Read Timugon Murut 2 MAKABI 1 Bible Online

2 MAKABI 1 - Timugon Murut bible

2 MAKABI 1

¹“Intor ra ulun ru Jaudi giu' ra Jirusalim am Judia posoboyon ra pabukat-pabukat nilo giu' ra Misir, kaansayan!

²Gama' ru i Aki Kapuuno' mataau guang ramuyun am manugut ra nabantuan Nano ri Abragam, i Isak am i Jakub, ulipon-ulipon Nano ondo' gumagaya'.

³Gama' ru aniin kou ra guguangon koson sumamba Riso am mambaal ra kasagaan Nano ra totopot ru guang.

⁴Gama' ru katawangon No pangkaraan muno koson makarati' ra Ukum am susuban-susuban Nano. Gama' ru mangani' Io ra kaansayan am kaansukan ramuyun,

⁵mangiou ra pakiasian-pakiasian min, mangampun ra tula-tula min am kalo mangiruan ramuyun paat ra makakapaganan.

⁶Akai ragiti tatanga' makiasi' ra tayar min.

⁷Ralalom bilor 169,[1] paat Raja' Dimitrius ondo' Karuo namarinta giu' ra Siria, nanulis akai ramuyun intor ra kaimbalaan am kapaganan-kapaganan ondo' liminumpa' ramon ra bibilor buoi ra nakasail i. Paat raginio i Jason am ulun-ulun minaya' riso liminaat am giminuor ra pamarintaan giu' ra Tana' Matulai.

⁸Kulobon-kulobon ru Baloi ru Tuhan sinolob am ulun ondo' kolondo' sala pinatoi. Akai pana nakiasi' ra Tuhan am tinaam No pakiasian-pakiasian mai. Mampataak akai ra taak simbalui ra bibiag am taak simbalui koson paringkuanangan ra Tuhan;[2] nampaang ra lampung-lampung giu' ra Baloi ru Tuhan am nampataak ra ruti' pasulungon.

⁹Sabap raginio musiti' kau mangiantak ra rondo' pangiantakan ondo' nogondo' ra Pangiantakan Mangkalukub ra Raun ralalom ru sila' Kisliw.” Tinulisan ra bilor 188.[3]

¹⁰“Intor ra ulun ru Jaudi giu' ra Jirusalim am Judia, Majlis ru Matutuo-Matutuo am i Judas, posoboyon ra ulun ru Jaudi giu' ra Misir, mulu' poyo ri Aristobulus papag ru imam-imam ondo' patimpokon am mangingila' ra Raja' Ptolimius, kaansayan!

¹¹“Maringkuanang akai kaga' ri Aki Kapuuno', sabap ra namayag Io noyo ramon intor ra makalalaa' ondo' maayo am nangindangan ramon minanggal ra raja'.

¹²Pinagiru' ri Aki Kapuuno' pantula' intor ra Bandar Jirusalim.

¹³Pakasaboi Raja' Antiokus giu' ra Pirsia, saujor nano makito ra mapagon kalaan. Kaa' tinutuk ilo giu' ra ralalom ru Kuil Dewi Nania sabap ra ruung ru imam-imam ondo' siminamba ra dewi no.

¹⁴Raja' Antiokus minatong ra giu' nababaya' ra kukula' ngaulun rangan. Nampakito io ayuk ra masaga' manangandu' ra dewi no maa' raginio makaalap ra masuang rapu' ru kuil koson ra mulo.

¹⁵Imam-imam nampatalang ra ngaangai' rapu' no. Pakasubol raja' am rangan-rangan nano ra ralalom ru kuil, angabi' ru imam-imam kulobon no.

¹⁶Intor ra kulobon nakasibuni giu' ra taap, binobol nilo raja' am rangan-rangan nano ra batu saboi minatoi. Baangkai nilo tinotok am ulu nilo pinapatir ra ulun giu' ra liwar.”

¹⁷Koompor noyo i Aki Kapuuno' takau sabap nangukum Io ra ngaangai' ulun malaat no. Koompor noyo Io sabap ra ngaangai' no.

¹⁸Paat ra orou karuo ngoopor am limo ra sila' Kisliw, mangiantak akai ra Pangiantakan Baloi ru Tuhan Patimpokon Saguli'. Guang mai musiti' mampakara' ramuyun ra baal raginio, maa' raginio akau pana mangiantak raginio koson ra akau mangiantak ra Orou Maayo Mangkalukub ra Raun am Pangiantakan ru Apui. Pangiantakan ru Apui no mampakara' ra kasaukan paat ri Nigimia nampataak ra taak simbalui nopongo nambaalan saguli' ra Baloi ru Tuhan am altar.

