Read Timugon Murut 1 MAKABI 9 Bible Online

1 MAKABI 9 - Timugon Murut bible

1 MAKABI 9

¹Nokorongog Raja' Dimitrius ra i Nikanor am saujor nano napuso noyo. Igondo' poyo io nangator ri Bakidis am i Alkimus ra pagun Judia, nabaya' ra saujor ru Siria.

²Nansail ilo ra ralan sumuku' ra bandar Gilgal, am nagawang am nanguasa' ra bandar Maisalot giu' ra libung Arbila am namatoi ra masuang ulun.

³Ralalom sila' kasaa' ra bilor 152[22] nangkim ilo mamaar ra Jirusalim.

⁴Intor ra giu' no siminuku' ilo ra Biria nababaya' ra 20,000 ngaulun pulalai ru saujor mantana' am 2,000 ngaulun pulalai mangkuda.

⁵Liliwa' raginio nangkim i Judas giu' ra Ilasa nababaya' ra 3,000 ngaulun saujor pinili'.

⁶Kaa' pakakito ra pulalai ru pantula' ondo' maayo kaga' no, nalaa' ilo kaga'. Masuang saujor ru Jaudi nagiru' intor ra pangkiman, saboi 800 ngaulun saujor ayuk soroi.

⁷Nakito ri Judas ra saujor nano masuang kalio, kaa' pangayawan maar noyo tumalimpuun. Magalabo guang nano sabap kolondo' kaluagan koson manimung risilo saguli'.

⁸Kabalu' pana nangkaus, indagu io ra ulun-ulun nano ondo' lakat poyo soroi, “Ibok tampos takano mamulunsar ra pantula'. Maaru' lakat poyo makapangala takau risilo.”

⁹Kaa' ulun-ulun ri Judas minirot koson manginga' riso. Konilo, “Kalo lair! Moonsoi poyo lumugut takau maa' raginio maayag. Sumaguli' takau ra maagu no mababaya' ra pabukat-pabukat takau am mangayou ra pantula'. Raino totopot sanganu takau.”

¹⁰Taam i Judas, “Pai' masaboi aku mambaal koson raginio am magiru' intor ra intok pangayawan. Amon ru topot ra nasaboi noyo paat takau, polosoon itakau matoi ra baani kaga' koson ra pabukat-pabukat takau. Kaa' pai' takau jamali' pangurumatan ritakau.”

¹¹Saujor ru Siria pana miningkual minuma' ra saujor ru Jaudi. Pulalai mangkuda nilo pinantuliar nasauk ruo ngantayaran. Ulun-ulun mamanah am mompobobol ra kalat nagulu intor ra ngaangai' ru saujor, koson niayuk ra pulalai mamatoi ondo' ngaangai' no baani kaga'.

¹²I Bakidis galama' nangalap ra intok giu' ra tampilon pamiris. Pulalai minugar jalai intor ra ruo kiing, liliwa' bujung sinamputan. Saujor ri Judas niayuk nanamput ra bujung.

¹³Tana' ti nogonggon sabap ra bolos mosongou kaga' ru karuruo pulalai ondo' nangayou. Pangayawan no nasauk intor ra susuab saboi ra rondom.

¹⁴Ilai' ri Judas ra i Bakidis am pulalai ondo' maikang kaga' soroi giu' ra tampilon pamiris. Io am ulun-ulun nano pana ondo' baani kaga'

¹⁵nangayou ra saujor tampilon pamiris ru saujor Siria am nangilou risilo saboi ra kagunungan Asdod.

¹⁶Kaa' paat ra saujor pamiris ru pulalai Siria nakakito ra saujor tampilon pamiris nilo binulunsar noyo saboi liminugut, likou ilo am namulunsar ri Judas am ulun-ulun nano intor ra bakulung.

¹⁷Nangayou ilo ra moporos, am ra karuruo bala masuang minatoi.

¹⁸Pupus no i Judas minatoi am ulun-ulun nano nagiru'.

¹⁹Baangkai ri Judas pana inalap ri Jonatan am Simon pabukat nano am linobong giu' ra kalabangan ru kinamatuaan nilo giu' ra Modiin.

²⁰Tinangian am sinulaboi io ru titikop ru Israil. Orou-orou buoi nilo nangulir am mindagu,

²¹“Kalo lair ulun ondo' makapamayag ra Israil minatoi!”

²²Tunung-tunung ra bokon intor ri Judas, ngaangai' pangayawan nano, kinapanggol nano tumula' am binaal-binaal moonsoi nano ondo' maayo, kalo natulisan ngaangai' no sabap masuang kaga' koson tulisin.

²³Kopongo i Judas minatoi, ulun ru Jaudi ondo' kalo nampalio ra ukum minujak poyo giu' ra titikop ru libung ru Israil am ngaangai' ulun malaat niayuk siminaguli'.

²⁴Paat raginio pagun no natiu' ru bitilan ondo' maaja', am mamagun tumalimpuun maya' ra pulalai ru ulun malaat no.

²⁵I Bakidis galama' nampili' am nampakakat ra kukula' ngaulun ru Jaudi ondo' malaat koson maningganai ra pagun no.

