Read Timugon Murut 1 MAKABI 7 Bible Online

1 MAKABI 7 - Timugon Murut bible

1 MAKABI 7

¹Ralalom bilor 151[18] i Dimitrius anak ungkuyon ri Siliukus minintor intor ra bandar Roma. Nababaya' ra kukula' ngaulun, minasak giu' ra rondo' bandar giu' ra nagas ru Raat Tanga', am giu' no siminauk io ra raja'.

²Paat io siminubol ra istana ru kinamatuaan nano, pulalai nano namparakop ri Antiokus ondo' kalimo am i Lisias ra kuayan ibiton ilo ri Dimitrius.

³Kaa' pokorongog i Dimitrius baal raginio, indagu io, “Marara' aku magilong risilo.”

⁴Ilo pana pinatoi ru pulalai raginio am i Dimitrius nanturung ra kurisi' ru raja'.

⁵Kopongo raginio ngaangai' ulun ru Israil ondo' minanggal ri Aki Kapuuno' minuma' ri Dimitrius. Tiningganai ilo ri Alkimus ondo' moogot masauk ra Tingganai Maayo Imam.

⁶Giu' ra saang ru raja' nanguu' ilo ra bansa' nilo galama'. Konilo, “I Judas am pabukat-pabukat nano namatoi noyo ra ngaangai' ulun ondo' nanungka' rirun. Akai pana pinagiru' intor ra pagun mai.

⁷Kasaga' no okou raja' mangator ra sangulun ondo' maalap ra intopot koson mangimumui ra nalubatan ondo' pinaratong nano ramon am ra wilayah muno, am mangukum ri Judas, pabukat-pabukat nano am ngaangai' ulun ondo' nangindangan risilo.”

⁸I Dimitrius pana nampili' ra sangulun rangan nano ondo' ininggalanan ri Bakidis, gabenor ru Siria Maayo. Io ulun maatang kaga' ralalom ru pamarintaan am gumagaya' ra raja'.

⁹I Bakidis sinusub nabaya' ri Alkimus, ulun malaat ondo' inanian ra kandoi Tingganai Maayo Imam ru raja'. Sinusub ilo koson mansuli' ra ulun ru Jaudi.

¹⁰Nangiruan ilo ra Antiokia am pulalai ondo' maayo, am nakasaboi giu' ra Judia. Nangator i Bakidis ra kukula' ngaulun sinusub ondo' ralalom ru namparuung nakimobonsoi ri Judas am pabukat-pabukat nano.

¹¹Kaa' pakakito i Judas ra saujor nilo ondo' maayo, kalo mangintopot io ra atan ondo' rinagu ru ulun-ulun sinusub no.

¹²Santimung ulun mapandai kaga' ra Ukum ri Musa timinuum ri Alkimus am i Bakidis koson makitaak ra katimpakan.

¹³Ngaangai' ulun mapasau guang no ulun ru Jaudi ondo' kasaa' mirot makibonsoi ri Alkimus am i Bakidis.

¹⁴Mangkara' ilo, “I Alkimus imam papag ri Arun minatong nababaya' ra pulalai no. Kalo lumaat io ritakau.”

¹⁵I Bakidis niayuk minindagu ra molomoi risilo. Ilo niayuk nagibit, “Kalo lumaat akai ramuyun am rangan-rangan min.”

¹⁶Kaa' kalupus nakaalap ra intopot nilo, rinakop no 60 ngaulun intor risilo. Ilo ngaangai' pinatoi paat ra orou ra nogondo', koson tinulisan noyo ralalom Buuk Kitab,

¹⁷“Raraa' ru ulun mapasau guang pinasasar, am baangkai nilo nakabanta' ra libung ru Jirusalim, am kolondo' osoi pana ondo' nompolobong risilo.”

¹⁸Kopongo kasaukan raginio i Alkimus am i Bakidis kalaanin kaga' ru ngaangai' mamagun. Konilo, “Karuruo ngaulun no kalo mapandai ra arati' ru katapatan am katimpakan. Magibot ilo ra mampaintopot am malupus raginio lumungkang ilo ra ibot nilo galama'.”

¹⁹Kopongo raginio i Bakidis nangiruan ra Jirusalim am nambaal ra pangkiman giu' ra Bitjita. Nangani' io ra susuban koson mamparakop ra masuang ulun ru Jaudi am niayuk ulun ondo' maya' risilo am niayuk masuang ulun intor ra mamagun am manusub maa' raginio ilo ngaangai' potoyon am patirin giu' ra tulubong ondo' malandom.

²⁰I Bakidis pana nampasauk ri Alkimus koson maningganai ra wilayah no. Io niayuk nangiruan ra pulalai-pulalai koson mangindangan ri Alkimus, am io galama' siminaguli' ra raja'.

²¹Kopongo raginio tumalimpuun i Alkimus mampaguut tojojo ra intok nano koson ra Tingganai Maayo Imam.

²²Sinungka' io ru ngaangai' ulun ru Jaudi ondo' masaga' mampajajou ra bansa' no. Nakasugut ilo nanguasa' ra pagun Judia am namparatong ra masuang kapaganan ra ulun ru Jaudi.

²³Nakaliman i Judas ra kalaatan ondo' binaal ri Alkimus am maamaya'-maamaya' nano maayo poyo intor ra ondo' binaal ru bansa' ra bokon.

²⁴Io pana minongoi liput ra titikop pagun ru Judia koson mansuli' ra ulun ondo' minaya' ra pantula'. Koson raginio noyo ilo inompong intor ra mangiruan ra bandar-bandar am mingkual mongoi ra libung ru asak.

