Read Timugon Murut 2 MAKABI 2 Bible Online

2 MAKABI 2 - Timugon Murut bible

2 MAKABI 2

¹Ralalom ru piagam, natuum mai tinulisan ru Nabi Jirimia noyo ondo' nanusub ra ulun ondo' inaut ra pamatiran koson mambuni ra sanganu apui intor ra altar, koson ra ondo' tinulisan mai ni.

²Nabi no niayuk nangila' ra Ukum ru Tuhan ra ulun pinatiran am naminson risilo maa' raginio pai' pakalilian ra susuban-susuban no, am pai' pakalayau paat makakito ra sinungkalalaing mas am pirok am ngaangai' pinamunga' no.

³Naminson io ra ragu-ragu ondo' nogondo' maa' raginio totopot ilo pai' pangiruan ra Ukum.

⁴Ralalom ru piagam no tinulisan niayuk baal ragitio intor ri Jirimia: Nabaya' ra indangan ru Tuhan, nanusub nabi no maa' raginio Kim ru Tuhan am Kaban Nabantuan ibiton mabaya' riso ra rondo' gunung. Gunung raginio noyo ondo' inaloi ri Musa koson magilong ra pagun ondo' binantu' ri Aki Kapuuno' ra bansa' takau.

⁵Paat ri Jirimia nagaloi ra gunung no, ilai' no rondo' luang batu ondo' maayo. Giu' no pinasibuni no Kim ru Tuhan, Kaban Nabantuan, am altar ru kaminyan. Kopongo raginio intok subalan mongoi ra luang batu no tinauban toojo.

⁶Kukula' ngaulun rangan ri Jirimia minongoi ra giu' no koson mambaal ra tatandu' ru ralan no, kaa' kalo nakatuum ilo ra luang batu no.

⁷Pokorongog ra baal raginio, nansawai i Jirimia risilo, kono, ‘Kolondo' sangulun pana iowon makapandai ra intok raginio saboi i Aki Kapuuno' manimung ra ulun Nano saguli' poyo am makaasi' risilo.

⁸Paat raginio manulu' Io ra intok ru kuliamos-kuliamos no sinibuni. Sinda ratangan ru Tuhan makito giu' ra gaun ondo' timinuun koson ra ondo' nasauk paat ri Musa, am kalupus raginio paat ri Salomo nakiasi' maa' raginio Baloi ri Aki Kapuuno' patimpokon ra katulayan ra Tuhan.'

⁹Akai niayuk binalaan ati kulaan Raja' Salomo ondo' mapintar nampataak ra taak simbalui paat Baloi ru Tuhan nopongo binaal am patimpokon ri Aki Kapuuno'.

¹⁰Paat ra raja' tatanga' nakiasi', riminatu' apui intor ra suruga' am nonolob ra taak-taak simbalui, koson ra ondo' nasauk ragili, paat ri Musa tatanga' nakiasi'.

¹¹Sumugut ri Musa, taak simbalui koson mangampun ra tula no nakai' nosolob ru apui sabap ra kalo inakan ru ulun.

¹²Raja' Salomo nangiantak ra pangiantakan no buoi balu' ngoorou.

¹³Kasaukan-kasaukan no tinunung niayuk ra ralalom ru piagam rasmi am ralalom ru kitab kaayagan ri Nigimia, ra nambaal io rondo' baloi ru buuk am nanimung ra ngaangai' kitab intor ra raja'-raja' am nabi-nabi, tinulisan-tinulisan ru Raja' Daut am surat ru raja'-raja' intor ra taak-taak simbalui.

¹⁴Koson niayuk ri Judas nanimung noyo ra ngaangai' kitab ondo' nantutuliar sabap ra pangayawan. Ngaangai' ru kitab no lakat poyo soroi ramon.

¹⁵Amon ru makapakuan kau, susubo' ulun mongoi pangalap raginio.

¹⁶Sabap ra kolondo' kuayan mai mangiantak ra Pangiantakan ra Baloi ri Aki Kapuuno' Patimpokon Saguli', nanulis akai ra surat ti maa' raginio akau niayuk mangiantak ra pangiantakan no.

