Read Timugon Murut 2 MAKABI 12 Bible Online

2 MAKABI 12 - Timugon Murut bible

2 MAKABI 12

¹Kopongo binaal nabantuan pabansayan ru ulun ru Jaudi am ulun ru Siria, siminaguli' i Lisias ra raja', am ulun ru Jaudi siminaguli' nantanom.

²Kaa' kukula' ngaulun panguasa' galama', i Timotius am i Apolonius anak ri Ginaius am niayuk i Giironimus am i Dimopon am niayuk i Nikanor tingganai ru pulalai Siprus, marara' mompoloso ra ulun ru Jaudi maayag ra moonsoi.

³Olo'-olo' paat raginio mamagun ru Jopi nambaal ra malaat ra ulun ru Jaudi giu' ra bandar no. Binaal-baal nilo paliso moonsoi am nampiau ra ulun ru Jaudi mabaya' ra sasambaloi nilo koson masundoi ra parau-parau ondo' tinampos nilo.

⁴Sabap ra baal raginio pinatas noyo ru ngaangai' mamagun ru bandar, ulun ru Jaudi naninong ra piau no ra moonsoi, sabap ra masaga' ilo mobonsoi am totopot kalo nanantam ra atan pana. Kaa' paat ilo giu' ra raat mamagun ru Jopi nompolosor ra ngaangai' ulun ru Jaudi no, ondo' suang nilo olo'-olo' ruo ngaatus ngaulun.

⁵Pokorongog ayuk i Judas ra baal ondo' malaat ra ulun sabansa' riso no, nambala' io ra ulun-ulun nano.

⁶Nakiasi' ilo ri Aki Kapuuno', akim ondo' matimpok, am jalai minanggal ra ulun namatoi ra pabukat-pabukat nilo. Paat ra rondom sinolob nilo intok raralan ru kapal am ngaangai' parau, am nonobok ra ngaangai' ulun ondo' nakito nansibuni ra giu' no.

⁷Sabap ra kulobon-kulobon garabang ru bandar kinaput, liminugut i Judas. Kaa' nampaguang io koson sumaguli' poyo am mamuso ra ngaangai' mamagun ru bandar no.

⁸Nokorongog i Judas ra mamagun ru bandar Jamnia niayuk makaguang koson mamatoi ra ulun ru Jaudi giu' ra bandar no.

⁹Io pana namulunsar ra bandar no paat ra rondom. Intok raralan ru kapal-kapal ondo' soroi ra giu' no sinolob no. Simbula' ru apui makito saboi giu' ra Jirusalim, ondo' galur nano limo ngoopor ngakilomito intor ra giu' no.

¹⁰Paat ri Judas am ulun-ulun nano maalur noyo ruo ngakilomito intor ra Jamnia koson jumalai mangayou ri Timotius, binulunsar ilo ru saujor Arab ondo' suang no olo'-olo' 5,000 ngaulun pulalai saujor mantana' am 500 ngaulun pulalai saujor mangkuda.

¹¹Nampapatoi ilo ra moporos, kaa' ulun-ulun ri Judas ra indangan ri Aki Kapuuno' nakapangala ra mamagun ru tana' kaagisan no. Ulun ra giu' no pana kitaakon mobonsoi ra ulun ru Jaudi. Nambantu' ilo mangani' ra bibiag tinambiag am mangindangan ra ulun ru Jaudi ra paat-paat makapakuan.

¹²Nampaguang i Judas ra pabukatan no mokoonong ralalom ru masuang baal. Io pana nangiou koson mobonsoi risilo. Kopongo raginio ulun ru Arab siminaguli' ra kim-kim nilo.

¹³I Judas niayuk namulunsar ra bandar Kaspin ondo' liniput ra timbok am mapiot kaga' pangampin no. Mamagun nano intor ra nansalinut bansa' ra bokon.

¹⁴Ra malansan ra kinapiot ru timbok-timbok ru bandar am ula' ra akanon ondo' soroi kalalair, liminaat ilo ra ulun-ulun ri Judas. Nagagasab ilo, nagulas ri Aki Kapuuno' am nompogolok ra ragu-ragu jajajou.

¹⁵Kaa' ulun ru Jaudi nakiasi' Riso Ondo' Maayo Kaga', Tuhan ru limbowon am tana' ti, ondo' paat ri Josua nanutuk ra timbok-timbok ru bandar Jiriko ra kolondo' kuliamos pombobol kapoam tataun pomopok. Kopongo raginio koson ra bibiag masigo, namulunsar ra timbok no.

