Read Timugon Murut 2 MAKABI 13 Bible Online

2 MAKABI 13 - Timugon Murut bible

2 MAKABI 13

¹Ralalom bilor 149[15] i Judas Makabi am ulun-ulun minaya' riso nokorongog ra tanou ra Raja' Antiokus Iupator tatanga' sumuku' ra pagun Judia nabaya' ra rondo' pulalai ru saujor ondo' maayo.

²Ralalom ru pulalai raginio, minaya' niayuk i Lisias, linansanan ru raja', ondo' niayuk nasauk ra perdana menteri. Mokoondo' ilo ra saujor ru Junani ondo' intor ra 110,000 ngaulun pulalai saujor mantana'; 5,300 ngaulun pulalai saujor mangkuda, 22 ngainan gaja, am 300 kurita' kuda ondo' inukapan ra tantab ra luda' no.

³I Minilaus minaya' risilo am nangambi' ra Raja' Antiokus, ilain koson ra kaatangan ru namagunan nano, kaa' sotopot no malansan io koson pasaukon ra Tingganai Maayo Imam.

⁴Kaa' i Aki Kapuuno', Raja' ru ngaangai' raja', napasingkual ra sangit ru Raja' Antiokus ri Minilaus. Pinabala' ri Lisias inono'-inono' ra Raja' Antiokus ra ulun malaat no puun ru ngaangai' kajajawan. Antiokus pana nanusub maa' raginio i Minilaus ibiton giu' ra bandar Biria am potoyon sumugut ra kaindalaman ru intok raginio.

⁵Giu' ra bandar no mokoondo' rondo' manara ondo' sawat no olo'-olo' 25 ngamito. Manara no nototop ra kaau. Giu' ra ralalom no mokoondo' rondo' kuliamos ondo' lumimpuong am ngaangai' ru pisuk no naratu' ra natunjai ra tampilon ru kaau.

⁶Ulun ondo' nambaal ra kaanggalan ra intok sambaan kapoam nambaal ra kalaatan ondo' maayo pooloyon ra rasawat ru manara no am paratuon ra ralalom ru kaau saboi matoi.

⁷I Minilaus ondo' malaat inukum ra matoi ra ralan raginio am poyo kalo linobong.

⁸Topot ginio ukuman ondo' matimpok riso, sabap ra masalok io noyo makatula sabap nampajamol ra kaau ondo' mapasau am apui ru altar giu' ra Baloi ru Tuhan. Raino io galama' nakatuum ra patayan nano giu' ra ralalom ru kaau.

⁹Nakai' guang ra limbau, Raja' Antiokus narayus jiminalai koson ra pamakuan ra ulun ru Jaudi malaat poyo kaga' intor ra binaal ru ama' nali.

¹⁰Pokorongog ra baal raginio, nanusub i Judas ra mamagun makiasi' orou am rondom ra Tuhan, sabap ra makalalaa' risilo matatakan ra Ukum, tana' namagunan am Baloi ru Tuhan nilo. Nasailan intor ra nakapagulu, makapakuan ilo ra indangan ru Tuhan maa' raginio kalo mompoloso Io ra ulun Nano ondo' bagu ayuk nakalabus intor ra pangimbalaan, maratu' saguli' ra kalindu' ru bansa'-bansa' ra bokon ondo' kalo makaulig ra Tuhan.

¹²Talu ngoorou buoi ru ngaangai' mamagun nampali, am kalo liminonggo' ilo kumubu samba liliwa' nantangi' am nakiindangan ra Tuhan ondo' makaasi'. Kopongo raginio rinagu ri Judas ragu-ragu koson mangikang ra guang ru mamagun am nanusub risilo tumampos ra giu' no.

¹³Kopongo raginio nansunur i Judas ra ulun-ulun matutuo. Namatas ilo koson mingkual am manalasai ra baal raginio ra indangan ru Tuhan, ra kalo poyo saujor ru raja' sumubol ra pagun ru Judia am manguasa' ra bandar ru Jirusalim.

¹⁴Pinataak ri Judas kapatasan pangayawan no Riso ondo' namangun ra limbowon am tana' ti. Nangkimait io ra ulun-ulun nano mangayou ra baani kaga' am masaga' matoi sabap ra ukum, Baloi ri Aki Kapuuno', bandar Jirusalim, intok namagunan am kaulayan nilo. Ilo pana minongoi am nanirong ra pangkiman nilo mamaar ra bandar Modiin.

¹⁵Nanaak i Judas ra ragu mangayou ti ra ulun-ulun nano: “Kamanangan intor ri Aki Kapuuno'!” Rondom raginio i Judas am sampulalai ulun mamulok ondo' baani kaga' namulunsar ra kim ru raja' am namatoi 2,000 ngaulun. Gaja ondo' maayo kaga' nabaya' ra ulun magalung nano pinatoi nilo niayuk.

¹⁶Pupus no nangkinibit ilo ra ngaangai' ulun giu' ra pangkiman no nakatigog ra nalaa'. Paat tumawang orou, i Judas am ulun-ulun nano nangiruan ra pangkiman no koson ra ulun namanang. Baal raginio naalap kabaal ra indangan am nanindungan ru Tuhan.

¹⁸Kopongo nakaili' ra binaal baani ru ulun ru Jaudi, minirot Raja' Antiokus koson mangimumui ra moonsoi poyo koson mamulunsar ra kukula' intok nilo.

¹⁹Jiminalai io namulunsar ra Bit-Jur, kubu ru Jaudi ondo' mapiot kaga'. Kopongo kinala ra nakalugut, namulunsar io igondo' poyo am kinala.

²⁰Nangator i Judas ra ngaangai' ondo' pakuan ra ulun giu' ra Bit-Jur.

²¹Kaa' ulun-ulun ri Judas ondo' makainggalan ri Rodokus nangani' ra pambalaan inopot no ra pantula'. Kabalu' pana raginio, binaal nano napandayan am io pana rinakop am pinatoi.

²²Minirot poyo raja' koson mansusunur ra mamagun ru Bit-Jur, am kalupus nakaalap ra pangiawan, pinalugut ru raja' pulalai ru saujor nano.

²³Kopongo raginio minongoi io pamulunsar ra pulalai ri Judas, kaa' kinala. Liliwa' raginio nokorongog raja' ra i Pilipus tinatang giu' ra Antiokia koson magalung ra ngaangai' baal ru pagun, giminuor noyo. Kalo boo nakapandai raja' no ra atan baalon saboi tumalimpuun io mansusunur ra pabansayan ra ulun ru Jaudi. Nangiou io ra kitaakon-kitaakon nilo am nagibot ra pamakuan risilo no matimpok, am poyo mampataak raja' ra taak simbalui am mangani' ra indangan ondo' maayo koson mangurumat ra Baloi ru Tuhan, am

²⁴mangapu ri Judas Makabi ra guang matasu'. Kopongo raginio, pinasauk ru raja' i Gigimonidis ra gabenor ru libung intor ra bandar Ptolimais saboi ra bandar Girar, am

²⁵raja' galama' minongoi ra Ptolimais. Siminangit kaga' mamagun ru bandar sabap ra raja' nambaal ra pangiawan ra ulun ru Jaudi. Masaga' ilo maa' raginio nabantuan no ukaton.

²⁶Kaa' i Lisias, linansanan ru raja', minindagu ra saang ru ulun nasuangan am kuminam toojo moposoroi ra nabantuan no. Kopongo napalinos ra ngaangai' ulun no am napaintopot risilo ra io motopot, io pana minuli' ra Antiokia. Koson raginio noyo namulunsaran ru raja' pinupusan ra nampalugutan.