Read Timugon Murut 2 MAKABI 15 Bible Online

2 MAKABI 15 - Timugon Murut bible

2 MAKABI 15

¹Naala' i Nikanor ra i Judas am ulun-ulun nano soroi giu' ra libung Samaria. Io pana namatas koson mamulunsar risilo paat ra orou Sabat, orou tangusan tayar ru ulun ru Jaudi, sabap baalon no ra kalo manguma' ra makalalaa'.

²Ulun ru Jaudi jinajalan maya' ra saujor nano nakitaak riso maa' raginio pai' pamatoi ra malaat kaga' am kolondo' guang makaasi', kaa' mangurumat ra orou ondo' matulai no ondo' luntuk ayuk ra Tuhan ondo' makakito ra ngaangai' no.

³I Nikanor pana, ondo' naayag ra asabin kaga' ra tana' ti, nangkuot, “Motopot kia giu' ra suruga' mokoondo' ra panguasa' ondo' nangaru' ra orou Sabat musiti' iantakon?”

⁴Taam ulun ru Jaudi, “Iou! Tuhan ondo' naayag am makakuasa' giu' ra suruga' nanusub ramon koson mangiantak ra orou Sabat.”

⁵Kaa' indagu i Nikanor, “Iou noyo, kaa' aku no ondo' makakuasa' ra tana' ti, am susubon takamin koson pakakaton kinandoi mangayou am suguton kitaakon ru raja'.” Kaa' kalo nakasugut io nambaal ra inatangan malaat nano.

⁶Nabaya' ra limbau minindagu i Nikanor ra manirong io rondo' batu pangkaraan koson mangkara' ra namanangan nano ri Judas am ulun-ulun minaya' riso.

⁷Kaa' nangintopot i Judas ra maayo kaga' kalansanan ra Tuhan mangindangan riso.

⁸Sabap raginio nambilin i Judas ra ulun-ulun nano maa' raginio pai' kalaa' ra pamulunsaran ru pantula'. Nangkimait io risilo koson mangkara' ra indangan ri Aki Kapuuno' Ondo' Maayo Kaga' Kuasa' paat ra galing, am koson magulayun mangintopot ra raino ti pana Io mangani' risilo ra kamanangan.

⁹Nangikang io ra guang nilo am nambasa' intor ra kitab ru Ukum am nabi-nabi, am nampakara' risilo ra ngaangai' namanangan ondo' noowot nilo noyo.

¹⁰Kopongo guang nilo pinaikang, nampakara' i Judas risilo am nanulu' ra kolondo' gagaya' ru bansa' ra bokon am ibot-ibot ondo' nasulang nilo.

¹¹Koson raginio noyo io nangani' risilo ra kinandoi mangayou, sala' ka ayuk perisai am tutura' ondo' mopokoonsoi ra guang, kaa' ra ragu-ragu ondo' mangikang ra guang. Io niayuk mapakaansuk ra guang nilo ra nantunung ra inupi nano, koson ra pinaintalang ondo' maintopot.

¹²Koson ragitio pinaintalang no: I Judas nakakito ra ondo' ragili Tingganai Maayo Imam i Onias, sangulun moonsoi guang, minggana' guang, am molomoi, mapandai mindagu, am intor ra boborok inila' ra ngaangai' kabajikan. Kalindu' ra pinolopo nakiasi' i Onias ra tayar ru ngaangai' bansa' Jaudi.

¹³I Judas pana nakakito ra sangulun ondo' matulai kaga' am inurumat kaga' am makaabuk mapulak.

¹⁴Kon ri Onias, “Gitio i Jirimia, nabi ri Aki Kapuuno', rangan min. Masuang nakiasian nano tayar ru bansa' takau am Jirusalim, bandar mapasau.”

¹⁵I Jirimia pana nampatutui ra kalindu' pamiris nano am nampataak ra rondo' ilang mas ri Judas liliwa' mindagu,

¹⁶“Apuo' noyo ilang ti koson ra taak ri Aki Kapuuno'. Ilang ragitio noyo okou makapuso ra pantula'-pantula' muno.”

¹⁷Ragu-ragu ri Judas ondo' sumonor no nangikang ra guang ru moonong ulun am nampabaani ra guang ru ulun mamulok. Bandar, ugama am Baloi ri Aki Kapuuno' nilo soroi ralalom ru makalalaa'. Sabap raginio ulun ru Jaudi namatas koson kalo malibut, kaa' mamulunsar ra pantula' ra baani kaga' am namatas ra baal raginio ra baani ralalom pangayawan rondo' manggal ra rondo'.

¹⁸Kalo najanjayan ilo mangkara' ra sasambaloi am pabukat nilo, kaa' ondo' kaimamangan toojo nilono iono Baloi ri Aki Kapuuno'.

¹⁹Ulun ondo' iniruanan giu' ra ralalom ru bandar magalabo mangkara' ra pangayawan giu' ra intok pangayawan ra malimparang.

²⁰Moonong ulun maginaa ra bala ru osoi namanang ra pangayawan no. Pulalai-pulalai ru pantula' tatanga' maribok jumalai ra nalulur ra pulalai mangkuda giu' ra kait am pamiris am niayuk gaja-gaja nilo giu' ra intok-intok ondo' moonsoi kaga'.