²⁶Rangan-rangan ri Judas inibit minuma' ri Bakidis, am nangukum am nagasab io risilo.

²⁷Paat raginio mapagon kaga' ra tayar ru Israil, rondo' ondo' kalo igondo' nailian nilo intor ra nabi-nabi kalo boo nambujak risilo.

²⁸Kopongo raginio rangan-rangan ri Judas timinimung am minindagu ri Jonatan,

²⁹“Intor ri Judas maayo muno minatoi, kolondo' ulun koson riso ondo' naningganai ritakau manggal ra pantula'-pantula' takau am i Bakidis am niayuk ngaangai' ulun ondo' mantula' ra bansa' takau.

³⁰Ginio ra orou raiti' pilion mai okou masauk ra ulun malit ri Judas koson ra panguasa' mai koson maningganai ramon mangayou.”

³¹Orou raginio niayuk i Jonatan nangapu ra kandoi masauk ra tingganai minalit ra maayo nano.

³²Pokorongog i Bakidis ra i Jonatan sinauk noyo ra tingganai, mirot io koson mamatoi riso.

³³Ginuang ri Bakidis no napandayan, i Jonatan am i Simon maayo nano pana am niayuk ulun-ulun nano nagiru' ra tana' kaagisan Tikoa am nangkim mamaar ra kolam Aspar. (

³⁴Norongog ri Bakidis baal raginio ra orou Sabat, io pana am ngaangai' ru saujor nano liminaup ra Sungoi Jordan.)[23]

³⁵I Juanis maayo ri Jonatan nanalingapu ra kuliamos kaukapan nilo ondo' masuang kaga'. Sinusub io mongoi ra ulun Nabatai rangan nilo, koson makitaak ra pangiawan mampauli ra kuliamos raginilo.

³⁶Kaa' i Juanis binulunsar am rinakop ru ulun Jambri intor ra Madiba, am ngaangai' kuliamos no inibit nagiru'.

³⁷Kopongo kukula' buoi norongog ri Jonatan am i Simon ra ulun Jambri mangiantak rondo' bunsag paguatan ra maayo. Masaga' ilo mampiau ra ruandu' uoton intor ra bandar Nadabat bayaan ru masuang ulun mamaya'. Ruandu' uoton no anak ru sangulun Kanaan ondo' nauligan kaga'.

³⁸I Jonatan am i Simon moogot mambalos ra pinatayan ri Juanis maayo nilo. Ginio ra ilo am ulun-ulun nilo minongoi ra kagunungan am nansibuni ra giu'.

³⁹Inilayan nilo ralan, am nakito ra ulun masuang sagigia' ondo' nagibit ra masuang kuliamos. Ungkuyon uatin, rangan-rangan nano, am pabukat-pabukat nano miningkual manguma' ra bala ru ruandu' uoton. Nagibit ilo ra masuang kaukapan ra kinandoi mangayou, am binaya' ru ulun ondo' nangkuli ra miujik am naningkug ra gandang.

⁴⁰Ulun ru Jaudi namulunsar ra pulalai no am namatoi masuang intor risilo. Ondo' bokon nagiru' ra kagunungan, liliwa' ulun ru Jaudi nampagaau ra ngaangai' kuliamos longgom nilo.

⁴¹Koson raginio noyo bunsag paguatan no nakulau nasauk ra panguliran am rimbai-rimbai kaansukan nasauk ra sulaboi.

⁴²Koson raginio noyo i Jonatan am i Simon nambalos ra pinatayan ru maayo nilo. Ilo pana siminaguli' ra intok makatimug giu' ra kiing ru Sungoi Jordan.

⁴³Norongog ri Bakidis tanou raginio, am paat ra orou Sabat nababaya' io ra sampulalai saujor ondo' maayo nakasaboi giu' ra kiing ru Sungoi Jordan.

⁴⁴Indagu i Jonatan ra ulun-ulun nano, “Raino musiti' takau tumampos am mantula' toojo. Kalo igondo' takau ralalom ru baal makalalaa' toojo ti.

⁴⁵Pantula' soroi ra saang am talikuron takau. Tampilon ragiti ra Sungoi Jordan am tampilon ra giu' no intok makatimug am bulungkut makaruui. Kolondo' ralan ingkualan takau.

⁴⁶Pakiasi' no maa' raginio mamayag Tuhan ritakau intor ra pantula'.”

⁴⁷Pangayawan pana tumalimpuun. I Bakidis mamaar mapatoi ri Jonatan, kaa' nakapagiliu io.

⁴⁸I Jonatan am ulun-ulun nano pana timinindak ra ralalom ru Sungoi Jordan am nansarui ra sandaup. Kaa' pantula' kalo liminaup ra sungoi koson mangilou risilo.

⁴⁹Paat orou raginio olo'-olo' 1,000 ngaulun intor ra saujor ri Bakidis minatoi.

⁵⁰Pakasaguli' i Bakidis ra Jirusalim, timinalimpuun io nambaal ra kubu-kubu giu' ra nansusuai bandar giu' ra Judia, iono giu' ra Jiriko, Imaus, Bit-Oron, Bitil, Timnat, Paraton am Tipon. Kubu-kubu no piniot ra timbok-timbok ondo' masawat, kulobon garabang am tataun pamiot ra kulobon.

