Read Timugon Murut 2 MAKABI 11 Bible Online

2 MAKABI 11 - Timugon Murut bible

2 MAKABI 11

¹Kalo nabuoi kalupus i Timotius kinala, i Lisias, linansanan ru raja' am pabukat ru raja' am niayuk perdana menteri, nokorongog ra kasaukan no. Siminangit kaga' i Lisias,

²am naningganai ra olo'-olo' 80,000 ngaulun pulalai saujor mantana' am ngaangai' ru pulalai mangkuda nano manggal ra ulun ru Jaudi, am kuayan mampasauk ra Jirusalim rondo' bandar ayanan ru ulun ru Junani.

³Io niayuk makakuayan mampalulur ra cukai intor ra Baloi ri Aki Kapuuno', koson intor ra baloi sambayangan ru bansa'-bansa' ra bokon, mantalan ra kandoi ru Tingganai Maayo Imam ra moonong bilor.

⁴Nasamaan kaga' i Lisias ra pulalai ru pangayawan nano ondo' intor ra kaaparan ngaribu ngaulun pulalai ru saujor mantana', riribu ngaulun pulalai mangkuda am balu' ngoopor ngainan gaja, kaa' totopot kalo pinaaya' no kuasa' ri Aki Kapuuno'.

⁵Siminubol io ra Judia am namulunsar ra kubu Bit-Jur, olo'-olo' ruo ngoopor am limo ngakilomito giu' ra tampilon rabugus ru Jirusalim.

⁶Paat ri Judas am ulun-ulun nano nokorongog ra i Lisias tatanga' magawang ra kubu-kubu nilo, ilo am ngaangai' ru mamagun nantangi' am niayuk nakitaak ra Tuhan maa' raginio manusub Io ra malaikat ondo' moonsoi koson mamayag ra Israil.

⁷I Judas ondo' kasaa' toojo nangakat ra kinandoi mangayou, nangkimait ra bokon maya' riso maa' raginio mangkinuo ra painawo koson mangindangan ra pabukat-pabukat nilo. Nabaya' ra guang maantak kaga', nababaya' ilo minugar.

⁸Paat ilo lakat poyo mamaar ra Jirusalim, bujak sangulun nangura' ra kuda naningganai ra saujor nilo. Bayang nano ngaangai' mapulak am pinakulawi no kinandoi mangayou ondo' mas.

⁹Nagagampan ilo naringkuanang ri Aki Kapuuno' ondo' makaasi'. Nangikang Io ra guang nilo saboi nakatampos mapajunjung ra sala' ka ulun ayuk, kaa' niayuk bibiag ondo' masigo kaga' am timbok-timbok basi'.

¹⁰Ilo pana jiminalai ra baal ru nakatampos mangayou, binaya' ru ondo' sinusub intor ra suruga', sabap ra i Aki Kapuuno' makaasi' risilo.

¹¹Koson boo ra singa', napajunjung ilo ra pantula' am namatoi ra 11,000 ngaulun saujor mantana' am 1,600 ngaulun pulalai mangkuda, kaa' ondo' bokon no nagiru' kalalaat.

¹²Ilo ondo' nagiru' no masuang ondo' napilat am natatakan ra kinandoi mangayou. I Lisias galama' nakalabus sabap ra nagiru' ra ralan makauyuyu'.

¹³I Lisias sala' ka ulun sasambungon, io pana nangkara' ra intor nakalaan ondo' bagu nakaimbolo' riso. Nalimanan no ra ulun ru Jaudi kalo maalap ra kala sabap no i Aki Kapuuno' ondo' makakuasa' maya' ra bala nilo. Ginio ra nangator io ra pinson ra ulun ru Jaudi

¹⁴maa' raginio mobonsoi ilo am ra bantu'-bantu' ra matimpok. Io niayuk nambantu' mampajajal ra raja' maa' raginio makimampabukat risilo.

¹⁵Nangkara' i Judas Makabi ra kaatangan ru mamagun, ginio ra nangiou io ra ngaangai' ondo' rinagu ri Lisias, sabap raja' pana nangiou noyo ra ngaangai' kitaakon natulisan ondo' pinasaboi ri Judas ri Lisias.

