Read Timugon Murut 2 MAKABI 14 Bible Online

2 MAKABI 14 - Timugon Murut bible

2 MAKABI 14

¹Pakasail talu ngambilor, i Judas am ulun-ulun nano nakaapu ra tanou ri Dimitrius anak ungkuyon ri Siliukus nasundoi noyo intor ra raralan ru kapal Tripolis nabaya' ra saujor ondo' maikang kaga' am rondo' kapal mangayou ra maayo, am

²niayuk nanguasa' ra pagun nalupus namatoi ra Raja' Antiokus am i Lisias, linansanan ru raja'.

³Mokoondo' sangulun makainggalan ri Alkimus ondo' ragili nasauk ra Tingganai Maayo Imam, kaa' paat ra kajajawan io ra guang masaga' minaya' ra ralan kaayagan ru ulun Junani. Nakaliman io ra kolondo' boo kaluagan ra tayar nano koson masauk ra Tingganai Maayo Imam, am niayuk ra kaayagan nano totopot noyo kalo moonsoi.

⁴Sabap raginio ralalom bilor 151[16] minongoi io tuum ra Raja' Dimitrius. Nampataak io rondo' karaun mas am raun palma ra raja', niayuk kukula' ngantaun bulisang ru raun jaitun, ondo' maindalom pataakon giu' ra kuil. Kaa' kalo minindagu io ra atan-atan intor ra kuayan ru ginio.

⁵Tauli no io nakaalap ra kaluagan koson mampaugar ra inatangan nano ra sasambungon, paat io piniau ru Raja' Dimitrius koson sumaang ra pantuuman ru ulun maminson ra raja' am kinuatan intor ra baal am inatangan ru ulun ru Jaudi. Kon ri Alkimus,

⁶“Ulun-ulun maamaya' ri Judas Makabi ondo' sabiton ra bansa' Mursyid masalok manusuk koson mangayou am gumuor, am kalo mompoloso ra pamarintaan ragitio ralalom mamimio.

⁷Ginio sabap ra pinalabus ku kandoi ru Tingganai Maayo Imam ondo' nasauk ra tungkus kuno sabap ra papag. Minatong aku ragiti,

⁸kasaa' toojo sabap ra magalabo aku kaga' mangkara' ra kaatangan muno raja'. Kopongo raginio niayuk koson ra kaatangan ru bansa' kuno, sabap ra binaal ra sasambungon ri Judas am ulun-ulun minaya' riso rondo' karaat ra ngaangai' bansa' mai.

⁹Makapandai noyo boo ra ngaangai' baal ragitio, kasaga' kono raja' mambaal ra ondo' maaya' ra guang ru ulun am kinoonsoi muno koson mapalabus ra pagun am bansa' mai intor ra pangimbalaan.

¹⁰Buoi ri Judas lakat poyo maayag, pagun ti kalo noyo lair makasia' ra moonsoi.”

¹¹Kapupusi' ri Alkimus ragu nano, ulun-ulun maminson ra bokon nangalap ra kaluagan raginio koson mapasingkual ra sangit ru Raja' Dimitrius ri Judas, sabap ra ilo niayuk masisang riso.

¹²I Nikanor pana, tingganai ru pulalai ru gaja, nataki' pinasauk ru raja' ra gabenor Judia am inataran ra giu'.

¹³Sinusub io koson mamatoi ri Judas, nampatutuliar ra ulun-ulun maamaya' riso, am nampasauk ri Alkimus ra Tingganai Maayo Imam ru baloi sambayangan ondo' nauligan kaga'.

¹⁴Ngaangai' bansa' ra bokon giu' ra Judia ondo' nagiru' noyo intor ra namulunsaran-namulunsaran ri Judas, raino guguluyur nagamung ri Nikanor, sabap ra nangkara' ilo ra atan ayuk ondo' mantilubat kapoam mampajamar ra ulun ru Jaudi mampakauli' risilo galama'.