⁵¹Giu' ra ralalom ru kubu-kubu no pinaayan ri Bakidis saujor koson mantipagon ra ulun ru Israil.

⁵²Io niayuk nangikang ra pangampin ru bandar-bandar Bit-Jur am Gijir am niayuk kubu giu' ra Jirusalim am nampaayan ra rondo' pulalai ru saujor am ula' ra akanon giu' ra ralalom no.

⁵³Io pana nangalap ra anak-anak ru ulun nauligan kaga' giu' ra pagun no am nangaput risilo giu' ra ralalom ru kubu koson ra ulun rinakop.

⁵⁴Ralalom sila' karuo bilor 153[24] Tingganai Maayo Imam Alkimus nanusub koson mampalunsai ra timbok giu' ra liliut Baloi ri Aki Kapuuno'; koson raginio noyo io namuso ra kandoi ondo' ragili tiningganai ru nabi-nabi. Kaa' kandoi mampalunsai ondo' bagu ayuk tinalimpuunan,

⁵⁵linanggaan kalalaat sabap ra i Alkimus narualan. Inan nano minatoi am kalo magaal no kabang nano koson mindagu. Mulu' poyo kalo makapambaal io ra ragu pambilinan koson ra sasambaloi nano.

⁵⁶Paat raginio niayuk io minatoi ra naimbolo'.

⁵⁷Pokorongog i Bakidis ra minatoi noyo i Alkimus, saguli' io ra Raja' Dimitrius. Pagun Judia pana moonsoi buoi ruo ngambilor.

⁵⁸Kopongo raginio ngaangai' ulun ru Jaudi ondo' kalo nampalio ra ukum naguguum. Konilo, “Ilai', i Jonatan am ulun-ulun nano minayan ragiti ra moonsoi kaga'. Moonsoi mampiau takau ri Bakidis maa' raginio marakop no ilo ngaangai' ralalom sorondom ayuk.”

⁵⁹Ongoi ilo boo pansusunur ri Bakidis.

⁶⁰I Bakidis pana minatong nababaya' ra masuang pulalai ru saujor. Nangator io ra surat-surat sininok ra paguguum nano giu' ra Judia maa' raginio marakop nilo i Jonatan am ulun-ulun minaya' riso. Kaa' pirot nano kalo nasugut sabap inatang malaat nilo nakatabual.

⁶¹I Jonatan am ulun-ulun nano namparakop limo ngoopor ngaulun ru Jaudi ondo' naningganai ra inatang malaat no am namatoi risilo ngaangai'.

⁶²I Jonatan, i Simon am pulalai-pulalai nilo pana nagiru' ra Bit-Basi giu' ra tana' kaagisan. Nalunsai-nalunsai ra bandar no binaal nilo saguli' am pangampin piniot.

⁶³Pokorongog ra baal raginio, tinimung ri Bakidis ngaangai' saujor nano am niayuk nanusub ra ulun-ulun minaya' riso giu' ra Judia.

⁶⁴Io pana minongoi am nagawang ra bandar Bit-Basi. Orou-orou bandar no binulunsar ra kuliamos-kuliamos mangayou binaal galama'.

⁶⁵Kaa' tinatang ri Jonatan i Simon maayo nano giu' ralalom ru bandar, am io galama' am kukula' ngaulun ayuk miningkual minongoi ra asak.

⁶⁶Namulunsar io ri Odomir am pabukat-pabukat nano, niayuk bansa' Pasiron giu' ralalom ru kim-kim nilo. Kopongo kinala, nagamung ilo ri Jonatan am nababaya' riso namulunsar ri Bakidis.

⁶⁷Liliwa' raginio i Simon am ulun-ulun nano miningkual intor ra bandar am nonolob pangai' ra ngaangai' kuliamos mangayou.

⁶⁸Ralalom pangayawan no kinala i Bakidis. Siminangit io kaga' sabap ra inatang no ra pamulunsaran kalo nasugut.

⁶⁹Sangit nano pana giminaai ra ulun ru Jaudi ra malaat ondo' nangulisok riso koson matong ra pagun no. Masuang intor risilo pinatoi no. Io pana namatas koson muli' ra pagun nano.

⁷⁰Pokorongog ra baal raginio, nangator i Jonatan ra ulun mongoi ri Bakidis koson mansusunur ra pababansayan am pampalabusan ra ulun rinakop.

⁷¹Inapu ri Bakidis am nampaugar ra inatang ri Jonatan am nambantu' pinabaya' ra ibot ra buoi ru bayag nano kalo lumaat ri Jonatan.

⁷²Pakalabus ulun rinakop intor ra pagun Judia, minuli' i Bakidis ra pagun nano am kalo boo matong ra wilayah ru ulun ru Jaudi.

⁷³Pangayawan giu' ra Israil pana liminonggo'. Liminayun i Jonatan giu' ra Mikmas am tumalimpuun mamarinta ra mamagun. Ulun ru Jaudi ondo' malaat linuus no intor ra Israil.