¹⁶Koson ragitio noyo bolos ru surat ri Lisias posoboyon ra ulun ru Jaudi: “Intor ri Lisias posoboyon ra mamagun ru Jaudi, kaansayan!

¹⁷Ulun sinusub min, iono i Juanis am i Absalom, nampataak noyo ra surat ondo' sinainan min, pinasaboi raki', am nakitaak ra taaman ra suang ru surat no.

¹⁸Pinasaboi ku noyo atan ondo' musiti' mapandayan ru raja', am nangiou io ra atan ondo' maalap pakaugar.

¹⁹Amon ru akau ngaangai' magulayun gumagaya' ra pamarinta, piroton ku ngaangai' ondo' moonsoi ra tayar min paat ra orou matong.

²⁰Sinusub ku noyo ulun-ulun kuno am ulun-ulun mino koson mansunur ra baal-baal ti ra moonsoi poyo ra akau ngaangai'.

²¹Kaansayan! Tinulisan paat ra orou karuo ngoopor am apat sila' Jius Korintus bilor 148.”[12]

²²Koson ragitio noyo bolos ru surat ru raja' posoboyon ri Lisias: “Intor ra Raja' Antiokus posoboyon ra Ondo' Matulai i Lisias, kaansayan!

²³Ama' kuno minuli' noyo ra intok ru dewa-dewa, am moogot io maa' raginio ngaangai' mamagun ru pamarinta mamparayus ra baal-baal nilo ra kalo jojowon.

²⁴Makarati' aku ra ulun ru Jaudi marara' maya' ra ralan kaayagan ru ulun ru Junani koson ra ondo' kasagaan ru ama' kuli. Nakitaak ilo maa' raginio iowon maya' ra kaulayan nilo galama' sabap ra maansayan ilo poyo ra kaayagan raginio.

²⁵Masaga' io maa' raginio bansa' raginio makalabus intor ra jajajou. Aku pana namatas ra Baloi ri Aki Kapuuno' pasagulion risilo am ra iowon ilo maayag sumugut ra kaulayan ru kinamatuaan nilo.

²⁶Atari' noyo ulun risilo am pobonsoi no risilo, maa' raginio makapandai ilo ra gogot ru guang kuno am rumoro', am niayuk mambaal ilo ra baal nilo sigagama' ra guang matasu'.”

²⁷Koson ragitio noyo bolos ru surat ru raja' posoboyon ra bansa' ru Jaudi: “Intor ra Raja' Antiokus posoboyon ra tingganai-tingganai ru bansa' Jaudi am ngaangai' mamagun ru Jaudi, kaansayan!

²⁸Malansan aku ramuyun ngaangai' moonsoi ayuk. Aku galama' moonsoi ayuk.

²⁹Nambala' i Minilaus raki' ra moogot kau muli' am mambaal ra baal-baal min.

³⁰Ilo pana ondo' minuli' ra kalo poyo orou talu ngoopor ra sila' Ksantikus, nakitaak ra pangiawan am barakat kuno.

³¹Iowon kau maya' ra aturan-aturan galama' intor ra akanon am ukum-ukum ra bokon koson ragili. Kolondo' sangulun pana ukumin sabap ra kasalaan ondo' kalo siningon.

³²Nangator aku ri Minilaus koson mompororo' ra pangkaraan min.

³³Kaansayan! Orou mopor am limo ra sila' Ksantikus bilor 148.”

³⁴Ulun ru Roma pana nangator ra surat posoboyon ra ulun ru Jaudi. Koson ragitio bolos ru surat no: “Intor ri Kwintus Mimius am i Titus Manius, ulun sinusub ru ulun ru Roma, posoboyon ra mamagun ru Jaudi, kaansayan!

³⁵Akai niayuk nangiou ra atan ondo' iniou ri Lisias, pabukat ru raja' koson ramuyun.

³⁶Raino mangkiralan akai mongoi ra bandar Antiokia. Moogot akai mampasaboi ra kaatangan min giu' ra saang ru raja'. Karaa' noyo baal-baal ondo' posoboyon ri Lisias ra raja', am atari' noyo ulun ra mataki'

³⁷ra kalo malibut, maa' raginio makapandai akai ra kapatasan min.

³⁸Kaansayan! Orou mopor am limo ra sila' Ksantikus bilor 148.”