Read Timugon Murut 2 MAKABI 10 Bible Online

2 MAKABI 10 - Timugon Murut bible

2 MAKABI 10

¹Ralalom naningganayan ru Tuhan, i Judas Makabi am ulun-ulun minaya' riso nampagaau saguli' ra Baloi ri Aki Kapuuno' am bandar Jirusalim.

²Linunsai nilo altar-altar ondo' binaal ru ulun bansa' ra bokon giu' ra tana' marata' ru nasuangan am nanutuk ra intok-intok sambaan ra bokon.

³Kopongo raginio namasau ilo ra Baloi ru Tuhan am nanirong rondo' altar bagu. Nambaal ra apui ra batu am nampataak ra taak simbalui koson ra kainsaa' kalupus ruo ngambilor. Nonolob ilo niayuk ra kaminyan, nampaang ra lampung-lampung am nampataak ra ruti' pasulungon.

⁴Kopongo raginio kiminubu samba ilo am nakiasi' ra Tuhan maa' raginio kalo boo matiu' ilo ra karaat koson ragili. Nakitaak ilo maa' raginio Tuhan mangukum risilo ra mataau guang amon ru makatula ilo poyo, am kalo mampataak risilo ra ulun bansa' bokon ondo' kolondo' guang am masaga' magulas.

⁵Paat orou karuo ngoopor am limo ra sila' Kisliw Baloi ru Tuhan kinapasau saguli', topot ra orou am sila' ra nogondo' paat Baloi no jinamalan ru ulun bansa' bokon.

⁶Rondo' pangiantakan ra maansukan guang pinaugar buoi balu' ngoorou koson ra Pangiantakan Mangkalukub ra Raun. Nangkara' ilo saguli' ati kulaan paat ra Pangiantakan Mangkalukub ra Raun kalo nabuoi ragili, timinanggau ilo giu' ra kagunungan am minayan giu' ra luang batu koson ra bibiag masigo.

⁷Kaa' raino guguluyur ilo minugar am nagibit ra raan cemara am bulisang-bulisang masansam am raun palma, liliwa' narimbai ra rimbai-rimbai pangamparan ra Tuhan ondo' namasau ra Baloi Nano saguli'.

⁸Ilo pana rondo' guang namatas ra moonong bilor, orou raginio musiti' iantakon ru ngaangai' bansa' ru Jaudi.

⁹Koson raginio noyo ondo' nasauk ra pupus-pupus ru bayag ru Raja' Antiokus Ipipanis.

¹⁰Raino tunungon mai intor ra Raja' Antiokus Iupator, anak ungkuyon ru Raja' Antiokus Ipipanis, ulun malaat no, am mangani' akai ra tunung maantos intor ra karaat ondo' nakinibitan ru ngaangai' pangayawan nano.

¹¹Kopongo nanturung ra kurisi' ru raja', pinasauk ru Raja' Antiokus Iupator sangulun ininggalanan ri Lisias nasauk ra perdana menteri am gabenor ru Siria Maayo am Pinisia.

¹²Minalit io ri Ptolimius Makron, gabenor kasaa' ondo' minirot koson matimpok pamakuan ra ulun ru Jaudi. Ginio sabap ra ngaangai' kalaatan ondo' pinalumpa' ra ulun ru Jaudi, minirot i Ptolimius ra mobonsoi risilo.

¹³Kinibit ru ginio io pinabala' ra Raja' Iupator ru kukula' ngaulun rangan ru raja'. Moonong io mokorongog ra inan nano sabiton ra ulun malaat, sabap nangiruan noyo ra pulu' Siprus ondo' pinalansan riso ru Raja' Pilomitor, raja' ru Misir, am minaya' ra Raja' Antiokus Ipipanis. Pupus no kalo boo maguut no kandoi nano ra matanda', io pana nantuwo am nanginum ra tuwo.

¹⁴Kopongo i Gorgias nasauk ra gabenor ru Siria Maayo am Pinisia, nagalung io rondo' pulalai ginajian, am moonong makakaluagan, mambaal io ra pangayawan manggal ra ulun ru Jaudi.

¹⁵Suai raginio ulun ru Idumia niayuk nanguasa' ra kubu-kubu ondo' maatang am nararayus nampajajou ra ulun ru Jaudi. Inalungan nilo ulun nagigiru' intor ra Jirusalim am narayus mirot koson mapatabual ra pangayawan.

¹⁶Sabap raginio i Judas Makabi am ulun-ulun minaya' riso, kalupus nakiasi' nakiindangan ra Tuhan, napajunjung ra kubu-kubu ru ulun Idumia.

¹⁷Namuun ilo ra pamulunsaran maayo kaga', nampalugut ra ulun ondo' nangampin ra timbok, am nampagaau ra kubu-kubu no am namatoi ra osoi ayuk maratu' ra kalindu' nilo. Koson raginio noyo ilo namuso ra olo'-olo' 20,000 ngaulun.

¹⁸Kaa' olo'-olo' 9,000 ngaulun pantula' nagiru' giu' ra ralalom ru ruo kubu ondo' maikang kaga' am mokoondo' ra ngaangai' ondo' pakuan koson manguma' ra pagawangan.

