Read Timugon Murut 2 MAKABI 4 Bible Online

2 MAKABI 4 - Timugon Murut bible

2 MAKABI 4

¹Kaa' i Simon, ulun ondo' liminaat ra pagun nano galama' am ondo' nambala' ra i Apolonius intor ra rapu' giu' ralalom kausinan, nanguu' ri Onias ra i Onias noyo ondo' nampalamba' ri Giliodorus am namparatong ra karaat no.

²Io niayuk baani nanguu' ri Onias koson ra ulun malaat ru pagun. Kaa' i Onias nambaal ra moonsoi ra masuang ra Jirusalim. Nanindung io ra ulun sabansa' nano am miningkotog kaga' maa' raginio ukum-ukum gagayaan.

³I Apolonius anak ri Ministius, gabenor ru Siria Maayo am Pinisia, nanungka' ra kalaatan-kalaatan ondo' binaal ri Simon. Pantulaan ri Simon am i Onias giminaai-gaai, saboi pupus no sangulun kalansanan ri Simon nambaal ra kukula' pamatayan. Nalimanan ri Onias baal raginio makalalaa' riso,

⁴

⁵io pana minuma' ra raja'. Kuayan nano sala' ka mononsol ra ulun sabansa' nano, kaa' koson mirot moposoroi ra kaansayan ru bansa' Jaudi, kasuangan no am niayuk ra sasangulun.

⁶Nalimanan no ra kolondo' raja' maya', kalo lair masugut pabansayan ralalom baal ru pagun, am ra i Simon marayus mambaal ra kalaatan.

⁷Kopongo Raja' Siliukus minatoi am i Antiokus ondo' nauligan ri Ipipanis nasauk ra raja', i Jason boborok ri Onias minirot koson gumaau ra kandoi Tingganai Maayo Imam am nangani' ra rasua.

⁸Minuma' io[8] ra raja' am nambantu' ra 13,000 ngakilogram pirok am 2,700 ngakilogram poyo bayarin intor ra ampos ra bokon.

⁹Suai raginio nambantu' io mambayar 5,000 ngakilogram pirok amon ru aniin ra kuasa' koson mambaal ra intok sipoot koson ra intok igilaan tayar ru kamulakan ungkuyon, am nanulis ra inggalan ru ulun Jirusalim koson ra mamagun ru bandar Antiokia.

¹⁰Nangiou raja' am nalingas ra kalupus i Jason pinasauk ra Tingganai Maayo Imam, pinakai no kuasa' nano koson mapaindalom ra mamagun ru Jirusalim ra ralan ru kaayagan ru ulun Junani.

¹¹Tinalimpuunan no ra nangiru' ra ngaangai' kuasa' pinaluntuk ondo' tinaakan ru raja'-raja' ru Siria ragili ra bansa' Jaudi intor ra binaal moonsoi ri Juanis. I Juanis no ama' ri Iupolimus ondo' sinusub minongoi ra Roma koson makimampabukat am pagamungan. I Jason niayuk nangiru' ra kaulayan ru Jaudi am nampaulig ra kaulayan bagu ondo' nansuai ra Ukum takau.

¹²Ralalom ru guang maantak nambaal io rondo' intok sipoot mamaar ra Baloi ru Tuhan. Kamulakan ungkuyon takau ondo' maribok kaga' susubon maya' ra kaugaran-kaugaran ru sipoot sumugut ra kaulayan ru Junani.

¹³I Jason, Tingganai Maayo Imam ra magabau no nambaal ra kalaatan-kalaatan ondo' kolondo' nakagula'. Sabap riso, mamagun mangapu tojojo ra kaulayan ru Junani am ralan ru bansa' bokon, saboi

¹⁴imam-imam kalo boo mampalio ra kandoi-kandoi mapasau nilo. Kalo boo masaga' ilo ra sambayang giu' ra Baloi ru Tuhan am nampalilian ra ngaangai' taak simbalui. Paat ra tatandu' ru manalimpuun ra mamatir ra piring tingkugon noyo, nalingas ilo koson maya' ra pangkulian-pangkulian ondo' inggalarin ru Ukum takau.

¹⁵Nangimpai ilo ra atan ondo' inurumat ru kinamatuaan takau, kaa' tatandu'-tatandu' kaurumatan ru Junani lioon nilo kaga'.

¹⁶Ginio sabap no ra ilo tumalimpuun makauma' ra kapaganan, sabap ra bansa' ondo' kaulayan nano kaansayin nilo am ralan ru kaayagan nilo kinamin nilo tiluo', nasauk ra pantula' am mangimbolo' risilo.

¹⁷Topot ra ginuaran ra Ukum ri Aki Kapuuno' sala' ka baal ondo' boborok, koson ra nakito intor ra kasaukan-kasaukan ragitio.