²¹Nakito ri Judas Makabi pulalai ru pantula' ondo' masuang kaga' no, kinandoi mangayou nilo ondo' naukop am gaja-gaja nilo ondo' masangit. Io pana nompolopo ra kalindu' nano giu' ra suruga' am pakiasi' ra Tuhan ondo' nambaal ra kaimuagan-kaimuagan, am mangintopot io ra Tuhan mangani' ra kamanangan ra ulun ondo' maaya', am sala' ka ra ulun ondo' mokoondo' ra saujor maayo.

²²Gitio noyo pakiasian ondo' rinagu ri Judas, “Iou Tuhan, paat ri Gijkia raja' ru Jaudi, nangator Kou ra malaikat Muno koson mamatoi ra 185,000 ngaulun intor ra pulalai ri Sanirib.

²³Raino, iou Tuhan panguasa' giu' ra suruga', susubo' poyo malaikat Muno ondo' moonsoi koson mambaal ra pantula' monontol ra malaa'.

²⁴Mabaya' ra kuasa' Muno ondo' maayo, pusoo' noyo ulun raginio ondo' liliwa' nagulas Rirun matong mamulunsar ra ulun pinili' Muno.” Koson raginio noyo i Judas namupus ra pakiasian nano.

²⁵I Nikanor am saujor nano jiminalai binaya' ru bolos ru bujung am rimbai-rimbai kamanangan,

²⁶kaa' i Judas am ulun-ulun nano nanguma' ra pantula' am nakiindangan ri Aki Kapuuno'.

²⁷Liliwa' nangayou ra kalindu' am nakiasi' ralalom ru guang ri Aki Kapuuno', namatoi ilo olo'-olo' 35,000 ngaulun intor ra pulalai ru pantula'. Naansukan ilo kaga' sabap nakaalap ra indangan ri Aki Kapuuno'.

²⁸Kopongo pangayawan no naampus, minuli' ilo ra guang naansukan. Nakito nilo i Nikanor naukop ra kuliamos mangayou nano minatoi nakaranga' giu' ra intok pangayawan.

²⁹Ilo pana ngaangai' nagilakup ra nagindii koson mongompor ra Tuhan ralalom ragu nilo galama'.

³⁰I Judas Makabi, ondo' masalok mangayou ra ngaangai' ru guang am salibuor nano tayar ru bansa' nano, am intor ra boborok kalo igondo' nalulu' togom nano koson ra ulun sabansa' nano, nanusub maa' raginio ulu am kalindu' pamiris ri Nikanor putulon am ibiton ra Jirusalim.

³¹Pakasaboi giu' ra bandar, nanusub io ra mamagun tumimung am paayanon imam-imam giu' ra saang ru altar. Nanusub io niayuk maa' raginio ulun giu' ra kubu piawon.

³²Io pana nampakito risilo ra ulu ri Nikanor ulun malaat no, am kalindu' nano ondo' ra minsawat guang pinaakang ra Baloi ri Aki Kapuuno' Ondo' Maayo Kaga' Kuasa'.

³³Pinutul no rila' ru ulun ondo' malaat no, am mindagu ra mangani' io raginio sanganu ka sanganu ra susuit-susuit. Kalindu' ri Nikanor tinair giu' ra sandaup ru Baloi ri Aki Kapuuno' koson ra inono' ra io sasambungon no.

³⁴Kopongo raginio ngaangai' ulun ondo' siminaang ra giu' nantingaa' giu' ra suruga' am nongompor ra Tuhan ondo' minintalang ra inan Nano am nagalung ra katulayan ru Baloi Nano.

³⁵Kopongo raginio tinair ri Judas ulu ri Nikanor ra kubu maa' raginio makito ru ngaangai' ulun koson ra tatandu' indangan ru Tuhan.

³⁶Pinatas boo ra rondo' bolos ra koson ra sabubuoi no orou raginio kalo malilianan, kaa' musiti' iantakon ra moonong bilor paat ra orou ra kalo poyo Orou Mordikai,[17] iono orou koopor am talu ra sila' koopor am ruo, ondo' ralalom ragu ru Aram sabiton ra sila' Adar.

³⁷Koson raginio noyo tunung ru kaayagan ri Nikanor. Intor raginio bandar Jirusalim nagulayun nasauk ra longgom ru ulun ru Ibrani. Aku pana mamupus ra tunung kuno ragiti.

³⁸Amon ru moonsoi am motopot ugar ru tunung no, ondo' ginuang kuno nasugut. Kaa' amon ru mamaa' ayuk am kalo kula' matanda', sotopot no polos ra giu' no kinapandai kuno.

³⁹Nakapandai takau ra kalo moonsoi manginum ra wain ayuk kapoam timug ayuk. Kaa' wain polotokon ra timug masauk ra inumon maamis ondo' mamparuang ra kasuungan. Koson raginio noyo rondo' tunung ondo' moonsoi amon susuyon ra matanda' masauk ra kaansayin ra tayar ru ulun ondo' mambasa' no. Gitio noyo pupus ru tunung kutu.