²⁵Nakito ri Alkimus ra i Judas am ulun-ulun nano minikang poyo, nakaliman io ra kalo makagula' io risilo. Io pana siminaguli' ra raja' am nambala' ra kalaatan nilo.

²⁶Kopongo raginio nanusub raja' ri Nikanor, sangulun intor ra panglima nano ondo' nauligan kaga', ondo' masisang am mantula' ra ulun ru Jaudi. Nanusub raja' riso koson mamuso ra bansa' no.

²⁷Nakasaboi i Nikanor giu' ra Jirusalim nabaya' ra pulalai ondo' maayo. Nabaya' ra ruung io nampasaboi ra pabansayan ri Judas am pabukat-pabukat nano. Kono,

²⁸“Pai' noyo mokoondo' ra pangayawan ru okou am aku. Matong aku ra kukula' ngaulun ayuk koson manambului ra pabukatan rirun.”

²⁹Ratong boo i Nikanor ri Judas am nansisikin ra guang maansayan. Kaa' pantula'-pantula' ri Judas nakatampos noyo koson suminok mamparakop ri Judas.

³⁰Pakapandai i Judas ra matong i Nikanor mabaya' ra ruung, nalaa' io am marara' boo tumuum ri Nikanor.

³¹Nakaliman i Nikanor ra inatangan nano napandayan noyo. Ugar io boo koson mangayou ri Judas mamaar ra Kaparsalama.

³²Olo'-olo' 500 ngaulun ri Nikanor minatoi, am bokon no nagiru' giu' ra kubu giu' ra Jirusalim.

³³Kopongo kukula' buoi minongoi i Nikanor giu' ra Bulur Sion. Kukula' ngaulun ra imam-imam am ulun-ulun matutuo miningkual intor ra Baloi ri Aki Kapuuno' koson manguma' riso ra guang maansayan. Nampakito ilo ra taak-taak simbalui ondo' pataakon ra tayar ru raja', risilo. Taak-taak simbalui no iono taak simbalui koson mapabansuk ra guang ru Tuhan.[19]

³⁴Kaa' i Nikanor nagasab, nakakurit am nangiis risilo. Minindagu io ra minsawat guang

³⁵am nagibot ra siminangit, “Raino ti i Judas am saujor nano kalo pataakon raki', Baloi ti solobon ku lingono', mataki' ra malupus aku makasaguli' ra maayag.” Io pana minugar ra siminangit.

³⁶Kopongo raginio imam-imam siminubol ra liliut am minigor giu' ra saang ru altar am Baloi ri Aki Kapuuno'. Liliwa' nantangi' nakiasi' ilo,

³⁷“Iou Tuhan, Baloi ti pinili' Mu noyo maa' raginio masauk ra longgom Muno galama' am masauk ra baloi pakiasian am kitaakon ra tayar ru ulun Muno.

³⁸Kasaga' Kono mambalos ra kalaatan ru ulun no am saujor nano. Karaa' ati kulaan ilo nagulas Rirun. Pai' polosoo' ra ilo marayus maayag, kaa' polosoo' ilo no matoi ralalom pangayawan.”

³⁹Nangiruan i Nikanor ra Jirusalim am nangkim giu' ra Bit-Oron. Giu' no saujor ru Siria nagamung riso.

⁴⁰Liliwa' raginio nangkim i Judas giu' ra Adasa nabaya' ra 3,000 ngaulun. I Judas pana nakiasi' koson ragitio,

⁴¹“Iou Tuhan, paat ra ulun sinusub ru raja' Asyur nagulas Rirun, ratong malaikat Muno am namatoi ra 185,000 ngaulun intor ra pulalai nano.

⁴²Koson raginio niayuk, musiti' Kou mamuso ra saujor ti ra orou raiti', maa' raginio ngaangai' ulun makapandai ra nagasab i Nikanor ra Baloi Mutu ondo' matulai. Ukumi' noyo nontopot ra kalaatan nano.”

⁴³Pangayawan nasauk ra orou koopor am talu sila' Adar, am saujor ri Nikanor kinala. I Nikanor galama' ulun kasaa' ondo' minatoi ralalom pangayawan.

⁴⁴Pakakito saujor nano ra minatoi noyo i Nikanor, pinapatir nilo kinandoi pangayou nilo am pagiru'.

⁴⁵Ulun ru Jaudi nangilou risilo ra nonsongorou intor ra bandar Adasa saboi ra bandar Gijir liliwa' nanamput ra bujung.

⁴⁶Ngaangai' mamagun ru libung Judia miningkual am namulunsar ra pantula' intor ra ngaangai' intok, saboi pantula' naanjung ra liminugut am naratu' ra kalindu' ru ulun ondo' nangilou risilo. Ngaangai' saujor ru pantula' pinatoi ra ilang, am kolondo' sangulun pana risilo naayag.

⁴⁷Kopongo raginio ulun ru Jaudi nangalap ra kuliamos ru pantula'. Iningguluan nilo ulu ri Nikanor am namutul ra kalindu' pamiris nano ondo' ragili pinakito no ra minsawat guang. Ulu am kalindu' no tinair mamaar ra Jirusalim koson ra ilain.

⁴⁸Naansukan kaga' bansa' Jaudi, am orou raginio iniantak ra kaansukan ondo' maayo.

⁴⁹Koson ra rampus nano orou koopor am talu sila' Adar inaru' koson ra orou pangiantakan ondo' musiti' iantakon ra moonong bilor.

⁵⁰Kukula' buoi pagun ru Judia mamimio.