¹⁶Sabap no kasagaan ri Aki Kapuuno', bandar no nagaau nilo. Namuso ilo ra masuang kaga' ulun, saboi rondo' tasik mamaar ra intok no, ondo' pila' no nalintanga' ngakilomito, nakito ra nototop ra raraa'.

¹⁷Intor ra bandar Kaspin, i Judas am ulun-ulun nano minugar olo'-olo' maatus am limo ngoopor ngakilomito giu' ra Karaks, intok inayanan ru ulun ru Jaudi ondo' sabiton ra bansa' ru Tubian.

¹⁸Kalo natuum nilo i Timotius giu' ra libung no, sabap ra minugar io noyo intor ra giu' no am kalo nakasugut nambaal ra atan-atan. Kaa' nangiruan io ra saujor pinosoroi ondo' maikang kaga' giu' ra rondo' kubu.

¹⁹Ruo ngaulun panglima ri Judas, i Dositius am i Sosipatir, namulunsar ra kubu no am namatoi ra ngaangai' saujor pinosoroi ondo' suang no olo'-olo' 10,000 ngaulun.

²⁰Kopongo raginio tinayar ri Judas saujor nano ra kukula' pulalai am nampasauk ri Dositius am i Sosipatir maa' raginio sigagama' maningganai ra sampulalai. Rayus no jiminalai io koson mangayou ri Timotius ondo' mokoondo' 120,000 ngaulun pulalai saujor mantana' am 2,500 ngaulun pulalai saujor mangkuda.

²¹Kopongo binalaan ra i Judas tatanga' minggaar, inataran ri Timotius bala ruandu', anak-anak am kuliamos-kuliamos nano giu' ra bandar Karnaim. Bandar no mapagon gaawon, mulu' poyo mapagon inggaarin, sabap ralan mongoi ra giu' no mansail ra intok-intok mapisok.

²²Kaa' paat ra pulalai kasaa' ri Judas nakabujak, saujor ru pantula' nakatigog ra nalaa' sabap rondo' pinaintalang intor ri Aki Kapuuno' ondo' makakito ra ngaangai' no. Nagiru' ilo ra pasagisak saboi masuang intor risilo napilatan sabap notobok ru pompor ru ilang ru rangan-rangan nilo galama'.

²³I Judas am ulun-ulun nano nangilou risilo ra mapirot poyo am namatoi olo'-olo' 30,000 ngaulun pantula'.

²⁴Timotius galama' rinakop ru pulalai ri Dositius am i Sosipatir. Kaa' i Timotius mapintar kaga' am nakasugut nampaintopot risilo koson mompoloso riso mugar, sabap ra masuang pabukat ru ulun ru Jaudi nasauk ra rinakop no, am potoyon ilo amon ru mokoondo' masauk riso.

²⁵Pupus no sabap ra pamayagan ru pabukat-pabukat nilo, pinalabus nilo i Timotius kalupus io nangani' ra bantu' am nagibot mampasaguli' ra pabukat nilo ra matanda'.

²⁶Kopongo raginio namulunsar i Judas ra bandar Karnaim am niayuk kuil Dewi Atirgatis am namatoi ra 25,000 ngaulun.

²⁷Kopongo nampakala am nanutuk ra pantula' no, binulunsar ri Judas Ipron, rondo' bandar mokoondo' ra kubu, intok ri Lisias am[13] ulun intor ra nansalinut bansa' ra namagun. Kamulakan ungkuyon ondo' maikang kaga' nangalap ra intok giu' ra saang ru timbok ru bandar am minanggal ra baani, liliwa' giu' ra ralalom ru bandar no mokoondo' masuang ula' ru kuliamos-kuliamos mangayou am kinandoi mangayou.

²⁸Kaa' ulun ru Jaudi nakiasi' makiindangan ra Tuhan, ondo' ra kuasa' Nano mamandak ra ikang ru pantula'. Nakasugut ilo mampagaau ra bandar no am namatoi olo'-olo' 25,000 ngaulun.

²⁹Intor ra giu' no minongoi ilo ra bandar Skitopolis, maatus ruo ngoopor ngakilomito giu' ra tampilon ralayo ru Jirusalim.

³⁰Ulun ru Jaudi ondo' minayan ra giu' no nambala' ri Judas ra pinamakuan risilo moonsoi kaga' ru mamagun ru bandar, mulu' poyo paat ra makakapaganan.