¹⁸Rondo' paat ru raja' siminaang ra kaugaran ru sipoot ondo' binaal limo[9] ngambilor igondo' giu' ra bandar Tirus,

¹⁹i Jason ulun malaat no nangator ra kukula' ngaulun sinusub intor ra Jirusalim, ondo' tinulisan inggalan koson ra mamagun ru Antiokia. Nanusub i Jason risilo magibit 2.5 ngakilogram pirok koson ra balanja' ru taak simbalui ra Dewa Giraklis. Kaa' ulun-ulun sinusub no galama' nangkara' ra kalo mokoonong ruit no koson ra taak simbalui.

²⁰Ginio ra ruit ondo' kuayan no balanja' ru taak simbalui ra tayar ru Dewa Giraklis, pinakai ru ulun-ulun nagibit ra ruit no koson mangukop ra kapal mangayou.

²¹Kopongo i Apolonius anak ri Ministius sinusub mongoi ra Misir koson siminaang ra napasaukan ra Raja' Pilomitor, norongog ru Raja' Antiokus ra raja' ru Misir no kalo nangiou ra ukum-ukum nano. Raja' Antiokus tumalimpuun magalabo intor ra kaansayan ru pamarintaan nano galama'. Sabap no ra minongoi io ra bandar Jopi, kalupus raginio giu' ra Jirusalim.

²²Inuma' io ra kaansukan ri Jason am mamagun ru bandar am kinayang siminubol ru pulalai ru ulun ondo' nagibit ra pilasut liliwa' salalakup. Kopongo raginio nagibit Raja' Antiokus ra pulalai nano ra Pinisia.

²³Kopongo talu ngambilor nanusub i Jason ri Minilaus pabukat ri Simon ondo' sinabit noyo ragili,[10] koson magibit ra ruit ondo' binantu' nano ra raja' am nakitaak ra pamatasan ru raja' intor ra kukula' baal maatang.

²⁴Kaa' paat minuma' ra raja', binaal no raja' nampaliman ra siminalu koson ra ulun ondo' makakuasa'. Nangani' i Minilaus ra ruit 10,200 ngakilogram masuang poyo intor ra binantu' ri Jason, saboi nasugut ri Minilaus nangalap ra kandoi Tingganai Maayo Imam.

²⁵I Minilaus pana siminaguli' ra Jirusalim liliwa' nagibit ra surat napasaukan intor ra raja'. Kaa' suai raginio kolondo' io ra atan pana ondo' maaya' koson masauk ra Tingganai Maayo Imam; paliso nano koson ra sangulun panguasa' ondo' masangit am amon ru sumangit, bolos nano koson ra bibiag masigo.

²⁶Koson raginio noyo i Jason nampagaau ra kandoi ru Tingganai Maayo Imam intor ra pabukat nano galama' ondo' linuir niayuk, am raino nagiru' kalalaat ra pagun Amon.

²⁷Kabalu' pana i Minilaus nakaalap ra kandoi Tingganai Maayo Imam, kaa' kalo nambayar ilo ra ruit ondo' binantu' nano ra raja'.

²⁸I Sostratus, komando ru kubu giu' ra Jirusalim, nararayus nansika' ra ruit no, sabap ra pinangandoi io mampalulur ra ampos. Pupus no karuruo ngaulun no piniau minuma' ra raja'.

²⁹I Minilaus nampasauk ri Lisimakus pabukat nano koson ra Tingganai Maayo Imam karuo, am i Sostratus nampili' ri Kratis, tingganai ru pulalai ru Siprus, koson ra uakil nano.

³⁰Liliwa' raginio rondo' ginuor nasauk giu' ra bandar Tarsus am Malus giu' ra libung ru Kilikia, sabap ra raja' nampataak ra karuruo bandar no ri Antiokis, sangulun ruandu' parulug ru raja'.

³¹Raja' pana nangiruan ri Andronikus sangulun pagawai maatang koson ra uakil nano, kaa' ondo' io galama' minugar ra naagou-agou minongoi ra Kilikia koson mampamio ra baal ru giu' no.

³²I Minilaus nangalap ra kaluagan raginio koson mantakou ra kukula' parabut mas intor ra Baloi ru Tuhan. Santayaran no pinataak no ri Andronikus am santayaran poyo tinalan no giu' ra bandar Tirus am bandar-bandar ra mamaar no.

³³Pokorongog i Onias ra baal raginio naguyum io ra sindungan giu' ra rondo' intok mapasau giu' ra Dapni mamaar ra bandar Antiokia, am sumonsol ri Minilaus.

