja. Ati ayuk angayan ru gaja no, musiti' ilo sumunu' am kalo pairuanin ginio.

³⁷Rondo' manara tataun ondo' mapiot pinaatang ra kuliamos linili' giu' ra rasawat ru moonong gaja. Manara no intok pangampinan ra sangulun babalian am apat ngaulun saujor ondo' siminakoi.

³⁸Pulalai mangkuda ra bokon no pinaayan ru raja' giu' ra kait pamiris ru pulalai saujor ru raja' no maa' raginio makapangampin ra pulalai saujor mantana' liliwa' mampajajou ra pantula'.

³⁹Sinda mato ru orou ondo' nakatiu' ra perisai-perisai mas am tambaga' koson ra pilasut saboi nakasilau ra kagunungan.

⁴⁰Santayaran intor ra pulalai saujor ru raja' nakasaboi giu' ra pipilon ru gunung am santayaran poyo giu' ra tana' marata' ra magana', kaa' ilo ngaangai' jiminalai ra rondo' tingkuangan am natampos.

⁴¹Ngaangai' ulun malaa' am nakatigog nokorongog ra golok, bolos ru kinandoi pangayou ondo' nangurinsil, am kurutuk ru kalayam ru saujor ondo' maayo am maikang no.

⁴²I Judas am pulalai nano jiminalai ra intok pangayawan am namatoi ra 600 ngaulun saujor ru raja'.

⁴³Sangulun inggalan nano i Iliajar Abaran pulalai nakakito ra sanginan gaja ondo' maayo poyo intor ra bokon am inukapan ra bayang pangayawan ru pamarintaan. Indoson no gaja no sinakayan ru raja'.

⁴⁴Kinabaani nano nasimbul minuma' ra gaja ondo' giu' ra tatanga' ru pulalai saujor mantana'. Liliwa' jumalai, namatoi io ra saujor-saujor giu' ra kait am pamiris nano saboi pantula' liminugut intor ra karuruo kiing nano. Io pana siminusut ra ragana' ru gaja no am tinobok saboi minatoi. Naaba' gaja no ra tana' totopot rasawat ri Iliajar saboi io pana minatoi. Koson raginio noyo i Iliajar napataak ra kaayagan nano koson mamayag ra bansa' nano am koson makaalap ra inggalan moonsoi ondo' mantilayun.

⁴⁵

⁴⁶

⁴⁷Kaa' ulun ru Jaudi nakakito ra saujor ru raja' maikang kaga' am totopot makaguang koson mangayou. Ginio ra saujor ru Jaudi liminugut.

⁴⁸Kopongo raginio saujor ru raja' minongoi ra Jirusalim koson mamulunsar ra ulun ru Jaudi ra giu'. Inayou nilo titikop libung ru Judia am Jirusalim.

⁴⁹Raja' pana nakimobonsoi ra ulun ru Jaudi giu' ra Bit-Jur. Nakapaat ra bilor raginio bilor Sabat, am ilo kalo iowon mantanom ra umo. Ginio ra ula' ru akanon nilo kalo naukop koson tumaan ralalom pagawangan ondo' mabuoi. Ilo pana nangiruan kalalaat ra bandar.

⁵⁰Koson raginio noyo bandar Bit-Jur ginaau ru raja'. Pinaayan no rondo' pulalai ru saujor koson magalung ra intok raginio.

⁵¹Orou-orou buoi no io nagawang ra Baloi ri Aki Kapuuno'. Nanusub io ra ulun mambaal ra manara-manara pagawangan am tataun-tataun panutu, apui am batu, pampalabus ra anak panah am batu.

⁵²Ulun ru Jaudi niayuk nambaal ra kinandoi pangayou koson mangkail ra kinandoi pangayou ru pantula'. Pangayawan no nasauk ra nabuoi kaga'.

⁵³Ula' ra akanon giu' ra Baloi ri Aki Kapuuno' nakai' noyo, sabap ra bilor raginio bilor Sabat. Suwo ru akanon pana kinai' noyo ru ulun ru Jaudi ondo' siminindung giu' ra Judia intor ra bansa' ra bokon.

⁵⁴Ginio sabap ra karaat ru bitilan no nantutuliar kalalaat ulun giu' ra intok ru sigagama', am sanganu ayuk ulun ondo' minayan giu' ra Baloi ri Aki Kapuuno'.

⁵⁵Liliwa' raginio nokorongog i Lisias ra i Pilipus am saujor ru pamarintaan nakasaguli' noyo intor ra Pirsia am Midia. Inanian i Pilipus ru Raja' Antiokus ra kandoi buoi ru bayag nano koson magalung ri Antiokus anak ungkuyon nano saboi masauk ra raja'. Nokorongog niayuk i Lisias ra mirot i Pilipus gumaau ra kuasa'.

⁵⁶

⁵⁷I Lisias pana nanusub koson mataki' mugar. Indagu io ra raja', panglima-panglima am ulun-ulun nano, “Orou ka orou gumaai takau malawo. Ula' takau soroi sanganu am intok ondo' inawangan takau maikang kaga'. Suai raginio mokoondo' kandoi ru pagun ondo' namulali'.

⁵⁸Sabap raginio moonsoi makimobonsoi takau ayuk ra ulun ru Jaudi am ngaangai' bansa' nilo.

⁵⁹Polosoon takau noyo ilo maayag sumugut ra ukum nilo galama' koson ragili. Sabap ra pinuso takau ukum am kaulayan nilo, napasingkual takau ra sangit nilo saboi binaal nilo ngaangai' no.”

⁶⁰Ginuang raginio iniou ru raja' am panglima-panglima nano. I Lisias pana nambala' ra ginuang ra pabansayan ra ulun ru Jaudi, am inapu nilo.

⁶¹Kopongo raginio raja' am panglima-panglima nagibot ra guuton nilo bantu' nilo. Ginio ra ulun ru Jaudi miningkual intor ra kubu.

⁶²Kaa' pakasaboi raja' giu' ra Bulur Sion am nakakito ra kubu no mapiot kaga', liminungkang io ra bantu' nano am nanusub maa' raginio timbok ra liput no lunsayon.

⁶³Io pana minuli' ra mataki' ra Antiokia. Napandayan no ra i Pilipus nanguasa' noyo ra bandar no. Nangayou raja' ri Pilipus am nanguasa' ra bandar no ra jinajalan.