³¹I Judas am ulun-ulun nano pana mindagu ra paringkuanangan ra mamagun ru bandar. Nangunsu' io risilo koson magulayun moonsoi ra ulun ru Jaudi. Kopongo raginio minongoi ilo giu' ra Jirusalim am nakasaboi ra giu' talimpuunan ru Pangiantakan Mangkumos.

³²Kopongo Pangiantakan Mangkumos, ondo' ralalom ragu ru Junani sabiton ra Pangiantakan Pentekosa, i Judas am ulun-ulun nano namulunsar ri Gorgias, panglima Idumia.

³³I Gorgias nanguma' risilo ra 3,000 ngaulun pulalai saujor mantana' am 400 ngaulun pulalai saujor mangkuda.

³⁴Ralalom ru pangayawan no kukula' ngaulun ru Jaudi minatoi.

³⁵I Dositius, saujor mangkuda ondo' maikang kaga', ulun ri Bakinor,[14] namparakop ri Gorgias ra bayang maawar nano, am rinalaat io ra ngaangai' ru ikang nano maa' raginio makarakop ra ulun malaat no ra maayag ayuk poyo. Kaa' pulali' ru sangulun intor ra pulalai mangkuda Trakia napajunjung ri Dositius am namunggu' ra kalindu' nano saboi nauntas; i Gorgias pana nakapagiru' ra bandar Marisa.

³⁶Liliwa' raginio ulun ru Jaudi ulun ri Isdris nabuoi noyo kaga' nangayou, am naagui ilo. Pakiasi' boo i Judas maa' raginio Tuhan manulu' ra maya' Io ra bala nilo am maningganai ra saujor nilo.

³⁷Kopongo raginio paat i Judas marimbai ra rimbai-rimbai pangamparan ralalom ru ragu nano galama' koson ra bolos koson mangayou, ulun ru Jaudi ra namulali' namulunsar ra pulalai ri Gorgias saboi ilo nagiru'.

³⁸Kopongo pangayawan no inibit ri Judas ulun-ulun nano giu' ra bandar Adulam. Sabap ra mamaar noyo orou Sabat, kinapasau nilo inan sumugut ra kaulayan ru Jaudi, am mangiantak ra orou Sabat.

³⁹Paat ra orou sumunu' no, koson ra paat raginio karaan ra gogoton, i Judas am ulun-ulun nano minongoi panimung ra baangkai ru ulun ondo' minatoi ralalom pangayawan koson lobongon giu' ra kalabangan ru sasambaloi.

⁴⁰Kaa' nakasibuni giu' ra tampilon ralalom ru bayang ru moonong baangkai, natuum nilo jimat ru sinungkalalaing ru bandar Jamnia. Ukum ri Musa nanginggalar ra ulun ru Jaudi namakai ra jimat-jimat koson raginio. Napandayan toojo ra moonong ulun kua ra ngaangai' ulun no minatoi.

⁴¹Ilo pana nongompor ra binaal ru Tuhan, akim ondo' matimpok, ondo' nampakito ra atan ondo' nasibuni.

⁴²Ilo niayuk nakitaak maa' raginio tula pusoon lingono'. I Judas ondo' matulai no, nampakara' ra mamagun maa' raginio minggalur ra tula, sabap ra ilo galama' nakakito noyo ra atan ondo' nasauk ra ulun ondo' makatula noyo raginio.

⁴³Kopongo raginio nanimung io ra paindanganon intor ra ulun-ulun nano, am ruit ondo' natimung ngaangai' ra suang limo ngaatus ngampila' ruit pirok. Ruit no inataran no ra Jirusalim koson mampatampos ra taak simbalui koson mangampun ra tula. Binaal ri Judas ondo' moonsoi kaga' no sabap ra mangintopot io ra kaayagan saguli' ru ulun minatoi.

⁴⁴Amon ru kalo mangintopot io ra ulun minatoi maayag saguli', sasambungon am kolondo' onong koson makiasi' ra tayar nilo.

⁴⁵Mangintopot i Judas ra ulun mapasau guang makaapu ra ampos ondo' moonsoi am pangkaraan nano totopot mapasau am moonsoi kaga'. Sabap raginio nambaal io ra taak simbalui koson mangampun ra tula, maa' raginio ngaangai' ulun ondo' minatoi noyo palabuson intor ra tula nilo.