¹⁹I Judas galama' nagiru' kalalaat giu' ra intok-intok ra bokon ondo' mompogogot kaga' ra indangan nano. Iniruanan no boo i Simon am i Jusup am niayuk i Jakius am ulun-ulun nano. Pulalai raginio sama' gayo koson mamparayus ra pagawangan.

²⁰Kaa' kukula' ngaulun ra ulun ri Simon makaguang ra mangingkaut, am paat nakaapu ra ruit rasua suang 200 ngakilogram pirok, nompoloso ilo ra kukula' pantula' nagiru' intor ra kubu-kubu no.

²¹Pokorongog raginio, nanimung i Judas ra tingganai-tingganai ru pulalai no am nanguu' ra ngaangai' ru ulun no nantalan ra pabukat-pabukat nilo am nampalabus ra pantula' koson mangayou risilo.

²²Nanusub io maa' raginio ulun-ulun malaat no potoyon, am rinayus karuo-ruo kubu no kinuasa' no.

²³Masalok i Judas makasugut ralalom pangayawan, mamatoi ra nasailan intor ra 20,000 ngaulun giu' ra ralalom ru karuo-ruo kubu no.

²⁴I Timotius ondo' nakaili' kinala ru ulun ru Jaudi, nambaal ra rondo' pulalai ondo' maayo kaga', ondo' ilo intor ra saujor-saujor ginajian. Io niayuk nanimung ra masuang kaga' saujor nangkuda intor ra Asia. Io pana jiminalai masaga' mampagaau ra Judia ra ikang ru kinandoi mangayou.

²⁵Paat ra saujor ru pantula' minggaar noyo, i Judas am pulalai nano nakiasi' ri Aki Kapuuno' am nambayang ra konoon karung am tinaukan rasawat ru ulu ra kaau.

²⁶Kubu samba ilo ra kalayam ru altar am nakitaak maa' raginio makaasi' i Aki Kapuuno' risilo am manggal ra pantula'-pantula' nilo koson ra binantu' Nano ralalom ru Ukum Nano.

²⁷Kopongo nakiasi', kakato' nilo kinandoi mangayou am minongoi maalur koborok intor ra Jirusalim, am minuog ilo paat makainggaar noyo ra pantula'.

²⁸Katawang ra susuab, karuo-ruo pulalai no napajunjung ra rondo' am bokon. Koson manugut ra kamanangan, saujor ru Jaudi pinalansan kinabaani nilo am liminansan ilo ra Tuhan, kaa' pantula' nompoloso ra inan tiningganai ru guang sumangit nilo ralalom ru pangayawan.

²⁹Paat ra pangayawan no malasu' noyo, nakito ru pantula' limo ngaulun ondo' maindon kaga' timinuun intor ra limbowon. Nangura' ilo ra kuda ra kakang mas. Kalimo-limo ngaulun no naningganai ra pulalai ru Jaudi

³⁰am nampalibung ri Judas koson manindung riso am kaukapan ru kinandoi mangayou nilo. Liliwa' raginio rinasaman nilo pantula' ra anak ru panah am ganit. Naubong pantula' am kalo naaru'-aru', saboi nantutuliar ilo ralalom ru baal najajajou.

³¹Pulalai ru saujor mantana' suang 20,000 ngaulun am pulalai nangkuda suang 600 ngaulun pinatoi.

³²Kaa' i Timotius galama' nagiru' ra Gijir, rondo' kubu ondo' mapiot kaga'. I Kairias, pabukat nano iono komando giu' ra kubu no.

³³Pulalai ri Judas ondo' maantak kaga' guang nagawang ra kubu no buoi apat ngoorou.

³⁴Ulun giu' ra ralalom ru kubu liminansan kaga' ra kinapiot ru intok nilo am narayus nompogolok ra ragu-ragu magasab ri Aki Kapuuno' am ulun ru Jaudi.

³⁵Paat maar matawang ra orou kalimo, ruo ngoopor ngaulun ulun ri Judas ondo' nasimbuluk ra sangit sabap ra ragu-ragu magulas no, baani napajunjung ra timbok. Siminansar ilo koson ra bibiag masigo am ra ilang nampatoi ra osoi ayuk ondo' nauma' nilo.

³⁶Koson niayuk ra kukula' ngaulun nagaloi ra rasawat ru timbok intor ra tampilon ra bokon am namulunsar ra ulun giu' ra ralalom no. Sinolob nilo kukula' manara, nampaang ra apui am sinolob ulun ra naayag poyo ondo' nagasab ra Tuhan. Kukula' ngaulun ra bokon nampalunsai ra kulobon-kulobon garabang, saboi nangiou ra ulun-ulun ri Judas ra bokon no siminubol am nampagaau ra bandar.

³⁷Nansibuni i Timotius giu' ra rondo' tulubong mapua', kaa' pinatoi io nabaya' ri Kairias pabukat nano am i Apolopanis.

³⁸Kopongo pangayawan no naampus, ulun ru Jaudi nangiantak ra pangiantakan am narimbai ra rimbai mongompor-ngompor am rimbai-rimbai paringkuanangan tayar ru Tuhan sabap nanulu' Io ra kinoonsoi Nano ondo' maayo am nangani' risilo ra kamanangan.