³⁴I Minilaus pana ra simininok nangambi' ri Andronikus koson mamatoi ri Onias. I Andronikus pana minongoi tuum ri Onias. Nansikin ilo ri Onias am namparuung ra nambantu' ra pamayagan riso. Pupus no naambi' i Onias koson mangiruan ra intok mapasau no, kabalu' pana kalo mangintopot. Kaa' paat raginio niayuk i Andronikus namulali' pamatoi ri Onias ra kalo nampalio ra katimpakan.

³⁵Sala' ka bansa' Jaudi ayuk kaa' bansa'-bansa' ra bokon pana siminangit am magalabo sabap ra namatayan ondo' malaat no.

³⁶Pakasaguli' raja' intor ra libung Kilikia, kukula' ngaulun ru Jaudi intor ra Antiokia minuma' ra raja' am nambala' ra namatayan ra malaat ri Onias. Kukula' ngaulun Junani ondo' masisang ra kalaatan minaya' niayuk nagulas raginio.

³⁷Mangiluk kaga' guang ru Raja' Antiokus am makaasi'; nantangi' io nangkara' ri Onias ondo' mapintar kaga' am matanda' kaayagan nano.

³⁸Sangit ru raja' no pana nasingkual ri Andronikus. Pulali' ayuk bayang ru pamarintaan ri Andronikus iniru' ru raja'; sukub nano rinilak, am inibit io liminiput ra bandar polos ra intok namatayan ri Onias. Giu' ra intok no niayuk ulun namatoi no inukuman ra matoi. Koson raginio noyo Tuhan nambalos riso ra ukuman ondo' motopot.

³⁹Liliwa' raginio i Lisimakus am napandayan ri Minilaus pabukat nano, ruruli' noyo nantakou ra kuliamos mapasau giu' ra bandar Jirusalim. Pakatabual tanou raginio, timinimung mamagun manggal ri Lisimakus.

⁴⁰Sabap ra mamagun ondo' siminangit kaga' no giminuor, nangator i Lisimakus 3,000 ngaulun makakinandoi mangayou koson mamulunsar risilo. Pulalai no tiningganai ri Auranus, sangulun ondo' matutuo noyo kaa' sasambungon kaga'.

⁴¹Paat ra ulun ru Jaudi ondo' natimung giu' ra liliut Baloi ru Tuhan nakakito ri Lisimakus mamulunsar risilo, nanganam ilo ra batu kapoam putul ru tataun am mokoondo' poyo ondo' nangakup ra kaau. Ralalom ru kajajawan no pinapatir nilo ngaangai' no ri Lisimakus am pulalai nano.

⁴²Masuang risilo napilatan, kukula' ngaulun minatoi am ondo' bokon nagiru'. I Lisimakus galama', ulun mantatakou ra Baloi ri Aki Kapuuno' no, pinatoi mamaar ra intok kausinan.

⁴³Sabap ra kasaukan no, pinoongoi i Minilaus ra pangakiman.

⁴⁴Pakaratong raja' intor ra bandar Tirus, Majlis Masawat Kaga' ru Jaudi giu' ra Jirusalim nanusub ra talu ngaulun koson manguu' ri Minilaus.

⁴⁵Kaa' pakaliman i Minilaus ra maala io ralalom ru baal raginio, nambantu' io ra masuang ruit ri Ptolimius anak ri Doriminis maa' raginio mangambi' ra guang ru raja' koson manaung riso.

⁴⁶Nangkimait i Ptolimius ra raja' mongoi ra langgar ilain koson masaga' ra angin maamis. Io pana nangambi' ra raja' koson mangulau ra guang nano.

⁴⁷I Minilaus pana ondo' nasauk ra puun ru ngaangai' kajajawan no pinalabus intor ra ngaangai' panguwan, kaa' katatalu ngaulun sinusub ondo' kolondo' sala no inukum ra matoi. Alika amon ru baal raginio rinagu ra saang ru ulun Skit ondo' malaat pana kaga', raguon ilo ra kolondo' sala.

⁴⁸Katatalu ngaulun no nangampin ra bandar Jirusalim am mamagun nano am niayuk parabut-parabut mapasau intor ra Baloi ru Tuhan. Kabalu' pana raginio, ukuman kalo matimpok no mataki' pinaugar.

⁴⁹Tayar ru kukula' ngaulun ru Tirus kalaatan raginio napatabual ra guang masisang. Nampakito ilo ra urumat ra katatalu ngaulun ondo' nambaal ra moonsoi no ra linobong nilo ra kinaayo toojo.

⁵⁰I Minilaus ondo' nampaguut ra kandoi nano sabap ra ingkaut ru ulun ondo' makakuasa'. Giminaai laat nano am nasauk ra pantula' ondo' maayo kaga' ra bansa' nano galama'.