¹⁵Nokorongog ulun ru Jaudi ra tatanga' i Nikanor matong mamulunsar risilo, am ra ulun bansa' ra bokon minaya' paguum. Ilo pana nampatauk ra tana' ra inan am nakiasi' ri Aki Kapuuno' ondo' nampili' noyo ra bansa' nilo masauk ra longgom Nano koson ra sabubuoi no, am ondo' masalok mangindangan risilo ra pakitonon paat ilo makiindangan.

¹⁶Nabaya' boo ra susuban ri Judas tingganai nilo, nalingas ilo minintor koson mongoi uma' ra pantula' ralalom pangayawan mamaar ra kampung Disau.

¹⁷I Simon, pabukat ri Judas nangayou ri Nikanor, kaa' liminugut sangkinolor sabap ra minugar namulali' intor ra bala ru pantula'.

¹⁸Pokorongog i Nikanor ra kinapanggol mangayou ru ulun-ulun ri Judas am namatas koson manalasai ra baal raginio sala' ka ra pangayawan.

¹⁹Sabap raginio sinusub no i Posidonius, i Tiodotus am i Matatias koson mambaal ra nabantuan pabansayan ra ulun ru Jaudi.

²⁰Kopongo ginuang toojo kitaakon-kitaakon ru nabantuan no, panglima ru sigagama' nampatanou raginio ra ngaangai' pulalai am nangiou ilo ra rondo' guang koson mobonsoi.

²¹Inaru' boo rondo' orou koson karuruo ngaulun panglima ayuk maguma'. Sigagama' binandasan am nanturung giu' ra kurisi' maatang ondo' pinatampos.

²²Kaa' pinaayan ri Judas kukula' ngaulun makakinandoi mangayou ondo' nakatampos giu' ra kukula' intok ondo' moonsoi koson magalung ra maaru' lair amon ru pantula' mamulali' lumaat. Karuruo ngaulun tingganai pana nambaal ra pansusunuran ondo' matanda' ugar no.

²³Kopongo pansusunuran no, minayan i Nikanor giu' ra Jirusalim koson ra kukula' buoi am kalo nambaal ra atan-atan ondo' malaat. Mulu' piboo ra ulun masuang ondo' guguluyur magamung riso sinusub no minuli'.

²⁴Masalok i Nikanor mangimansa' ri Judas am mangambi' ra guang nano ra totopot.

²⁵Naminson io ri Judas maa' raginio manangandu' am manambaloi galama'. Binaya' ri Judas pinson no am naayag ra moonsoi.

²⁶Nakito ri Alkimus ra nobonsoi toojo i Nikanor am i Judas. Io pana nangalap rondo' ralin intor ra surat nabantuan no am minuma' ra Raja' Dimitrius. Pinasaboi no ra raja' ra i Nikanor kalo giminagaya' ra pamarinta sabap pinasauk i Judas, ulun liminaat ra pagun, namalit ra raja'.

²⁷Panguwan-panguwan magabau no nampasangit ra raja'. Ralalom ru sangit nano, nanulis raja' ri Nikanor ra kalo matasu' guang nano ra nabantuan no. Sinusub i Nikanor koson mamparakop ri Judas Makabi am mangator riso ra mataki' giu' ra Antiokia.

²⁸Bilin raginio nampaubong ri Nikanor. Kalo masaga' io koson mangukat ra nabantuan no sabap ra kolondo' atan-atan sala binaal ri Judas.

²⁹Sabap ra kalo makaanggal ra susuban ru raja', naguyum io ra kaluagan koson mamparakop ri Judas ra imumuyin galing.

³⁰Kaa' nakito ri Judas ra tumalimpuun i Nikanor minggalur riso am minggaar riso ra mambulingot intor ra kaindalaman. Nakapandai i Judas ra ginio tatandu' ondo' malaat. Io pana nanimung ra masuang ulun maamaya' riso am nansibuni intor ri Nikanor.