¹⁷“Binayag noyo ri Aki Kapuuno' ngaangai' bansa' Nano am nampasaguli' ra tana' tinungkus takau, pamarintaan, imam am sambayang giu' ralalom ru Baloi Nano ritakau,

¹⁸koson ondo' binantu' Nano ra ralalom ru Ukum Nano. Nampalabus Io ritakau intor ra masuang karaat am nampapasau ra Baloi Nano. Mangintopot akai ri Aki Kapuuno' mataki' mampakito ra guang makaasi' Nano ritakau am magibit ritakau ngaangai' intor ra ngaangai' pisuk ru tana' ti koson tumimung giu' ra Baloi Nano.”

¹⁹Ralalom ru kitab ondo' intor ra limo buuk, i Jason intor ra Kirini nanulis ra tunung-tunung ri Judas Makabi am pabukat-pabukat nano, namasawan ra Baloi ri Aki Kapuuno' ondo' matulai, am niayuk patimpokon ru altar Nano, am

²⁰niayuk intor ra pangayawan manggal ri Antiokus Ipipanis am Iupator anak ungkuyon nano.

²¹Io niayuk nantunung ra pinaintalang-pinaintalang intor ra suruga' ondo' nakito ru kukula' ngaulun nauligan kaga' ondo' nangayou koson ra kaatangan ru ulun ru Jaudi. Saujor takau sanganu ayuk suang nano, kaa' nakasugut ilo nampagaau saguli' ra titikop ru pagun takau am napagiru' ra pulalai-pulalai bansa' ra bokon.

²²Nagaau nilo saguli' Baloi ru Tuhan ondo' nauligan kaga' giu' ra titikop ru tana' am nampalabus ra bandar Jirusalim. Ilo niayuk napatapuli' ra ukum-ukum ondo' maar mapuso. Ngaangai' no naalap nilo kabaal sabap ra Tuhan moonsoi guang am makaasi' risilo.

²³Raino mangkinam aku mangantos ra kitab ri Jason ondo' intor ra limo buuk no masauk ra rondo' buuk.

²⁴Suang-suang am numbur-numbur ondo' masuang am maawar ragu maaru' mantipagon ra ulun ondo' moogot migila' ra tunung-tunung ru sejarah.

²⁵Kaa' piniratan ku noyo koson mambala' ra baal-baal ondo' makabunduk ra guang ru ulun ondo' masaga' mambasa'; baal-baal ondo' matasu' ra ulun ondo' masaga' mangkara' ralalom ru guang, am ondo' mokoonong ra ngaangai' ulun ondo' maaru' lair mambasa' ra buuk ti.

²⁶Mambaal ra tulisan maantos koson ragitio rondo' kandoi mapagon ondo' mompogogot ra mingkotog mangandoi am makariwa' ra bolong.

²⁷Kandoi ragitio nogondo' pagon no ra momongo ra rondo' bunsag pagakanan ondo' makajala' ra tambului-tambului. Kabalu' pana koson raginio, masaga' aku mingkotog koson ra katasuan ru ulun-ulun mambasa'.

²⁸Intor ra nangimansaan ra moonong kasaukan, pataakon ku ginio ra ulun nanulis galing no. Aku galama' mingkotog koson timpokon ayuk ondo' maatang kaga' no ayuk ralalom ru tulisan ontoson kuno.

²⁹Aku sala' ka arkitek ondo' mambaal ra baloi bagu am musiti' mangimansa' ra ondo' maawar ra ragu ru pambaalan. Koson aku ayuk ra ulun manukang ra ukiran am manukang ra lukisan ondo' musiti' maguyum ra atan ondo' maaya' koson mompokoonsoi ra baloi no.

³⁰Sangulun ondo' mapandai kaga' ra sejarah musiti' migila' am mangimansa' ra ngaangai' kasaukan, am pabalaan ngaangai' no ra sailon arati' no.

³¹Kaa' ulun ondo' mambaal ayuk ra tulisin ra ontoson, musiti' iowon manulis ra suang no maantos ra kolondo' pabalaan ngaangai' ra sailon arati' no.

³²Aku pana tumalimpuun ra raino, ra kolondo' pabalaan ra bokon. Kalo motopot koson kaawaran ragu paguluon, am kariwaan tunung nano galama'.