¹⁹Intor ra apui no, mokoondo' tunung koson ragitio: Paat ra kinamatuaan takau inaut ra pagun Pirsia, kukula' ngaulun imam ondo' mapasau guang simininok nangalap sanganu apui intor ra altar, am pinasibuni ginio giu' ra lonor ru tulubong ondo' mapua'. Apui no pinasibuni ra moonsoi kaga', saboi intok no kalo napandayan ru osoi pana.

²⁰Kopongo bibilor buoi, paat Tuhan nangiou, nangator raja' Pirsia ri Nigimia siminaguli' ra Jirusalim. I Nigimia pana nanusub ra papag ru imam-imam ondo' ragili nampasibuni ra apui no koson maguyum ra apui no.

²¹Nambala' ilo ramon ra kolondo' natuum nilo ra apui, kaa' sanganu ayuk timug makaumau. Nanusub i Nigimia risilo mangalap am magibit ra timug no riso. Kopongo ngaangai' taak simbalui pinabanta' giu' ra rasawat ru altar, nanusub io ra imam-imam mampatakis ra timug no ra rasawat ru tataun am taak simbalui.

²²Kabaal ngaangai' no, am kukula' ayuk ngasaat kalupus mato ru orou nakasalula' intor ra talikur ru gaun, pulali' ru apui ondo' maayo nanimbula' saboi ngaangai' ulun nangimuag.

²³Kopongo raginio, liliwa' taak simbalui no nosolob ru apui, Tingganai Maayo Imam i Jonatan nampasaboi ra pakiasian, tungguli' ri Nigimia am imam-imam am niayuk ngaangai' ulun ra bokon ra giu' no.

²⁴Pakiasian ri Nigimia koson raginio, ‘Iou Tuhan i Aki Kapuuno', Namangun ra ngaangai' no, Okou makaimuag am maikang, matimpok am mokoondo' guang makaasi'. Okou ayuk Raja', Okou ayuk moonsoi,

²⁵Okou ayuk matimpok am mataau guang. Okou Maayo Kaga' Kuasa' am Mantilayun, ondo' mamayag ra Israil intor ra ngaangai' kapaganan. Okou ondo' nampalili' ra kinamatuaan mai masauk ra ulun pinili' Muno.

²⁶Apuo' noyo taak simbalui ti ondo' pataakon mai koson ra titikop ru Israil. Sindungi' ulun pinili' Muno am kapasawo' ilo.

²⁷Palabuso' bansa' mai ondo' nasauk ra ulipon giu' ra pagun-pagun ra bokon am timungo' saguli' ulun sabansa' ramon ondo' nantutuliar. Pakaasi' no ra bansa' mai ondo' asabin am malaat pinamakuan. Bansa'-bansa' ra bokon pana makapandai ra Okou i Aki Kapuuno' mai.

²⁸Ukumi' noyo bansa'-bansa' ondo' malilimbau am malaat ondo' nangimbolo' ramon.

²⁹Paayano' ulun Muno magulayun giu' ra pagun Muno ondo' matulai koson ra rinagu ri Musa.'

³⁰Kopongo raginio narimbai imam-imam ra rimbai-rimbai pangamparan.

³¹Kopongo taak simbalui nakai' kosolob, nanusub i Nigimia maa' raginio suwo ru timug no pasasaron ra rasawat ru kukula' batu maayo.

³²Paat raginio niayuk apui nanimbula', kaa' apui no nalasa' paat sinda ru apui nakasilau intor ra altar.

³³Tanou raginio nakatabual ra ngaangai' intok, am raja' Pirsia binalaan ra rondo' timug natuum giu' ra intok nambunian ru imam-imam ra apui ru altar ra ilo kalo poyo inaut ra intok namatiran, am ra i Nigimia am rangan-rangan nano namakai ra timug no koson nonolob ra taak simbalui giu' ra altar.

³⁴Kopongo kasaukan no naimumuyan, nanusub raja' maa' raginio intok raginio aniin ra insor am potonowon ra mapasau.

³⁵Intok raginio pinalansan ru raja' ra kukula' ngaulun, am nangani' io risilo ra santayaran intor ra kalabaan maayo ondo' noowot intor ra intok no.

³⁶I Nigimia am rangan-rangan nano nanginggalan ra timug no ‘naptar’, ondo' arati' no pamasawan, kaa' kasuangan ulun manabit raginio ‘naptai’.