³¹Pakaliman i Nikanor ra rinuung io ri Judas, ongoi io ra Baloi ru Tuhan ondo' matulai paat ra imam-imam mampataak ra taak simbalui. Nanusub io ra imam-imam koson mampataak ri Judas riso.

³²Kaa' imam-imam no nagibot minindagu ra kalo nakapandai ilo ati io.

³³I Nikanor pana nampaakang ra kalindu' pamiris nano tampilon ra Baloi ru Tuhan am nagibot, “Amon ru kalo pataakon min i Judas ra binangkil raki', Baloi ru Tuhan ti rataan ku ra tana', altar no lunsayon ku am intok ragitio baalon ku rondo' kuil ondo' moonsoi kaga' koson ra Dewa Dionisius!”

³⁴Kopongo minindagu raginio ugar io. Imam-imam pana nopotoroi ra kalindu' nilo giu' ra suruga' am nakiasi' ri Aki Kapuuno' ondo' masalok mangayou koson ra bansa' takau. Nakiasi' ilo koson ragitio,

³⁵“Iou Tuhan, Okou kalo makapakuan ra atan-atan. Kabalu' pana koson raginio masaga' Kou nampaayan ra Baloi Muno ragiti koson mayan ra tatanga' mai.

³⁶Okou ayuk Tuhan ondo' matulai, puun ru ngaangai' mapasau. Alungi' noyo maa' raginio Baloi Muno ondo' bagu ayuk kinapasau saguli' ra tayar Muno, magulayun mapasau koson ra sabubuoi no.”

³⁷Sangulun ondo' nauligan kaga' giu' ra Jirusalim, ondo' inggalan no i Rajis pinabala' ri Nikanor. I Rajis no ulun ondo' motogom ra bansa' nano am urumaton toojo saboi sinabit ra “Ama' ru ulun ru Jaudi”.

³⁸Paat ra talimpuun ru kajajawan, io ra guang tumaan nampakinuo ra inan painawo nano koson ra kaatangan ru ugama Jaudi, am pinoongoi ra pangakiman sabap ra gagaya' nano.

³⁹Moogot i Nikanor mampakito ra sisang nano ra ulun ru Jaudi. Sabap raginio nanusub io ra nasailan intor ra 550 ngaulun saujor koson mamparakop ri Rajis,

⁴⁰sabap ra nangkara' io ra binaal no raginio mantilubat ra ulun ru Jaudi.

⁴¹Saujor-saujor nakatampos koson mampagaau ra manara intor ri Rajis paat raginio. Linunsai nilo kulobon garabang ra liliut am nanusub maa' raginio kulobon-kulobon ru manara solobon. Pakakito i Rajis ra kalo lair makapagiru', tinobok no inan nano ra ilang.

⁴²Masaga' io poyo matoi ra maurumat intor ra maratu' ra kalindu' ru pantula' am nakaili' ra pagasaban.

⁴³Kaa' sabap ra naagou-agou, tobok no kalo namatoi riso. Paat ra saujor-saujor sumubol mansail ra kulobon-kulobon, i Rajis ra baani nagaloi ra rasawat ru timbok am koson ra sangulun tutumula' tindak io ra tatanga' ru ulun masuang giu' ra ragana'.

⁴⁴Nalingas ilo mininggalur am io pana naratu' giu' ra tatanga' ru intok ondo' naliliung.

⁴⁵Kaa' lakat poyo naayag io, am ra guang maantak sukal io, am kabalu' pana raraa' tumulisan intor ra pilat-pilat nano ondo' maayo no, nasimbul io nansail ra ulun masuang am bigor giu' ra rondo' bulur batu ondo' mapasuk.

⁴⁶Nataasan noyo boo ra raraa', ingkualo' no suang ru tinai' nano ra karuruo kalindu' nano, am papatiro' no ra ulun masuang no. Liliwa' nambaal raginio, nakiasi' io maa' raginio Tuhan nanguasa' ra ngaangai' ondo' naayag am maminawo, pataakin ginio riso saguli' ra tauli no. Koson raginio noyo i Rajis minatoi.